Hangayi 1 - Libuka Lya Kuyela

Muluwe wa Nyambi ukutongweza bakankombela

¹ Ha mutena wakutatika, wa ngonda ya mutanu na yimo, ya mwaka wawubili wa mwene Ndaliyashi, Nyambi ya Ngula wambilile muli muluwe Hangayi bya Zelumbambelu mwana Shelatiyele, ou wengile kalela wa mu Yunda na Yoshuwa mwana Yehozandaki, ou wengile Mukulwane wa bakankombela nimwabo.

² Eshe nisho akwamba Nyambi ya Ngula, Nyambi wa Makunge ngayi, “Aba bantu bakwamba ngayi shikati sha kutendulula Litala lya Nyambi ya Ngula shilolo shikume.”

³ Lizu lya Nyambi ya Ngula lyambile kuli muluwe wa Nyambi Hangayi ngayi,

⁴ “Kati shinengi sha kufwanina enu kwikala mu matala wenu akufwika namalenge, oho Litala lya Nyambi elye hinga lya nyemuka ndi?

⁵ Haya Nyambi wa Makunge ukwamba ngayi, hanganikenu ha zinzila zenu.

⁶ Mwa kunine mbuto yayingi, ngoboni munateze byabishe, mu kulya, ngoboni kwikuta mufwako, mu kunwa, ngoboni linyontwa kumana lifwako, mu kuvwala, ngoboni kuyuvwa kutukuma mufwako, mukamulimo ukutambula mali, ngoboni ukuyaka mu shipawupawu sha matubwa.

⁷ “Haya Nyambi wa Makunge ukwamba ngayi, hanganikenu ha zinzila zenu.

⁸ Nyambi ya Ngula ukwamba ngayi kankalalenu ku mapili mukalete bishimi bya kuzikisha litala lyami, ngayi mwanga lingwahilishe kami mwanga niholoke mu wuwahe wami, Eshe nisho akwamba Nyambi ya Ngula.

⁹ “Mwakulupila kutezela hahanene, ngoboni mwateza byabishe. Oho mwabileta ku munzi na bipepula na mu ku. Haya Nyambi wa Makunge ukwipula ngayi, shumangani shikuletesha ebye nimwabyo? Ndaba ya litala lyami liya linashiwuku, enuboni, muntu na muntu nakalamana na kulitendela litala lyendi niyemwine.

¹⁰ Nohobene haya ndaba yanenu mayilu ayumishakale mume, ni hanci hanakana kumenesha mbuto.

¹¹ Ninalete linanga ha mafuba naha binkanda, naha mafuba a byakulya na mafuba a mikabo ya shinyanca na mitondo bya mazi a olive, naha mbuto nimwayo kumena mu limvu, ku bantu naku tuyamana nimwato na ha byuma nimwabyo obyo mukezeka ku shanga.”

Bantu Bakwombatala Ndayano

¹² Niho ba Zelumbambelu mwana Shelatiyele wa mulume na Yoshuwa mwana Yehozandaki Mukulwane wa bakankombela nimwabo, hamo na bantu bamina bombatalile lizu lya Nyambi ya Ngula, Nyambi yabo na mazu a muluwe Hangayi ou Nyambi atumine, bantu batinine Nyambi ya Ngula.

¹³ Niho Hangayi, ntumwana wa Nyambi ya Ngula atongwezele bantu elye lizu lya Nyambi ya Ngula ngayi, “Nili hamo nanenu, nisho anamba Nyambi ya Ngula.”

¹⁴ Niho Nyambi ya Ngula apindwile mutima wa Zelumbambelu, mwana Shelatiyele wengile kalela wa mu Yunda na Yoshuwa, mwana Yehozandaki ou wengile Mukulwane wa bakankombela nimwabo na mitima ya bantu nimwabo babokele kufuma mu wuntapwa, pe bakungulukile mukutenda Litala lya Nyambi wa Makunge, Nyambi yabo,

¹⁵ ebye byatatikile ha mutena wa 24 ya ngonda ya mutanu na yimo. Mu mwaka wawubili wakulela kwa mwene wamunene Ndaliyashi.