Ezila 7 - Libuka Lya Kuyela

Ezila ukukuma mu Yelushalema

¹ Munyima ya myaka yayingi, Atazekishi oho engile mwene wamunene wamu Pesha, kwekalile mulume watumbiwile ngayi Ezila. Bankakazendi batutikile kuli Aloni, Mukulwane wabakankombela Nimwabo. Bahemuwile nehe, Ezila wengile mwana Shelaya na Shelaya wengile mwana Azaliya na Azaliya wengile mwana Hilikiya.

² Hilikiya wengile mwana Shaluma na Shaluma wengile mwana Zandoki na Zandoki wengile mwana Ahitumbi.

³ Ahitumbi wengile mwana Amaliya na Amaliya wengile mwana Azaliya na Azaliya wengile mwana Melayoti.

⁴ Melayoti wengile mwana Zelahiya na Zelahila wengile mwana Uzi na Uzi wengile mwana Mbuki.

⁵ Mbuki wengile mwana Ambishuwa na Ambishuwa wengile mwana Fwinihashi na Fwinihashi wengile mwana Eliza na Eliza wengile mwana Aloni Mukulwane wabakankombela Nimwabo.

⁶ Ezila wengile mukakutikita, pe wengile kami wakulilongesha shikuma mu ndayano eze apanikile Nyambi ya Ngula, Nyambi wa Ishalela kuli Moshesha. Ndaba Ezila wekalile na mfuywezi za Nyambi ya Ngula, Nyambi yendi, mwene wamunene wamupanikile byuma nimwabyo ebye anyepele. Ha mwaka wa mutanu na yibili wakulela kwa Mwene wamunene Atazekishi, Ezila wakatukile ku Mbambiloniya kuya ku Yelushalema,

⁷ na likunge lya Baishalela omu mwekalile bakankombela na Balevi na bakakwimbila mu Litala lya Nyambi na bakamilimo hamo na bakakulama mapangati.

⁸ Ezila wakumine ku Yelushalema mu ngonda wa mutanu wa mwaka wa mutanu na yibili wakulela kwa mwene Atazekishi.

⁹ Bafumine ku Mbambiloniya ha mutena wakutatika wa ngonda wakutatika, pe mu kuyavwa kwa Nyambi bakumine ku Yelushalema ha mutena wakutatika wa ngonda wa mutanu, ndaba bekalile na mfuywezi za Nyambi.

¹⁰ Ezila wayakilenga mutima wendi nimwawo mu kushingishisha ndayano za Nyambi ya Ngula na kuzilama na ku longesha ndayano nimwazo ku bantu na kufundiziza bantu ba Ishalela.

Mwene wamunene Atazekishi ukupanika Ezila liñwati

¹¹ Ano niwo mazu ekalile mu liñwati elye mwene wamunene Atazekishi apanine Ezila, mukankombela na mukakutikita, ou walilongeshele shikuma mu ndayano namukufundiziza okwe Nyambi ya Ngula apanine Ishalela.

¹² “Ami mwene wamunene Atazekishi kuli Ezila mukankombela na mukakulilongesha ndayano za Nyambi wa Muyilu.

¹³ “Nili na kumitongweza nehi ngayi mu wene wami nimwawo, bantu ba Ishalela nimwabo na bakankombela na Balevi, baya bakushinga kuya, betabilenu muye nabo ku Yelushalema.

¹⁴ Ami mwene hamo na bankongo bami mutanu na babili, tunakutumu ngayi uye na kushingishisha eshe bili byuma mu Yelushalema namu Yunda, kami mwanga ukamone eshe ba kukonka ndayano za Nyambi yobe, eze zili ku maboko wobe na neshe ba kuzombatala.

¹⁵ Ukashimbe ntupu ya ngolinde naya shiliva ebye ami na bankongo bami tunapana kuli Nyambi wa Ishalela, Ou wekala na Litala lyendi mu Yelushalema.

¹⁶ Ukashimbe kami shiliva na ngolinde eye ukakungwisha mu litunga lya Mbambiloni, na zintupu nimwazo eze bakapanika bantu ba Ishalela na bakankombela babo ku Litala lya Nyambi yabo mu Yelushalema.

¹⁷ Nohobene mukaliyavwishe shiwahe owo mali na kulandaho bankunzi na bikungwe bya bambelele na bana ba bambelele na ntupu ya mpeka na waine, mukabikombelele ha kaala ka Litala lya Nyambi mu Yelushalema.

¹⁸ Mwanga mukaliyavwishe shiliva na ngolinde yiya yikashalaho nimwabyo obyo mukushinga, kuya ngo mu shifungo sha Nyambi yenu.

¹⁹ Mukatwala kuli Nyambi mu Yelushalema bitendesho ebye nimwabyo biya byapanikiwile ngayi mubitendeshe mu mulimo wa Litala lya Nyambi.

²⁰ Pe kami byuma nimwabyo mukushinga ku Litala lya Nyambi, mu kutwesha kubiwana ku mfuma ya wene.

²¹ “Ami mwene Atazekishi, nili na kutongweza babilolo ba zimfuma nimwabo bamu litunga lya ku Mponci ya mushinzi wa Yufuleti kupanika bya kuyavwa kuli Ezila mukankombela na mukakutikita ndayano za Nyambi wa Muyilu, byuma nimwabyo ebye a kunyepa.

²² Mukamupane kukuma ku wulemu wa makilongilamu 3,400 a shiliva, na makilongilamu 10,000 a loto na malita 2,000 a waine na malita 2,000 a mazi a olive, kami mubapane mushele momu ba kushingila.

²³ Mu ku fwanina ku shangama kuwana byuma nimwabyo ebye Nyambi wa Muyilu akushinga bya Litala lyendi, kutina ampilamina ami na bana bami obo bakalelanga kunyima yami.

²⁴ Munakanishiwi kutelesha mutelo ku bakankombela na Balevi na bakakwimbila hamo na bakakulama ku mapangati aku Litala lya Nyambi na bakamilimo, hinge ku muntu nimwendi unakundama kunelye Litala lya Nyambi.

²⁵ “Obe Ezila, ha kuliyavwisha ngana eze anakupaniki Nyambi yobe, unafwanini kwimika batulela na bakakuyata ngayi balele bantu nimwabo ba ku Mponci ya Yufuleti, aba balimuka ndayano za Nyambi yobe. Niho unafwanini ku longesha eze ndayano ku muntu nimwendi ou wabula kuzilimuka.

²⁶ Muntu nimwendi ukubula kwombatala ndayano za Nyambi yobe hinge ndayano za wene, unafwanini ku shushuliwa wanguwangu na lufu hinge kutandiwa hinge kumuyangula ntutu yendi hinge kutwaliwa mu tolongo.”

Ezila ukuyemeza Nyambi

²⁷ Ezila wambile ngayi, “Yemezenu Nyambi ya Ngula, Nyambi wa bankakazetu! Unapana mutima kuli mwene wamunene kulemeeka Litala lya Nyambi mu Yelushalema.

²⁸ Mu nceshe za Nyambi nayamiziziwile kuli mwene wamunene naku bankongo bendi naku babilolo bendi nimwabo bangovu. Nakancile ndaba nekalile na mfuywezi za Nyambi ya Ngula Nyambi yami, pe natweshele kukandamika bakulwane bamu mavumo a Baishalela babengi ngayi niboke nabo.”