Ishaya 1 - Libuka Lya Kuyela

¹ Shimono sha Ishaya mwana Amozi, eshe amonene ha Yunda na Yelushalema ha matena a Uziya na Yotamu na Ahazi na Hezekiya bamyene bamu Yunda.

Nyambi ya Ngula ukwambila bantu bendi

² Nyambi ya Ngula unamba ngayi, “Yuvwilila, obe liyilu, tengeka litu, obe hanci! Bana nalelele na kukulisha banamfutulukili.

³ Ngombe walimuka hekulyendi na mbongolo walimuka shililo oku alilanga hekulyendi, ngoboni Ishalela kulimuka hekulyendi ufwako, bantu bami ku yuvwishisha shimina bafwako.”

⁴ Makando tawee, enu matunga akutenda wubi, bantu balemanana na byabibi, bashihemwa shatendanga byabibi, bana baya batendanga bya ku bola! Munafutamini Nyambi ya Ngula, munakana wa Kuyela wa Ishalela, muna shintuluku na kuboka munyima.

⁵ Kati shumangani mushili kushinga ku shushuliwa kami? Shumangani mushili kwonzela kumfutulukila? Mutwe wobe ukukola na mutima wobe unapopo.

⁶ Ku balika ku ncinzino ya malyatilo kukakuma na ku mutwe, kowa kunakanguku shiwahe, ngoboni obe uli na mizizi na bitombo na bitombo bikutupula wufutu, bitombo byobe kutibiwa bifwako, hinge kumangiwa hinge ku boteshaho na mazi.

⁷ Litunga lyenu linafutuku lipembe na zinkena zinahokeshiwi. Mafuba wenu analobeshiwi ku bayeni nenu bamwine himumonako. Lyengakale hi lipembe.

⁸ Mwana Ziyoni wa mbuyama unashiyiwi ngo shilembalemba mu mfuba ya shinyanca, ngo shilawo mu mfuba ya mabwakaka, ngo munzi unazingulukiwi na bamalamo.

⁹ Shinga Nyambi wa Makunge wabulile kutu shiyilako mashaliza a bantu bamo, pe shinga twalobeshiwile ngonehe Shondoma na Ngomola.

¹⁰ Yuvwilila lizu lya Nyambi ya Ngula, obe Yelushalema. Batulela bobe banafweke ngo batulela bamu Shondoma! Tengekenu matu wenu muyuvwe kufundisha kwa Nyambi yetu, enu munafweke ngo bantu bamu Ngomola!

¹¹ Nyambi ya Ngula ukwamba ngayi, “Kati wingi wazinkombela zenu mu kukombelela kukwami nitendeshezo bishini? Nanyikwakale na nkombela ya bikungwe bya bambelele ba kuhokesha na mazi a bimuna bobe ba kushuwa. Mukeza wa bankunzi na bana babambelele na bikungwe bya bampongo, kungwahilisha bifwako

¹² oho mukwiza kukwami. Kati yani namitongweze ngayi mulyatangile mu binzanza byami?

¹³ Lehenu kuleta zintupu za kubula kuyavwa. Livumba lyaliwahe lya zinkombela zenu, lya kumengenyesha kukwami. Ami kwitabila nifwako na bimbo byenu bya kutelama kwa Ngonda na Mutena Wakukatala na bikungulukilo byenu ndaba bya mazilo.

¹⁴ Ninazimbi bimbo byenu bya kutelama kwa Ngonda na bimbo bya kuhatiwa. Byengakale muziho kukwami na kwangakale kubikulika.

¹⁵ “Oho mukemika maboko enu na kulombela, nikafumisha meho wami kukwenu. Hinge ndi mu kulombela malombelo amengi, nifwako kukamiyuvwilila, ndaba maboko enu ali na mukeza.

¹⁶ Yowelenu na kuliyelesha enu bamwine. Fumishenu biheka byabibi ku meho ami. Lehenu kutenda byabibi.

¹⁷ Lilongeshenu kutenda byabiwahe. Tendenu kuya na ndayano, kanishenu bakakuyandisha baminabo, lamwinenu banginga na kuyavwa byambo bya bamfwile.”

Nyambi ya Ngula ukushinga kulamwina bantu bendi

¹⁸ Nyambi ya Ngula ukwamba ngayi, “Haya yekenu twambole hamo. Hinge ndi wubi wenu ukwinga wakufubila ngo mukeza, ukatuba ngo mpemba. Hinge ndi wubi wenu ukwinga wakufubila ngo kapengele, ukatuba ngo wushako.

¹⁹ Ndi enu mukushinga na kwombatala, mukalya byabiwahe bya mu litunga.

²⁰ Ngoboni ndi mukwinga binkwange na bakakulwisha, mukanongeshiwa na mikwale. Ami, Nyambi ya Ngula ninamba.”

Lukena lwa wubi

²¹ Monenu eshe lunafutuku lukena lwa kwoloka lwa Yelushalema na kwinga wunjenge. Lwengile lukena lwa kukonka ndayano, kami kulunga kwekalile mu mwalwo. Ngoboni haya, muli tuhu bakakuziha.

²² Wengile ngonehe shiliva, ngoboni haya uli wowa. Wengile ngonehe waine ya shinyanca yayikali, ngoboni haya uli ngonehe mema.

²³ Batulela benu bengakale bakakufutulukila na bahoni ba bezi. Nimwabo bakushinga lizika kanwa na ku shokomena kutambula bishemo. Kwimanina banginga hinge kuyuvwilila bamfwile bafwako.

²⁴ Nohobene Mwene, Nyambi wa Makunge, Mwene wangovu wa Ishalela ukwamba ngayi, mwa shikuma nikatulila wukali wami ha bakankole na kubweshela ha bamalamo bami.

²⁵ Nikamishushula na liboko lyami na kumiyelesha ngonehe bayeleshanga wutale, pe nikafumisha mazilo wenu nimwawo.

²⁶ Nikapindula bakakuyata benu ngo baya mwekalilenga nabo mwaka. Bankongo benu bakafweka ngo baya mwekalilenga nabo ha kutatika. Nihoboni mukatoyiwa ngayi Lukena lwa Kwoloka, Lukena lwa Kulunga.

²⁷ Ziyoni ukakuliziwa ha kutenda bya kupwisha, pe baya bakatenguluka bakapuluka na kulunga.

²⁸ Ngoboni bakakumfutulukila na bakawubi bakalobeshiwa nimwabo hamo, pe aba ba kufutamina Nyambi ya Ngula bakanongeshiwa.

²⁹ Mukekala na lisheni mu bitondo bya shizila bya Oka mwakunine. Ebye mwawahililile mumwabyo, kami mukalihepa ha mafuba a bitondo bya miyombo mwahatile.

³⁰ Mukalebuka ngonehe alebukanga mabizi a mutondo wa Oka, mukayuma ngonehe mfuba ya kubula mema.

³¹ Bakangovu bakafutuka ngo ntende na milimo yabo yayibi yikafutuka ngo hahe. Wubili wabyo ntende na hahe bikahokela hamo, kowa muntu ukawuzima.