Hambakuki 2 - Libuka Lya Kuyela

¹ Nikemana mu mwanya wami wakulama, pe nikakandama na kwikala ha kapeshi na kupenzelela ngayi nimone ebye ukamba kukwami nanebye afwanina kukumbula ku manyengo wami.

Nyambi ya Ngula ukukumbula Hambakuki

² Nyambi ya Ngula wankumbwile ngayi, “Tikita eshe shimono, shilubulule na ku shitikita ha matapa a lima ngayi ou ukalabaho aketuke.

³ Ndaba shimono shishili kutatilila kukuma ha shikati shasho shikwinika kutwala ku kukotoka, kukongeza shifwako. Ndi shiku moneka kwinga ngo shikwihala, shitatilile. Mwa shikuma bene shikeza, kukehala shifwako.

⁴ Mona, muka kutenda byabibi ukakwanga, ngoboni mukakwoloka ukayoya na kukulupila.”

⁵ Waine yenga yikakubeba. Waine yabebanga mukakuliyemeza na muvwa, milibu yendi ngonehe shinzimbi, kami nafweke ngonehe lufu, hinga lwatanga kwikuta. Ukulikungwila matunga nimwawo, kami ukukwata bantu kwinga bendi matunga nimwawo.

Kushushula kwa bakakubula kwoloka

⁶ Kati bantu nimwabo bafwako kuka mushilawiza naku muhengamina naku mukendula na kwamba ngayi, “Makando wendi ukulibungikila byuma bya kubula kwinga byendi na kulihetesha niye mwine na mali a mukwatila. Eshe shikatwalililaho shikati sha kukuma hati?”

⁷ Baka mikuli yenu bakamikatukila mutakwe na kumi bazumuna, kati baya ba kubazumwine kaliha bakeza naku kukankisha ndi? Niho ukenga lipuku lyabo.

⁸ Ndaba unapukulu matunga amengi, mashaliza a bantu ba matunga bakakupukula na nobe kami, ndaba unayiti mukeza wa bantu na kuleta mushunga hano hanci naku minzi naku bantu nimwabo bekalamo.

⁹ Makando kukwendi ukuleta na kwingiza mu litala lyendi wuheti anawana mu nzila yayibi, ngayi akatendele lihwa lyendi hayilu, kutinisha kumwizilila byabikalu.

¹⁰ Unakokele ku litala lyobe bya lisheni ndaba yakumanisha bantu babengi, unakana wumi obemwine.

¹¹ Ndaba limanya lili mu limota likalila, pe mukambo mukati ka honto ukakumbula.

¹² Makando kukwendi! Ou ukuzika munzi ha kuyita mukeza na wubi.

¹³ Monenu, kati kaliha shinafumu kuli Nyambi wa Makunge ngayi milimo ba kutenda bantu yinengi nkuni za ku bangizisha mundilo, kami matunga akulikwangisha niwo amwine ha byowa.

¹⁴ Ndaba hano hanci hakenzala kalimukisho ka maleema a Nyambi ya Ngula, ngonehe mema enzala mu liwate.

¹⁵ Makando kukwendi ukunwisha ndambo yendi malovu, ukumunwishilawo mu mbokoshi hantu nakolwo ngayi bamone muhelengwa wendi.

¹⁶ Mukekala na lisheni kupitakana maleema. Haya nobemwine, nwamo nobe utalangile. Nkomoki yili mu liboko lya Nyambi lya shilyo yikapita na kukuma kukwenu. Pe lisheni likahinga ha maleema wenu.

¹⁷ Mushunga wekalile ku Lembanoni ukakwizilila na nobe kami, kulobeshiwa kwa tunzama kuka kutinisha, ndaba unayiti mukeza wa bantu na kuleta mushunga hano hanci naku minzi naku bantu nimwabo bekalamo.

¹⁸ Kati tukuwana bishini ku kanankishi, oho mukakukabaza wakabazakale shifwekesha sha kanankishi kakuyungulula, uku longesha bya mahalo. Ndaba ou wakabazile unakulupili muneshe atenda niyemwine mu kaya kanankishi ka shimumu.

¹⁹ Makando nimwendi ukwambila shuma sha kubaza ngayi, “Tona,” Hinge ku limanya lya shimumu ngayi, “Katuka.” Kati ebye bikutwesha kuholola byuma ndi? Monenu, kanafwikiwi na ngolinde na shiliva, kami mukati kako mowa kwoya.

²⁰ Ngoboni Nyambi ukwikala mu litala lyendi lya kuyela, bantu nimwabo hano hanci bamwene nee ku meho wendi.