Ezila 6 - Libuka Lya Kuyela

Ndayano za mwene Shilushi zikuwaniwa

¹ Nohobene Mwene wamunene Ndaliyashi wapanine ndayano za ku shingishisha mu Libuka lya likota lya wene liya lyakongiwilenga mu Mbambiloni.

² Libuka lya likota omu mwatikitiwile eze ndayano baliwanine mu lukena lwa Ekimbatana mu litunga lya Mendiya omu mwatikitiwile mazu ngayi,

³ “Mu mwaka wakutatika wakulela kwa mwene wamunene Shilushi, niye wambile ngayi Litala lya Nyambi mu Yelushalema litendululiwe kwinga mwanya mwakutupwilanga na kuhokeshela zinkombela. Litala elye linafwanini kwinga mwimo wa mamita 27, na mamita 27 muwipi.

⁴ Mamota afwanina kutendiwila ha mundandwe umo wa maleenge, pe hikuyalaho mindandwe yihatu ya mamanya ha mundandwe na mundandwe umo wa maleenge. Pe mali akuyumba afwanina kufuma mu mfuma ya wene.

⁵ Kami bitendesho bya ngolinde na shiliva, ebye aletele mwene Nembukandineza ku Mbambiloni kubifumisha mu Litala lya Nyambi ku Yelushalema. Bakabibweshe mu mwanya wabyo mu Litala lya Nyambi.”

Ndeliyashi ukwamba bya mulimo ngayi utwalilileho

⁶ Niho mwene Ndaliyashi abweshele mazu a liñwati nehe ngayi, “Kuli Tetanayi, kalela waku Mponci ya mushinzi wa Yufuleti na Shetali Mbozenayi na baminobe babilolo ba ku Mponci ya Yufuleti. “Fumishenu liboko ku Litala lya Nyambi,

⁷ kami hinga muluwanganisha mulimo walyo. Lehenu kalela wamu Yunda na bakakutwaminina batendulule Litala lya Nyambi ha mwanya walyo lyekalilenga mwaka.

⁸ Haya ami kuno nikumitongweza ngayi bayavwenu ha kulitendulula. Bya ku baholesha ha mulimo bikafuma ku mali a wene aya nabatongwezele kutambulanga ku mitelo yaku Mponci ya Yufuleti, ngayi mulimo hinga ubokela munyima.

⁹ Mukapanenga bakankombela bamu Yelushalema ebye bakamitongweza ngayi nibyo bakushinga ha mutena ha mutena na kubula kukwanga. Byuma ebye binengi bankunzi baya bashili babashe na bambelele, hinge bana ba bambelele kwinga zinkombela za kuhokesha kuli Nyambi wa Muyilu, hinge loto na mushele na waine, hinge mazi a olive.

¹⁰ Eshe shitendiwe ngayi batweshe kukombelela nkombela kuli Nyambi wa Muyilu, na kulombela ngayi mfuywezi zendi zize hahami naha bana bami.

¹¹ Niho nikumitongweza ngayi, muntu nimwendi ukukana eze ndayano, ku litala lyendi bakahomona mukambo, pe ukabaziwa kunkumo, niho ukazikiwa hanci, pe lutu lwendi lukahomekiwako. Litala lyendi likenga lilala.

¹² Mwanga Nyambi ou wahatile Yelushalema kwinga mwanya oku akalemeshiwilanga, alobeshe nimwendi mwene, hinge matunga aya akakiluka eze ndayano na kwezeka kulobesha Litala lya Nyambi mu Yelushalema. Ami Ndaliyashi natumu eze ndayano. Pe ndayano eze mu ku fwanina kuzombatala.”

Kufunguliwa kwa Litala lya Nyambi

¹³ Niho kalela Tetanayi, Shetali Mbozenayi na baminabo babilolo batendele na ku shoshoka ngonehe abatongwezele mwene wamunene.

¹⁴ Bakakutwaminina ba Bayunda batendele shiwahe mulimo wakutenda Litala lya Nyambi. Bamiluwe ba Nyambi ba Hangayi na Zakaliya mwana Indo ba bashumankanishile. Niho bamanishile Litala lya Nyambi ngonehe ambile Nyambi wa Ishalela, kuli Shilushi na Ndaliyashi na Atazekishi, bamyene babanene ba ku Pesha.

¹⁵ Bamanishile Litala lya Nyambi ha mutena wawuhatu wa ngonda wa Andali. Mu mwaka wa mutanu na umo wakulela kwa mwene wamunene Ndaliyashi.

¹⁶ Niho bantu ba Ishalela na bakankombela na Balevi na bamina nimwabo aba balubukile mu wutampwa, bafungwile Litala lya Nyambi na kutangala.

¹⁷ Ha kufungula Litala lya Nyambi batupwile bankunzi 100 na bikungwe bya bambelele 200 na bana ba bambelele 400, kwinga zinkombela. Kami batupwile bikungwe bya bampongo likumi na babili kwinga ntupu ya ha wubi, mpongo umo ku mushobo na mushobo wa Ishalela.

¹⁸ Bakwalamikile kami bakankombela na Balevi ha mulimo wa Litala lya Nyambi mu Yelushalema, ngonehe ku ndayano eze zekalile mu libuka lya Moshesha.

Shimbo sha Kupitilila

¹⁹ Bantu aba balubukile mu wutampwa bapingile Shimbo sha Kupitilila ha mutena wawu 14 mu ngonda wa Nishani, uya wengile ngonda wakutatika mu mwaka.

²⁰ Ndaba bakankombela nimwabo na Balevi oho baliyeleshakale nibo bamwine, pe bayelele. Niho Balevi bazihile mwana mbelele waha nkombela ya Shimbo sha Kupitilila ha bantu nimwabo aba balubukile na hali bakankombela na nibo bamwine.

²¹ Mwana mbelele wa nkombela bamulile Baishalela nimwabo, aba balubukile mu wutampwa na bantu nimwabo kami baya bashiyile biheka byabibi bya bantu bamina bazikilenga mu litunga ngayi mwanga balifungile na kulemesha Nyambi ya Ngula Nyambi wa Ishalela.

²² Bapingile Shimbo sha Mankende A kubula mumena ha matena mutanu na abili. Bakeyukile shikuma ndaba ngayi Nyambi ya Ngula wafutwile mutima wa mwene wamunene waku Ashiliya kubayamiziza, nohobene wabemaninine mu mulimo wakutendulula Litala lya Nyambi wa Ishalela.