Hoshiya 6 - Libuka Lya Kuyela

Kutenguluka kwa bantu kwa kubula kupwisha

¹ Bantu bakwamba ngayi, “Yekenu, tuboke kuli Nyambi ya Ngula. Hinge ndi niye unatucancozolo, pe niye ukatunyongomanisha, hinge ndi unatulemeke niye ukatupomba ha bitombo.

² Kunyima ya matena abili, ukatunyongomanisha. Ha mutena wa wuhatu, uka tupindula, ngayi twikale kumbili yendi.

³ Tulilongeshenu kulimuka Nyambi ya Ngula, tuzaminenu kumulimuka mwa shikuma. Nyambi ukamoneka, ngo kututika kwa mutena, ukeza kukwetu ngo mvula wa mpepo, ngonehe mvula wa muvumbi ukulokela hanci.”

⁴ Nyambi ya Ngula ukwamba ngayi, “Nikakwinga nahiti, obe Efulemu. Nikakwinga nahiti, obe Yunda. Ndaba shishemo shobe shikwinga ngo mbundu ya lumenemene na mume watukanga wanguwangu.

⁵ Nohobene natumu bamiluwe bami kukwenu na mazu akuyata na kulobesha, ebye nikushinga kukwenu bya wangu kami binayuvwaniki.

⁶ Nashinga nceshe, kaliha nkombela. Nikushinga ngayi bantu balimuke Ami Nyambi kupitakana zinkombela za kuhokesha.

⁷ “Ngoboni nehe Andama, banapokolo kulimama, bengile bakubula kwoloka kukwami.

⁸ Ngiliyande lukena lwa bantu bababi na bakakuziha.

⁹ Ngonehe tupondwa bakubelamina muntu, nisho shili ni muhoko wa bakankombela. Bakubonda bantu mu nzila ya kuya ku Shekemu. Nohobene ba kutenda milandu ya wukelemi.

¹⁰ Namono shuma sha kukomokesha mu litala lya Ishalela. Efulemu ukulipana ku lwiholwiho na Ishalela ukulibipisha.

¹¹ Obe Yunda ninemiki shikati sha kukushushula, ndaba yanebye wakutenda.”