Hoshiya 11 - Libuka Lya Kuyela

Shishemo sha Nyambi ya Ngula ku bantu bendi bakakufutulukila

¹ Nyambi ya Ngula ngayi, “Oho Ishalela ashili kanuke na muhakile. Mwanami namwihanine ngayi afume mu Engepita.

² Ha kubehana bafumine kukwami na kuya na kukombelela ba Mbaalu kuhokesha incence ku tunankishi twabo.

³ Ami nalongeshele baka Efulemu kwenda, na bakwatile mu maboko Ami. Ngoboni kaliha bandimukile ngayi Ami na banyongomanishile.

⁴ Na batwamininine na nyimbwa za shikeketima, na maboko a shishemo. Nengile ngo umo wa ncencununanga mpongoho ku mimbanga yabo, pe na nyongamine na ku balisha.

⁵ “Bakabokela ku litunga lya Engepita, pe Ashiliya ukenga mwene yabo, ndaba banakana kutengulukila kukwami.

⁶ Mukwale ukalwisha zinkena zabo, ukavutula tupatisho twa mapangati abo na kunongesha bantu ba kubela kwa mahalo.

⁷ Bantu bami bonzela kufuma kukwami, haya hinge ndi bakehana kukwendi, kuka bayuvwa ufwako.

⁸ Nikukuleha nahiti obe Efulemu? Nikukuyumbila nahiti ku bamalamo Obe Ishalela? Nikutwesha nahiti ku kutenda ngonehi natendele Andima? Nikutwesha nahiti kumitenda ngonehi natendele Zemboyima? Mutima wami wabokamokale, shikeketima shami shinanenehe.

⁹ Nifwako kutenda omu munayili wukali wakupilama kwami, nifwako kukalobesha Efulemu kami, ndaba Ami Nyambi, kaliha ngayi nili muntu. Ami wa Kuyela nili mukati kenu, pe nifwako kukeza kukwenu na kupilama.

¹⁰ “Bantu bami baka nkonka, oho nikubuluma ngo shimbwi. Oho nikubuluma, bana bami bakeza kufuma ku mponci na kukanka.

¹¹ Bakeza na kukanka nehi tuyoni twa Engepita, kami nehi matela aku Ashiliya. Nikababwesha ku minzi yabo kami. Eshe nisho anamba Nyambi ya Ngula.

Ishalela na Yunda banayatiwi

¹² Nyambi ya Ngula ngayi, “Bantu ba Efulemu bananzinguluku na mahalo na kwongeza, ngoboni bantu ba Yunda bakwenda na Nyambi nakwinga bakukulupila ku ba kuyela. Ami Nyambi Wakwoloka na kuyela.”