Hambakuki 1 - Libuka Lya Kuyela

¹ Elye nilyo lizu atambwile muluwe Hambakuki kuli Nyambi ya Ngula.

Hambakuki ukulinyenga ha kuyata kwa shihota

² Obe Nyambi ya Ngula, shikati sha kukuma hati eshe niku fwanina ku kwihana ngayi unyavwe, ngoboni kunyuvwa wufwako? Hinge kulilila kukwobe habya mushunga, ngoboni kumpulwisha wufwako?

³ Kati shumangani ukwitabila ngayi nimone byabibi na ku monesha makando. Kuloba na mushunga bili kumbili yami, kuli tuhu mangunga na kulyamba.

⁴ Nohobene ndaba yanebye kulama ndayano kunahenkenye. Kuyata byakwoloka kunaboko munyima. Ndaba bakuluwa banakomo bakulunga nohobene banavulanganya kuyata na kwoloka.

Kukumbula kwa Nyambi ya Ngula

⁵ Penza ha matunga na kuwapenzeshesha, ukakomoka shikuma, ndaba nili na kutenda mulimo ha matena wenu, nikatenda shuma shimo shiya mukabula kukulupila hinge ndi banamitongwezesho.

⁶ Mona nili na kushumisha Bakambambiloniya litunga lya shilala na mushunga, bali na kuya na kuketula hano hanci nimwaho ngayi bakome matunga amina.

⁷ Benga bantu ba kutinishiwa, kuyata kwabo na kwoloka na wulemu wabo bikuwaniwa kukwabo nibo bamwine.

⁸ Bambishi babo bafukumukanga kupitakana batumpulu, bali na wukali shikuma kupitakana bambinzi ba mazolo, bakakukandamaho bendeshanga na mishindo. Ee, bakakukandamaho bafumanga kwa kutali, batukanga ngonehe bangonga ba ku fukumukila mu kukwata.

⁹ Nimwabo bakuya kumbili na wukali wakukoma, pe bantu nimwabo ba kubakanka oku bakuya nimwako. Bakuya na kukundula bantapwa ngonehe lihekelela.

¹⁰ Bakuhandula bamyene, pe ku batulela ba kubashilawiza. Bakuhepa bipata nimwabyo, bashiminangako ndoba ha kukandamina pe hiba kukoma lukena.

¹¹ Niho bakapitamo ngo kukomba kwa mpepo na kuya kumbili, baka Kubipisha, nibo ngovu zabo zinengi nyambi yabo.

Hambakuki ukulinyengela kuli Nyambi ya Ngula kami

¹² Obe Nyambi ya Ngula, Nyambi yami, Obe wa Kuyela kati kaliha wekalileko kufuma ku kutatika ndi? Kukafwa tufwako. Obe Nyambi ya Ngula, unabemikili kuyata na kuketula. Pe haya obe Limanya unabayaka kwiza na kushushula.

¹³ Obe wa meho akuyela abulanga kukebukila ha byabibi kami kutwesha kupenza kubiya binabipi wufwako. Kati shumangani ukupenzelela baka kulungwa, hinga wa mwena nee oho umona wakuluwa hamina wakulunga kupitakana niye?

¹⁴ Ndaba wafutulanga bantu ngo zinci zamu liwate ngo byuma bya kulikoka hanci biya byabula wakubilela.

¹⁵ Kamalamo wakuluwa wabikolobelanga nimwabyo na kahanto, wabikokangamo na kanyanzi kendi, ukubikundula mukanyanzi kendi, pe uku wahilila na kutangala.

¹⁶ Nohobene ukukombelela ku kanyanzi kendi na kuhokesha incence ku kanyanzi kendi kakukoka ndaba yatwo ukulya byakulya byabiwahe na byakulya byabingi.

¹⁷ Kati ukatwalililangaho kulabula ha kanyanzi kobe na kuziha matunga na kubula kubayuvwila nceshe mwaya myaka ndi?