Ishaya 10 - Libuka Lya Kuyela1 Makando wabo tawee! Ba kutenda bya kufundiziza byabibi baya ba kutikita ndayano za kulyatilila bantu. 2 Ndayano zikuyata na shihota bakakuyanda kami ba kukwenya bantu ba kushepwa kupwisha kwabo na kuyangula bamfwile na banginga byabishe biya bali nabyo. 3 Mukatenda nahiti ha mutena wakushushuliwa na malwa akafuma kwakutali? Mukatinina kuli yani owo eze akamiyavwe, kami kuti oko mukaholekela wuheti wenu? 4 Kowa shimina shikashalaho, ngoboni muka bashama tuhu hanci hamo na bantapwa hinge kufwa tuhu hamo na baya banazihiwi mu nzita. Hinge noho wukali wa Nyambi ya Ngula kukafwomoka wufwako na liboko lyendi lishili kukolobela mu kushushula. Nyambi ya Ngula ukuliyavwisha mwene wamunene wa Ashiliya 5 Makando tawee kuli Ashiliya, ou nengi lunyanzi lwa kupilama kwami, mu liboko lyendi nimo muli muwana wa wukali wami. 6 Nikatuma Ashiliya kuya na kulwisha litunga lya kuluba kutina Nyambi, nikumutuma ku bantu ba kumpilamisha, ngayi akabapukule na kubalyatangila ngo ntiti yamu mikwakwa. 7 Ngoboni kaliha nibyo bifungo bya mwene wamunene wa Ashiliya, eshe kaliha nisho shili mu mutima wendi. Bifungo byendi nibyo bya kunongesha na kulobesha matunga amengi. 8 Ndaba ukulilundumika na kwamba ngayi, “Kati bakakutwaminina bakanzita yami kaliha bamyene ndi? 9 Kati kaliha nakomene zinkena za Kalino na Kakemeshi hinge Hamati na Alipandi hinge Shamaliya na Ndamashika ndi? 10 Nehi liboko lyami lya tweshele kukoma wene wa tunankishi, wene wa tunankishi twa kubaza twapitakanine twa mu Yelushalema na Shamaliya. 11 Kati nifwako kukalobesha Yelushalema na tunankishi twendi, ngonehe eshi nalobeshele Shamaliya na tunankishi twendi ndi?” Nyambi ya Ngula ukashushula Ashiliya 12 Oho Mwene wamanishakale kutenda milimo yendi nimwayo ha lipili lya Ziyoni namu Yelushalema, ukashushula mwene wamu Ashiliya ndaba ya kulilundumika na kuliyemeza kwendi nimwako. 13 Ndaba ukwamba ngayi, “Ninatende ebye nimwabyo na nyala zami. Ndaba ya ngana na ku yuvwishisha kwami. Ninafumishi zingiza za matunga na kupukula wuheti wabo. Ngonehe nkunzi wamukali ninalyatilili bantu babo. 14 Ninawana wuheti wa matunga, ngonehe muntu awananga lihwa. Ninakungulu bya mu litunga nimwalyo, ngonehe muntu akungulanga mangi anayumbiwi. Kowa hinge umo wakatwile mbando hinge kuyahama mukanwa kuntinisha.” 15 Kati kazembe, kakutwesha kupitakana ou wakatemeshanga ndi? Kati shaha yikutwesha kwikala na maleema kupitakana ou ukuyishahisha ndi? Lunyanzi kutwesha kuzipola ou unalukwata lufwako, hinge muwana kutwesha kukatula muntu wufwako. 16 Mwene, Nyambi wa Makunge, ukatuma wulweli, ukaletesha ngayi bakanzita bashuwe Baashiliya bayonde. Na mu nceto ya wuheti wendi, mundilo ukayibikiwa, ukenga mulangi wakulasheka. 17 Lumuni lwa Ishalela, lukafutuka mundilo, niye wa Kuyela wa Ishalela ukafutuka mulangi. Ha mutena umo tuhu, ukahokesha na kupelula mikona na mitwampuku. 18 Ukalobesha mashaka na mafuba a wilo nimwabyo, ngonehe wulweli wa wukalu wanongeshanga muntu. 19 Kukekala mitondo yayishe yikashala mu lishaka, hinge kanuke ukatwesha kuyilaba. Mashaliza nibo bakaboka 20 Ha mutena uyo, aba bakashalaho Baishalela na naba bakapuluka baka litala lya Yakobo, bafwako kukakinka mitima ha matunga owo abakomene, ngoboni bakakinka mitima mu kupwisha muli Nyambi ya Ngula, wa Kuyela wa Ishalela. 21 Mashaliza bakaboka, aba bakashalaho kuli Yakobo bakaboka kuli Nyambi Wangovu. 22 Hinge ndi bantu bobe, Baishalela hinge bakekala babengi ngonehe lihekelela lya ku liwate, mashaliza tuhu nibo bakaboka. Kunonga kunatatilili bantu, kami shinabafwanini. 23 Ndaba Mwene, Nyambi wa Makunge, uka shi tenda mu litunga nimwamo, ngonehe anashitoyo. Nyambi ya Ngula ukashushula Ashiliya 24 Nohobene Mwene, Nyambi wa Makunge ukwamba ku bantu bendi bazika mu Ziyoni ngayi, “Hinga mutina Baashiliya, oho ba kumipumpula na miwana na kumizipula na zinyanzi zabo ngonehe batendelenga Baengepita, 25 ndaba mu shikati shashishe tuhu kupilama kwami hahenu kukamana na wukali wami ukatukila hahabo mu kubanongesha.” 26 Nyambi wa Makunge ukabazipola na shiwepu ngonehe shiya akomene Mindiyani ku limanya lya Olemba. Ukakatwila muwana wendi ha liwate, ngonehe bene shiya atendele mu Engepita. 27 Kami ha mutena uya muziho wabo ukafumishiwa ha bifuzi byenu na mpongoho ha zincingo zenu, kami mpongoho yikapokozoka ndaba ya ku shuwa shikuma kwenu. Mukakukatukila mutakwe ukulwisha 28 Bamalamo ba kumakale ku Aliya, banapitakana Mingiloni na ku shiya biputu byabo ku Mikemashi, 29 bakiluka kale nzila ya ncinencine, banayi na kulanganina ku Ngemba, bantu bamu nkambe ya Lama, banazakama mitima zaka. Bantu bamu Ngimbiya nkambe ya mwene Shaulu banayi lubilo. 30 Obe mwana wa mbuyama wamu Ngalima, kaloka! Enu bantu bamu Laisha, yuvwililenu! Enu bantu bamu Anatoti, mu kumbulenu! 31 Bantu bamu Mandimena bali na kwituka na naba bekala mu Ngebima kushinga kwa kupulukila. 32 Mutena wa lelo bene bakanzita bakwimana mu nkambe ya Nombu, bakanyenkanishila zinkoni zabo ku shinkanda sha mwana wa mbuyama wa Ziyoni, ku shinkanda sha Yelushalema. 33 Monenu, Mwene, Nyambi wa Makunge ukatema myahi na ngovu za kutinisha, byabitali shikuma bikatemiwila hanci. Byabinene shikuma bikawishiwila hanci. 34 Ukatema bitondo mu mashaka na kazembe, pe bitondo byabiwahe bya Lembanoni bikawila hanci lyakata. |
Libuka Lya Kuyela © Bible Society of Zambia, 2020.
Bible Society of Zambia