Hoshiya 14 - Libuka Lya Kuyela

Hoshiya ukulombelela Ishalela

¹ Obe Ishalela boka kuli Nyambi ya Ngula, Nyambi yobe, ndaba unapukala ha kuluwa kwobe.

² Bokenu kuli Nyambi ya Ngula kami ntupu yenu mulombele ngayi, “Tuyatile ku wubi wetu nimwawo, tambula malombelo wetu, pe tuka kuyemeza na mazu akukambilila.

³ Ashiliya kukatulamwina ufwako, kukandama bambishi tufwako, pe kami kukaboka kutunankishi tunatende tufwako na kutwihana ngayi Nyambi, ndaba mumwobe nimo banginga ba kuwana nceshe.”

Nyambi ya Ngula ukukulupisha wumi wa wupya kuli Ishalela

⁴ Nyambi ya Ngula ngayi, “Nikamanisha kubula kukulupila kwabo, nikabahaka na kushinga kwa mutima wami, ndaba na shintululu wukali wami ku kwabo.

⁵ Nikafweka ngo mume ku Ishalela, ukatama ngo liyangayanga. Mipishi yikahalaba ngo mutondo wa shinda wa Lembanoni.

⁶ Myahi yendi yikakula, wuwahe wendi ukafweka ngo mutondo wa olive, pe livumba lyendi ngo shinda waku Lembanoni.

⁷ Bakaboka na kuzika mu mumvulu wami, bakatangama ngo mafuba a mpeka. Bakahengula ngo mukolobozi wa shinyanca. Livumo lyabo likenga ngo waine yaku Lembanoni.

⁸ Enu bantu ba Efulemu shiyenu tunankishi. Ami na kumbulanga malombelo wenu na kumi lama. Ninafweke ngo mutondo wa mupaini wakubombola. Kukwami nikwo kukufuma mikabo yenu nimwayo.”

Bya kukumininako

⁹ Nimwendi wangana, ayuvwishishe byuma ebye. Mukaku yuvwishisha abilame ndaba zinzila za Nyambi ya Ngula za kwoloka, pe bakwoloka bakwendamo, ngoboni bakawubi bakapukazalamo.