Hoshiya 7 - Libuka Lya Kuyela

¹ “Oho nikushinga ku nyongomanisha bantu bami ba Ishalela, wubi wa Efulemu ukuholoka, hamo na wubi wa Shamaliya, ndaba benga bakakwongeza, mwizi ukuyiba mu litala, tupondwa tu ku belamina bantu mu zinzila.

² Ngoboni bafwako kuhanganika ngayi nanuka milimo yabo nimwayo yayibi. Wuluno wubi wabo una zinguluku ku meho ami.”

Kubebiwa kwa Mwene

³ Nyambi ya Ngula ngayi, “Bantu bababi bakwongeza mwene na babilolo bendi na biyongola byabibi.

⁴ Nimwabo aba bakubula kwoloka, nzimbo yabo yinengi ngo shivulu shinabeye shikuma, ou mukakuvuba mankende a kubula kutwesha kupembezela, hantu noho muvuba wa linkende unatunduluku.

⁵ Ha mutena wa mayambwayambwa a mwene, niye hamo na babilolo bendi babakolweshele shikuma, pe mwene watatikile kwinga wuncengwe na bantu.

⁶ Mitima yabo yengile ya kuhoka ngo shivulu. Wushiku nimwawo, wukali wabo wakakumukilenga ngo wishe, pe kulumenemene wukali wabo wa bangilenga ngo mundilo.

⁷ Bantu bababi bazihile bantwamina babo. Bamyene zabo nimwabo babazihile umo na wamina kuli konkashana, ngoboni kowa kukwabo wakulilila kukwami ngayi nibayavwe.”

Ishalela na matunga amina

⁸ Nyambi ya Ngula ngayi, “Efulemu nalifungili na bantu bashenge. Wengakale ngo linkende linahoko mbalila yimo.

⁹ Mapukwenda ba kumuyangula ngovu zendi niye hinga abula kulimuka wakulakale ni nzimvwi ku mutwe too, ngoboni kulimuka noho ufwako.

¹⁰ Kuliyemeza kwa Ishalela kukumupaka niye mwine, ngoboni kuboka kukwami Ami Nyambi ya Ngula, Nyambi yabo bafwako, hinge tuhu ku mushingashinga ndaba yanebye nimwabyo bafwako.

¹¹ Efulemu nengi ngo nkilimba wakuyeba wakubula ngana, ukwihana Engepita na kwitukila ku Ashiliya.

¹² Oho bakuya nikatandubwila kanyanzi kami hahabo na kubabwesha ngo tuyoni twa muyilu, nikabashushula ndaba ya wubi wabo.

¹³ “Makando kukwabo ndaba ya kulifumisha kukwami. Bakazihiwa ndaba banamfutulukili. Nashingile ku balamwina ngoboni bakwamba mahalo kukwami.

¹⁴ Bafwako kundambilila na mitima yabo nimwayo, ngoboni hinga bekala ha malili abo. Bakulilemeka ngo bakalitunga ndaba ya kushinga byakulya na bya kunwa, ngoboni ba kumfutulukila.

¹⁵ Hinge ndi nabalongeshele na kushumisha maboko abo, ngoboni ba kuyongola bya nkole hahami.

¹⁶ Banabokele kulemesha nyambi wakubula ngovu. Banengi ngo shipando sha mukunzi shinatentebele. Babilolo babo bakawa ku mukwale, ndaba ya lihandu lya zindimi zabo. Ndaba yanebye bantu ba mu Engepita baka bahepa.”