Fwilipu 2 - Libuka Lya Kuyela

Kulilimbwilisha na wunene wa Kilishitu

¹ Kukulupila kwenu muli Kilishitu ku kumi shumankanisha, kami shishemo shendi shami fumishanga wunginga. Muli na kulumikila kwa Moyo wa Kuyela, muli na shikeketima na nceshe na baminenu.

² Nikumilomba ngayi yinzalishenu ku wahilila kwami hakwikala na bihanganiko bimo na shishemo shimo na moyo umo na mutima umo.

³ Hinga mutenda shuma na lihungu na kuliyemeza, ngoboni mu kulilimbwilisha, muntu nimwendi ahanganike ngayi bamina ba kumupitakana.

⁴ Muntu nimwendi hinga ahanganika ku byuma byendi tuhu, ngoboni ahanganike kami ku byuma bya baminendi.

⁵ Yitabilenu ngayi ngana eze zikale mumwenu, zekalile kami muli Kilishitu Yeshu.

⁶ Niye hinge wekalile mu mutuntu wa Nyambi, ngoboni kaliha wahanganikile ngayi ezekele hamo na Nyambi.

⁷ Ngoboni walitendele mukakushotala, washimbile mutuntu wa mukamulimo, wahemuwile mu shifwekesha sha wuntu.

⁸ Hinga wawaniwile mu shifwekesha sha muntu, walilimbwilishile, wengile mukakwombatala kutwala ku kufwa, kuya kufwa kwa ha shishempakano.

⁹ Nohobene Nyambi unamukatulu shikuma, na kumupana lizina lili hayilu ya mazina nimwawo.

¹⁰ Ngayi ha lizina lya Yeshu, byalengiwa nimwabyo bili muyilu, na byuma bili hano hanci, na byuma bili mu nceto ya hanci, bishungumane hanci mu kulemesha.

¹¹ Kami nimwabyo bitabile ngayi Yeshu Kilishitu niye Mwene, ku wuwahe wa Nyambi Tate.

Kubyazima ngonehe mimuni mu kaye

¹² Nohobene, bakakuhakiwa bami, ngonehe munombatalanga bikati nimwabyo oho nekalile nenu, kaliha ku lupala lwami, ngoboni shinene oho nabuluko, tendenu milimo ya kupuluka kwenu na bowa na kukanka.

¹³ Ndaba Nyambi niye ou ukutenda mukatikenu wubili wabyo wakushinga na kutenda shamutima wendi shashiwahe.

¹⁴ Tendenu byuma nimwabyo kwakubula ntongawushi na nkani,

¹⁵ ngayi mukenge bakubula nyanco, bakwoloka na kwinga bana ba Nyambi bakubula mulandu mukati ka mukoka wakutengama, mukati kawo mu kumunika ngonehe nyenye mu kaye,

¹⁶ ha kubatongweza lizu lya wumi ngayi niwahilile ha Mutena Wakwiza kami kwa Kilishitu, ngayi kaliha netuka tuhu ntalu, hinga kaliha na kalamana tuhu ntalu.

¹⁷ Kukulupila kwenu na milimo yenu kuli Mwene, yinafweke ngo nkombela yinatupuliwi kuli Nyambi. Na mukeza wami uketikiwila hamo na nkombela, nikatangala na ku wahilila hamo nenu.

¹⁸ Ndaba ya shuma eshe tangalalenu na ku wahilila hamo na nami.

Timoteo na Epafulonditashi

¹⁹ Ngoboni nikukulupila ngayi ndi Mwene Yeshu ukwitabila, nikatuma Timoteo kukwenu wanguwangu, ngayi ami kami nishumankanishiwe oho nikayuvwa kupinduka kwenu.

²⁰ Ndaba nifwaye muntu waku fwanina kutuma ngonehe niye, ou ukufulankana byenu shiwahe.

²¹ Ndaba nimwabo bakushinga byabo, kaliha byuma bya Yeshu Kilishitu.

²² Ngoboni mu kulimuka ngayi nyinkalo ya Timoteo yayiwahe, kami mu kulimuka ngayi watendele milimo hamo na nami wa ku shimikila ncango zaziwahe, ngonehe mwana na tatiyendi.

²³ Pe nikulumbeza ngayi nimutume kukwenu wanguwangu, oho nikamona ngayi shikekala nahiti kukwami.

²⁴ Ngoboni nikukulupila ngayi Mwene ndi uketabila nami kami nikeza sha wuluno.

²⁵ Nahanganiki ngayi shuma sha kufwanina kutuma kukwenu kawushinda wami Epafulonditashi. Mwamutumine ngayi anyavwe kami unatende mulimo na kulwa ngunga ya Bakakilishitu hamo na nami.

²⁶ Ndaba niye ukushinga shikuma kumimona, uli na shikeku, ndaba mwayuvwile ngayi uli na kukola.

²⁷ Mwa shikuma wakolele na kushinga kufwa, ngoboni Nyambi wamuyuvwilile nceshe, kaliha niye tuhu ngoboni na nami kami kutina nikala mu wunginga.

²⁸ Nikushinga kumutuma kami Epafulonditashi kukwenu. Oho mukamumona, mukawahilila, kami ngayi wunginga uncepele.

²⁹ Nohobene mumutambule muli Mwene na ku wahilila nimwako na kulemeeka bantu banoho.

³⁰ Ndaba ya mulimo wa Kilishitu, wekalile hahepi na kushinga kufwa, walihupwizile wumi wendi, ngayi amanishe osho mwakwangile kutenda.