Hambakuki 3 - Libuka Lya Kuyela

Lilombelo lya Hambakuki

¹ Lilombelo lya muluwe wa Nyambi Hambakuki kuya na lwimbo lwa Shingiyonoti.

² Obe Nyambi ya Ngula nayuvwu mpupo yobe, nili na bowa, obe Nyambi ya Ngula ha milimo yobe. Haya yipindule kami mukati ka myaka yetu, mukati kayino myaka yikwayanishe, winge wa nceshe hingebene unapilama.

³ Nyambi wafumine ku Temani, ou wa Kuyela uya wafumine ku lipili lya Palani. Wuwahe wendi wafwikile mayilu, na hanci henzalile na kuyemeza kwendi.

⁴ Kubyazima kwendi ngo mutena, mincalala ya byazimine mu maboko endi, omu mwaholamine ngovu zendi.

⁵ Wulweli wayilenga kumbili yendi, malwa akonkelenga munyima.

⁶ Wemanine, niho anyenkanishile hanci, waconcomekele na kukankisha matunga. Mapili a mwaka apabozokele na binkanda byanyomenene hanci. Zinzila zendi zekala mwaya myaka.

⁷ Namonene makando mu zintanda za baka Kushi. Kwekalile kukanka mu litunga lya Mindiyani.

⁸ Obe Nyambi ya Ngula, kati wapilaminine mishinzi ndi? Kati wukali wobe wezile ku tushinzi ndi? Kati wapilaminine liwate, oho wendele ha bambishi bobe, naha makoloyi obe akukoma ndi?

⁹ Walemene shipando shobe sha mukunzi, niho wananine mivwi. Watabwile hanci na mishinzi.

¹⁰ Oho mapili akumonene, akankile. Mema alibazi ahwentele. Mampunga akwancanine, na kukatwila mankanyi muyilu.

¹¹ Mutena na ngonda, byemanine mu mbimbayilu, oho mivwi yobe ya kubesha yikupita, na mulinga wobe oho wa byaziminenga.

¹² Wendanga na wukali hanci. Walyatangilanga matunga na wukali.

¹³ Wayanga na kulamwina bantu bobe, walamwinanga baya unawabishi. Wacancolanga baya ba kutwaminina bantu bakuluwa. Wafumishanga wulolo nimwawo, ku balika ku mutwe kukuma naku manyenca.

¹⁴ Na mulinga wendi wamuyahile ku mutwe, oho bakanzita bendi bezile kukwetu ngo nkuli yayinene ngayi batupanzanishe. Ku wahilila kwabo ngo bakakushinga kulyatilila bantu ba kushepwa kuwi.

¹⁵ Na bambishi bobe, walyatangilile liwate, pe mema ankwancanine na kwinga lifulututu.

¹⁶ Oho nayuvwileko, mutima wami wambwatukile, mivumbo yami yambwitile ha kuyuvwa mungunina, mu bifupa byami mwahopokele na mawulu ami atetemene. Nikatatilila mu ku mwena ha mutena wa makando, kwiza ha bantu ba kutulwisha.

¹⁷ Hinge ndi mutondo wa mukuyu kutupula ntemo wufwako, hinge ndi mikolobozi ya shinyanca kwikala na mikabo yifwako, hinge ndi mutondo wa olive kwikala na mikabo wufwako, hinge ndi mu mafuba kukaholoka byakulya mufwako, hinge ndi bambelele mu bipata mowa, hinge ndi zingombe mu milaka mowa,

¹⁸ Ami nikawahilila muli Nyambi ya Ngula, nikayemeza Nyambi mupulwishi wami.

¹⁹ Nyambi wa Makunge, niye ngovu zami. Niye mukakuwahisha mawulu wami ngonehe shineke. Niye wantwesheshanga kwenda hinge ha mapili.