Ezila 9 - Libuka Lya Kuyela

Ezila ukutosha kuliyekela mukati ka Bayunda na bakamatunga

¹ Oho ebye nimwabyo byatendiwakale, bakakutwaminina bamo ba ku bantu ba Ishalela bezile na kuntongweza ngayi, “Bantu na bakankombela na Balevi kulilama nibo bamwine na kulitapulula ku bantu bashindambo bafwako, aba Baamoni na Bamowambi na Baengepita, hinge Bakenaani na Bahita na Bapelizi na Bayembushi na Baamoli. Bakutendanga byuma bimo bya wunyengwe ebye batendanga obo bantu.

² Ndaba balume ba Bayunda banayeke bambuyama ba muno mu litunga nohobene bantu ba Nyambi banalibipishi. Bakakutwaminina na babilolo nibo benga bantanzi ha kulibipisha.”

³ Oho nayuvwile eshe natabwele bivwalo byami mu wunginga nakokele huki zami na mulevu wami, pe nahopokele mu lutu.

⁴ Nekalile kuyo na kulihohoma kutwala naku shikati yakombeleliwanga nkombela ya mazolo. Bantu nimwabo batinine ndaba yanebye ambile Nyambi wa Ishalela ha wubi wa nobo balubukile mu wutampwa bakungulukilile kukwami.

⁵ Oho shikati sha nkombela ya mazolo sha kumine nakatukile oku nalihohomenenga, kami hinga na vwala bivwalo bya ku taboka nashungumanine na kulombela, pe nolwele maboko wami kuli Nyambi ya Ngula Nyambi yami.

⁶ Niho nambile ngayi, “Obe Nyambi yami nili na lisheni shikuma ha kunyongolola mutwe wami ku meho wobe, Obe Nyambi yami, ndaba wubi wetu unahanya shikuma, kupitakana ha mitwe yetu, milandu yetu yina kakumu naku mayilu.

⁷ Ku balika ku matena a bankakazetu kukuma naku mutena walelo, etu bantu bobe twonzelenga Kubipisha shikuma. Ndaba ya wubi wetu na bamyene betu na bakankombela betu, bonzela kutukwata bamyene ba mapukwenda, kami twonzela kupondiwa na kupukuliwa na kutwaliwa kwashenge kwinga batampwa. Kami tunahanduliwi shikuma, ngonehe eshe twengakale mutena walelo.

⁸ Ngoboni haya Obe Nyambi ya Ngula, Obe Nyambi yetu, shikati tuhu shashishe, wekala na nceshe kukwetu za kutushiyilaho mashaliza ngayi bapanze mu wulungo na kwiza mukwikala shiwahe mu mwanya owe wakuzila. Unatuyoyeshe hinge ndi tuli mu wulungo.

⁹ Twengile bandungo, ngoboni Nyambi kaliha watushiyile mu wulungo. Wengishile bamyene babanene bamu Pesha kutuyamiziza na kutwitabilisha ngayi tuyoyenga na kutendulula Litala lyobe Nyambi ya Ngula elye lyashiwukile, ngayi twikale shiwahe muno mu Yunda namu Yelushalema.

¹⁰ “Ngoboni haya kunebye nimwabyo byamonekakale tukutwesha kwamba bishini Obe Nyambi yetu? Tunalimbululu kwombatala ndayano nimwazo,

¹¹ ziya watupanikile muli bamiluwe bakamilimo bobe. Niho batutongwezele ngayi, ‘Litunga elye muli na kuya mukwikala lyenga litunga lyalibi, ndaba obo bantu bekalamo benzalishamo biheka bya wunyengwe na bya mazilo kunkumo na kunkumo.

¹² Hinga mukaliyekela nanobo bantu, kami ngayi hinga mukaliyuvwashana nabo, hinge ku bayavwa ngayi batumpuke, ndi mukushinga ngayi mulikuwe bili mu litunga na kulishiyila ku bazukulyenu mwaya myaka.’

¹³ Hinge ndi byuma nimwabyo byamonekakale kukwetu mu kutushushula ndaba ya wubi na Kubipisha kwetu, hitulimuka ngayi Obe Nyambi yetu unatweshekele ha kutushushula kupitakana eshe twafwanina, kami unatushiyiliho awa mashaliza.

¹⁴ Haya tukutwesha nahiti kulimbwilisha ndayano zobe na kuliyekela na bantu aba ba kutenda biheka byabibi? Ndi tukutenda noho, pe ukapilama shikuma hantu unatulobeshe nimwetu, kami kubule mashaliza hinge wakupanza.

¹⁵ Obe Nyambi ya Ngula, Nyambi wa Ishalela, Uli wakulunga ndaba unatushiyiho kwinga mashaliza a baya banapanza. Tukulitabila milandu yetu kukwobe. Kufwanina kwiza ku meho wobe tufwako.”