Fwilipu 4 - Libuka Lya Kuyela

Kufundiziza

¹ Nohobene, bawushinda wami, enu bakakuhakiwa nili na shitima sha kumimona, enu ku wahilila kwami na munana wami, haya yimanenu na kushumisha muli Mwene, enu bakakuhakiwa bami shikuma.

² Nikulambilila Yundiya kami nikulambilila Shinantike ngayi baliyuvwe umo na wamina muli Mwene.

³ Nikulomba kami, obe muhoni wa kupwisha, yavwa obo bambuyama, ndaba aba bambuyama ninatende nabo shikuma milimo, aba batendele milimo ya kukuba ncango zaziwahe, hamo na Kilementi na bamina bahoni aba mazina abo ali mu libuka lya wumi.

⁴ Wahililenu muli Mwene shikati nimwasho, pe kami nikwamba ngayi, wahililenu!

⁵ Kubomba kwenu kulimukiwe ku bantu nimwabo. Mwene uli hahepi.

⁶ Hinga mulikekula ndaba ya shuma shimo, ngoboni mu byuma nimwabyo lombelenu na kunyepa hamo na kukambilila, ngayi ebye mukushinga bilimukiwe kuli Nyambi.

⁷ Pe ku mwena kwa Nyambi kuya kunapitakana bihanganiko bya wuntu, kuholeka mitima yenu na bihanganiko byenu muli Yeshu Kilishitu.

⁸ Ha kumaninina bawushinda, yinzalishenu bihanganiko byenu na byuma nimwabyo bya kupwisha na byuma nimwabyo bya kulemeekiwa na byuma nimwabyo byakwoloka na byuma nimwabyo bya kuyela na byabiwahe nimwabyo na bya nceshe nimwabyo. Ndi Nikobili byabiwahe byamina na bya kuyemeziwa byamina, hanganikenu ha byuma ebye.

⁹ Tendenu byuma ebye namilongeshele, biya mwatambwile kukwami na biya mwayuvwile kukwami na biya mwamonene mumwami. Pe Nyambi uya wapananga ku mwena ukekala nenu.

Kukambilila ku bishemo

¹⁰ Ninawahilili shikuma muli Mwene, ngayi kunyima ya shikati shashitali nawana shikati sha kumimonesha ngayi muli bakakulifulankana. Mwa shikuma munalifulankana, ngoboni shilolo muwanenga shikati.

¹¹ Kaliha nikwamba ebye ku monesha ngayi nili na ntongawushi ya kubula bya kuliyavwa nabyo, ndaba ninalilongeshe kwikuta nanebye nilinabyo.

¹² Nikulimuka kuyoya mu wuncepwe, hinge kuyoya hinga nekala na byabingi. Ninekala mu nyoyelo ya kulishiyashiya na mu bikati bya kulishiyashiya. Ninalilongeshe kwikala hinga nekutilila, hinge kwikala na nzala, hinge kwikala na byabingi, hinge kwikala na byabishe.

¹³ Nikutwesha kutenda byuma nimwabyo na ngovu za Kilishitu ou ukuncumisha.

¹⁴ Ngoboni munatende shiwahe, ndaba munanyavwa mu makando ami.

¹⁵ Enu, Bakafwilipu, mu kulimuka shiwahe ngayi ha matena a kutatika ku shimikila ncango zaziwahe, oho nafumine ku Mashendoniya, enu tuhu mwanyavwile, enu mwalilumikilile na nami hinga nakwangile.

¹⁶ Ndaba hinge mu Teshalonika, ha bikati nashingilenga bya kuliyavwa nabyo, enu mwantuminine.

¹⁷ Kaliha ngayi nikushinga tuhu bishemo, ngoboni nikushinga ngayi mutambule mfuywezi ku bishemo byenu.

¹⁸ Haya ninatambulu byabingi, kami binahanya. Ninekutu na bishemo ninatambulu kuli Epafulonditashi ebye munantumini. Ebye bishemo binengi ngonehe ntupu ya livumba lyalitobe, nkombela iya akutambula Nyambi na ku wahilila.

¹⁹ Pe Nyambi yami ou wekala na wuheti wawuwahe, ukamiholwela bya kuliyavwa nabyo kupitila muli Kilishitu Yeshu.

²⁰ Mwanga Nyambi ou Tatiyetu ayemeziwe mwaya myaka. Ameni.

Mazu amamaninino

²¹ Shangwishenu mukakuyela nimwendi muli Kilishitu Yeshu. Bawushinda aba nilinabo kuno ba kumishangwisha.

²² Bakakuyela nimwabo ba kumishangwisha, shinene aba ba kutenda milimo mu litala lya Nkeshali.

²³ Nceshe za Mwene wetu Yeshu Kilishitu zikale nenu nimwenu. Ameni.