Hoshiya 5 - Libuka Lya Kuyela

¹ Yuvwililenu eshe, enu bakankombela. Nanenu bantu ba Ishalela, yuvwililenu. Enu ba litala lya mwene, tengekenu matu. Kuyata kunakundama kukwenu, ndaba mwengile shipukalisho ku Mizipa, pe kanyanzi kana tandubuliwi ha Tambola.

² Munakaba linkwina lya kunonka ngayi mubakwatile ku Shitimu, ngoboni nikamikeyesha nimwenu.

³ Nikulimuka Efulemu pe Ishalela kuholama kukwami ufwako, ndaba haya, obe Ishalela unatende lwiholwiho, obe Ishalela unalibipishi.

Hoshiya ukushiwulula bantu ha kulemesha tunankishi

⁴ Ntendelo yabo kubetabilisha kuboka kuli Nyambi yabo yifwako. Ndaba moyo walwiholwiho ushili mu mitima yabo, pe kami kulimuka Nyambi ya Ngula bafwako.

⁵ Kuliyemeza kwa Ishalela kwalete wupaki ku meho wendi niyemwine, pe Efulemu ukapukala ha mulandu wendi. Yunda kami ukapukala hamo nabo.

⁶ Bakaya hamo na matanga abo a bambelele nanawa a zingombe na kushinga Nyambi ya Ngula ngoboni kukamuwana bafwako, ndaba unafumu kukwabo.

⁷ Banabipishili Nyambi ya Ngula ha kubula kukulupila. Ndaba banabeleke bana bamu wunjenge. Haya mu ngonda wamupya bakalobeshiwa hamo na mafuba wabo.

Nzita mukati ka Yunda na Ishalela

⁸ Shibenu mpeta mu Ngimbiya, shibenu mpandula mu Lama. Bilikenu mu Mbeti Abeni ngayi, nyoho, obe Mbenjamani.

⁹ Efulemu ukafutuka lipembe ha mutena wa kashushwilo namba kupwisha mukati ka mishobo ya Ishalela.

¹⁰ Babilolo bamu Yunda banafweke ngo baya banahenyeshe nginza ya litunga, nikayitila wukali wami hahabo ngonehe mema.

¹¹ Efulemu uli na kuyandishiwa, pe banamunyomweshe ha kuyatishiwa, ndaba washinga kulemesha tunankishi.

¹² Nohobene kuli Efulemu nengakale ngo kanzembule, nengakale ngo lishenze ku bantu ba Yunda.

¹³ Oho Efulemu amonene malweli wendi na Yunda oho amonene bitombo byendi niho Ishalela ayile ku Ashiliya, pe watumine ntumwana kuli mwene wamunene ngoboni kaliha watweshele kukupanga hinge kukupolesha.

¹⁴ Ndaba ya neshe nikenga ngo shimbwi kuli Efulemu, kami nikenga ngo shimbwi wamukali ku litala lya Yunda. Nikabashanyozola pe hinikaya, nikabatwala kami kowa muntu ukabalamwina.

¹⁵ Nikabafutamina bantu bami, hantu banayanda shikuma ndaba ya wubi wabo. Bakabokela kukwami na kuncingancinga kampe mu makalikiza wabo bakangwana.