Hangayi 2 - Libuka Lya Kuyela

Wuwahe wa Litala lya Nyambi Lyalipya

¹ Ha mutena wa 21 wa ngonda ya mutanu na yibili mu mwaka wawubili wakulela mwene Ndaliyashi, lizu lya Nyambi ya Ngula lyezile muli muluwe Hangayi,

² Wuluno ambila Zelumbambelu mwana Shelatiyele kalela wa Yunda na Yoshuwa mwana Yehozandaki Mukulwane wa bakankombela nimwabo na bantu nimwabo banaboko mu wuntapwa ngayi,

³ “Yani na shalaho hakati kenu ou wamonene wuwahe wa nelye Litala mwaka? Haya muli na kulimona nahiti? Kati ku moneka kwinga shuma showa ku meho wenu lifwako ndi?

⁴ Ngoboni haya kanca obe Zelumbambelu, nisho akwamba Nyambi ya Ngula, kanca obe Yoshuwa mwana Yehozandaki, Mukulwane wa bakankombela nimwabo, kancenu nimwenu enu bantu ba mu litunga, tendenu, ndaba nili hamo nanenu, nisho anamba Nyambi wa Makunge.

⁵ Kwezekesha ku bikulupisho namikulupishile oho mwafumine mu Engepita, hinga mutina moyo wami uli mumwenu.

⁶ “Ndaba nisho anamba Nyambi wa Makunge ngayi, kashikati kakashe tuhu, wuluno nikanyenkanisha mayilu na hanci na liwate na litunga.

⁷ Pe nikanyenkanisha matunga nimwawo, ngayi zimfuma za wuheti wa matunga nimwawo ukeze, pe nikenzalisha elye litala na wuwahe, nisho anamba Nyambi wa Makunge.

⁸ Shiliva yenga yami na ngolinde yenga yami, nisho anamba Nyambi wa Makunge.

⁹ Wuwahe wakumbili wa litala elye ukapitakana wuwahe walyo wa kunyima, nisho anamba Nyambi wa Makunge, ngayi mu mwanya omwe nimo eze nikayake ku mwena.”

Bantu bakatangama oho litala lya Nyambi lya kamana

¹⁰ Ha mutena wa 24 wa ngonda ya mutanu na yinaa, mu mwaka wawubili wa mwene Ndaliyashi, lizu lya Nyambi ya Ngula lyezile muli muluwe Hangayi ngayi,

¹¹ “Eshe nisho anamba Nyambi wa Makunge ngayi, yipula bakankombela elye liyipu,

¹² ‘ndi muntu ukushimbila nyama ya kuyela mu shivwalo shendi, pe ha ku kuntula ku mankende hinge mashiha hinge mikabo ya shinyanca hinge ku waine hinge ku mazi a olive hinge byakulya bya mushobo ngani, kati ebye byakulya bikenga bya kuyela ndi?’” Bakankombela bakumbwile ngayi, “Byo.”

¹³ Niho Hangayi epwile ngayi, “Ndi muntu ukubula kwinga wa kuyela na ndaba ya kukwata mutuntu wa muntu wakufwa na kukwata shimo kunebye, kati ebye byakulya bikenga bya kubula kuyela ndi?” Bakankombela bakumbwile ngayi, “Bikwinga bya kubula kuyela.”

¹⁴ Niho Hangayi akumbwile ngayi, “Nisho shili nanaba bantu na nelye litunga ku meho wami, Ami Nyambi ya Ngula, pe mulimo wa maboko abo na zintupu bakutupula kuyo zinengi za kubula kuyela.

¹⁵ “Haya lombenu, hanganikenu ebye bikamizilila kufuma mutena wa lelo na kuya kumbili. Oho shilolo mushampike limanya hayilu yaminalyo limanya ha kutenda Litala lya Nyambi ya Ngula

¹⁶ mwengile nahiti? Mu matena nimwawo oho muntu ayile ku shishete sha byakulya oku kwafwaninine kufuma zintumba makumi abili, ngoboni hafumine tuhu likumi limo, kami muntu oho ayile ku shizongelo sha waine omo mwa fwaninine kufuma bitubo makumi mutanu, ngoboni mwafumine tuhu makumi abili.

¹⁷ Nalobeshelenga milimo ya maboko wenu na wulweli na mvunyenye na mvula wa mamanya, ngoboni kaliha mwatengulukilile ku kwami, nisho anamba Nyambi ya Ngula.

¹⁸ Hanganikenu kufuma ku mutena wa lelo na kuya kumbili ngayi, kufuma ha mutena wa 24 ya ngonda ya mutanu na yinaa. Hanganikenu shiwahe kufuma mutena uyo mwimbi wa Litala lya Nyambi ya Ngula wazikiwile.

¹⁹ Hanganikenu shiwahe, kati kushili mbuto mu shishete ndi? Kukuma ku mutena wa lelo mikolobozi ya shinyanca na nkuyu na manzenze na mutondo wa mazi a olive bifwako kuyima mikabo. Kufuma ku mutena wa lelo nikamitandalisha.”

Shikulupisho sha Nyambi ya Ngula kuli Zelumbambelu

²⁰ Lizu lya Nyambi ya Ngula lyezile kawubili kuli Hangayi ha mutena wa 24 wa ngonda ngayi,

²¹ “Tongweza Zelumbambelu kalela wa mu Yunda ngayi, haya nikanyenkanisha mayilu na hanci.

²² Nikawisha matanda a wene na kulobesha ngovu za wene wa matunga a bantu na kuziha makoloyi na bantu bakwendamo na bambishi, hamo nanobo bakandamangaho nimwabo bakaliziha umo na wamina na mikwale.

²³ Nyambi ya Ngula, Nyambi wa Makunge ukwamba ngayi, ha mutena uyo nikashimba obe Zelumbambelu mukamulimo wami mwana Shelatiyele na kukufutula kwinga limango lya kambalamunwe, ndaba Ami na kuhata, nisho anamba Nyambi wa Makunge.”