Hoshiya 8 - Libuka Lya Kuyela

Nyambi ya Ngula ukunyanca Ishalela ha kulemesha tunankishi

¹ Nyambi ya Ngula ngayi, “Shiba mpandula yobe, ndaba kamalamo ukwiza ngonehe ngonga ha litala lya Nyambi ya Ngula, ndaba banakiluku kulimama kwami na kufutulukila mazu wami.

² Ishalela ukukalokela kukwami ngayi, ‘Obe Nyambi yetu, twa kulimuka.’

³ Ngoboni Baishalela banakana byabiwahe, ndaba bamalamo bakaya na kumukonka.

⁴ “Bakuyaka bamyene kwakubula Ami kubetabilisha, ba kuhata batulela kwakubula Ami kulimuka. Batendele tunankishi ha shiliva na ngolinde, mukulilobesha kwabo nibo bamwine.

⁵ Nazimba kanankishi ka ngombe, kaya bakulemesha bantu ba ku Shamaliya. Nabapilamini shikuma. Kati kukapita shikati sha kukuma hati ngayi balehe kulemesha tunankishi twabo?

⁶ Kaya kanankishi kaliha kengile Nyambi. Muntu wa wutungu wafumine ku Ishalela niye wakatendele. Kaya kanankishi kaku Shamaliya kakacancoliwa.

⁷ “Baishalela ba kubile mpepo, pe bakateza kakundukundu. Mowa mpeka mu lutende lwa kwimana. Kukayima byakulya lufwako, hinge ndi lukayima bayeni bakalulya.

⁸ Ishalela unaminiwi haya uli mukati ka matunga anafweke ngo shuma showa.

⁹ Ngonehe mbongolo wa lishaka uli mumufuno, bantu ba Efulemu banayi ku Ashiliya. Banatende lwiholwiho ku bantu babengi shikuma.

¹⁰ Hinge ndi banayi na kuloba ba shikonzi babo mukati ka matunga, wuluno niye na ku ba kungwila hamo na kubashushula. Pe bakatatika kunanga kanikani. Kukuyandishiwa kwa mwene wa ngovu waku Ashiliya.

¹¹ “Efulemu wavulishakale tuula twa kufumisha wubi, ngoboni oto tuula twafutukakale twa kutendela wubi.

¹² Hinge ndi namutikitila ndayano zami zazingizingi, ngoboni uli na kukana. Zikuwaniwa ngo zinengi za shiyeni.

¹³ Bahaka zinkombela ba kukombelela nyama pe hiba kulya nyama ya nkombela, ngoboni Nyambi ya Ngula ku wahilila nabyo ufwako. Haya ukanuka wubi wabo na kubashushula, pe bakaboka ku Engepita.

¹⁴ “Ishalela na lizikili misheke yayinene na kuvulama Shakalenga wendi. Yunda unavulishi minzi ya bipata. Ngoboni nikatuma mundilo ha minzi yendi, pe ukahokesha bipata byendi.”