Hoshiya 1 - Libuka Lya Kuyela

¹ Ha shikati sha kulela kwa mwene Uziya na Yotamu na Ahazi na Hezekiya mu Yunda, na shikati sha kulela kwa mwene Yelombowami, mwana Yowashi mu Ishalela, lizu lya Nyambi ya Ngula lyezile kuli muluwe Hoshiya mwana Mbeeli.

Mukaza Hoshiya na bana bendi

² Awa niwo mazu a kutatika Nyambi ya Ngula atongwezele Hoshiya ngayi, “Yanga ukaliyekele mbuyama, ukatenda bya lwiholwiho na bana bobe bakamufweka, mu ntendelo yimo bantu bami banatende bya lwiholwiho na kumfutulukila Ami Nyambi ya Ngula.”

³ Hoshiya wayekele Ngomela mwana Ndimbulayimu, pe wemitile na kubeleka mwana wa mulume.

⁴ Nyambi ya Ngula wambile kuli Hoshiya ngayi, “Mutumbe ngayi, ‘Yezilelu’ ndaba mu shikati shashishe, nikashushula litala lya Yehu ndaba ya mukeza wa bantu bamu Yezilela pe nikamanisha wene wa litala lya Ishalela.

⁵ Kami ha mutena uyo nikamungula shipando sha mukunzi sha Ishalela mu mukulo wa Yezilelu.”

⁶ Ngomela wemitile kami, pe wabelekele mwana wa mbuyama. Nyambi ya Ngula watongwezele Hoshiya ngayi, “Mutumbe ngayi, ‘Lo Luhama’ —Wakubula kuhakiwa—ndaba kukayuvwila nceshe litala lya Ishalela na kuliyatila nifwako.

⁷ Ngoboni nikayuvwila nceshe litala lya Yunda, pe Nyambi ya Ngula, Nyambi yabo ukabalamwina. Kami nifwako kuka balamwina na shipando sha mukunzi hinge na mukwale hinge na nzita hinge na bambishi hinge na bakakukandama ha bambishi.”

⁸ Oho ahumwine Lo Luhama, wemitile kami na kubeleka mwana wa mulume.

⁹ Nyambi ya Ngula wamutongwezele Hoshiya ngayi, “Mutumbe lizina lya, ‘Lo Ammi’ —Kaliha bantu bami—ndaba kaliha muli bantu bami, kami kaliha nili Nyambi yenu.”

Ishalela ukaboka

¹⁰ Ngoboni bantu ba Ishalela bakenga ngo lihekelela lya mu liwate, olyo likubula kupimiwa hinge kulabiwa. Niho nyambilo ya kwamba ngayi, “Kaliha muli bantu bami” yikafutuka na kwamba ngayi, “Bana ba Nyambi wakuyoya.”

¹¹ Bantu ba Yunda na bantu ba Ishalela bakabakungulwila hamo. Bakalihatila ntwamina umo, pe bakafuma mu litunga liyo, ndaba mutena wa Yezilelu ukenga mutena wa wunene.