Hoshiya 13 - Libuka Lya Kuyela

Nyatilo ya mamanino ya ha Ishalela

¹ Oho Efulemu ambile, bantu bakankile, bamutumbalalisha mu Ishalela. Ngoboni wawanine mulandu wakulemesha Mbaalu pe wafwile.

² Nihano bashili kutenda wubi, banatende tunankishi twa kuyungulula ha shiliva. Tunankishi tunatendiwi na bantungu bakwamba ngayi, “Tupulenu zinkombela kukwabo, lemeshenu tunankishi twa bana ba zingombe pe mutuzupezupe.”

³ Nohobene bakafweka ngo mbundu ya lumenemene, hinge ngo mume ukukuhuka wangu, bakafweka ngo muzungu ukupepuka na mpepo ku likotwelo, hinge ngonehe wishe ukututikila mu limpananga.

⁴ Nyambi ya Ngula ngayi, “Ami Nyambi ya Ngula Nyambi yenu namifumishile ku Engepita. Mufwaye Nyambi wamina ndele Ami mupulwishi wenu.

⁵ Ami namilamine mu libelelengwa mu litunga lya nyuminine.

⁶ Ngoboni oho balile na kwikuta, mitima yabo yaliyemezele nohobene bamvulamine.

⁷ Pe haya nikenga ngonehe shimbwi kukwabo, nika babelamina ku nkumo ngonehe kampulu,

⁸ Nikabalwisha ngo Mbeya banayanga bana bendi, nikabatabula tupumpo na ku bavota ngonehe shimbwi, nikabashanyola ngonehe kayamana wa mu lishaka.

⁹ “Obe Ishalela, nika kulobesha. Yani ukatwesha ku kuyavwa?

¹⁰ Haya mwene yobe uli kuti wakukupulwisha? Babilolo bobe nimwabo ba kukulamwina haya balikuti? Baya watoyele ngayi, ‘Mpanenu mwene na babilolo?’

¹¹ Mu kupilama kwami namipile mwene, pe namufumishileho mu wukali wami.

¹² Mulandu wa Efulemu unamangiwi hamo, wubi wendi banawukoweze.

¹³ Makando akufweka ngo aya mbuyama amonanga ha kubeleka akabawana. Bafwanina kupuluka ngoboni bakufweka ngo mwana wakubula ngana, ukubula kushinga kuhemuwa ha shikati shendi ndi shinakumu.

¹⁴ Kati niba kulize ku ngovu za shinzimbi ndi? Kati niba kulize ku bafu ndi? Obe lufu, wukali wobe uli kuti? Obe shinzimbi kulobesha kwobe kuli kuti? Nceshe zikaholama ku meho wami.

¹⁵ Hinge ndi Ishalela ukatangama hakati ka bawushinda wendi ngonehe matete, mpepo yaku mushamuko, mpepo ya Nyambi ya Ngula yikeza, yikafuminina mu libelelengwa. Kami mashima wendi akayuma nkwaa na tuheloke twendi tukazika, elye linkwananga likabwesha munyima wuheti wendi na byuma byabiwahe nimwabyo.

¹⁶ Shamaliya ukawana mulandu wendi ndaba unafutukili Nyambi yendi. Bakazihiwa na mpoko ya mukwale, bana babo babashe bakabashanyozola. Bakazabo bakamavumo bakabalosholamo bana.”