Hoshiya 9 - Libuka Lya Kuyela

Hoshiya ukubilikiza kushushula kwa Baishalela

¹ Obe Ishalela, hinga wuwahilila. Ulishamba ngo bantu ba matunga ashenge, ndaba unatende lwiholwiho na kukana Nyambi yobe. Obe unahaka kulemesha banyambi bashenge ku mapulilo nimwao a mpeka.

² Ha makotwelo naha mazongelo kukalisha afwako, pe kukabula waine yayipya.

³ Kukekala mu litunga lya Nyambi ya Ngula bafwako, ngoboni Efulemu ukaboka ku Engepita, pe bakalyanga byakulya bya shizila mu Ashiliya.

⁴ Kukapana waine ya mwitililo kuli Nyambi ya Ngula bafwako. Kukamuwahilisha ku mutima na zinkombela zabo bafwako. Byakulya byabo ba kulya bikababipisha bikafweka ngo byakulya bya ha malila, ndaba byakulya byabo bikenga tuhu byakulya kumanisha nzala. Kukatwaliwa mu litala lya Nyambi ya Ngula bifwako.

⁵ Haya ukenga nahiti ha mutena wa shimbo sha kwimikiwa, naha mutena wa mayambwayambwa a Nyambi ya Ngula.

⁶ Hinge ndi bakatina kuloba, Engepita ukaba kungulula na Memfwishi ukabafunda. Mutwampuku ukamena haya hekalile shiliva, na mihongela yikamena mu zintanda zabo.

⁷ Matena akashushwilo anakumu, matena akubabweshela anakumu. Ishalela ukalimukasho. Ndaba ya wubi wenu wawunene na nzimbo mukwamba ngayi, “Muluwe wa Nyambi unengi wakuyeba, muntu wa moyo unapempele.”

⁸ Nyambi niye nantumu kwinga muluwe kukeyesha bantu ba Efulemu. Hinge noho oku nikuya nimwako mu kumanyika ngo kayoni mu litunga lya Nyambi, ngoboni bantu nibo bamalamo babamiluwe.

⁹ Banalibipishi shikuma nibo bamwine, ngonehe shatendiwile ku Ngimbiya, ukanuka wubi wabo na ku bashushulilawo.

Wubi wa Ishalela na ku shushuliwa kwendi

¹⁰ Nyambi ya Ngula ngayi, “Nawanine Ishalela ngo mukolobozi wa shinyanca mu libelelengwa. Wafwekele ngo mukabo wakutatika ku mutondo wa mukuyu. Ha mwanya wawo wakutatika namonene batatizenu. Ngoboni bayile ku Mbaalu waku Peyola, balifungwilile nibo bamwine ku Mbaalu. Pe bengile ba wunyengwe ngo obyo byuma bahakile.

¹¹ Maleema a Efulemu akatuka kufweka ngonehe kayoni, kowa ukabeleka, kowa ukakiluka ngonda, kowa ukemita.

¹² Hinge ndi bakalela bana nikabayangabo, kukabula hinge umo wakushalako. Makando wabo oho nikafuma kukwabo.”

¹³ Namono Efulemu, ngonehe Tile, hinga ba kuniwa mu mwanya wawuwahe. Ngoboni Efulemu ukutwala bana bendi babalume ngayi bakazihiwe.

¹⁴ Obe Nyambi ya Ngula, bapane. Kati ukabapana bishini? Bapane mavumo akufwashangila na kuyuma mu mabele.

Kuyata kwa Nyambi ya Ngula ha Ishalela

¹⁵ Nyambi ya Ngula ngayi, “Mu Ngilingale nimo muli byabibi byabo byabingi, nimwawo natatikile ku bazimba. Ndaba ya kuluwa kwa ntendelo yabo, nikabatanda mu litunga lyami. Kukabahaka kami nifwako nihani, babilolo nimwabo banengi bakakufutulukila.

¹⁶ Efulemu unandiwi, mipishi yabo yinayumu kukayima kami mikabo yifwako. Hinge ndi bakayima mikabo, nikaziha bana babo baya bahaka.”

Muluwe wa Nyambi ya Ngula ukwamba ha bya Ishalela

¹⁷ Nyambi yami ukabayumba polyo, ndaba babulile kumwombatala, bakenga mapukwenda mukati ka matunga.