Ezila 5 - Libuka Lya Kuyela

¹ Niho bamiluwe ba Nyambi babili ba Hangayi na Zakaliya mwana Indo, batatikile kwamba ku Bayunda aba bekalile mu Yunda namu Yelushalema mu lizina lya Nyambi wa Ishalela, ou wekalile hayilu yabo.

² Oho Zelumbambelu mwana Shelatiyele na Yoshuwa mwana Yozandaki bayuvwile mazu wabo pe batatikile kutendulula Litala lya Nyambi mu Yelushalema, kami babayavwile aba bamiluwe babili.

³ Ha shikati shiyo bene kalela Tetanayi waku mponci ya mushinzi wa Yufuleti na Shetali Mbozenayi na bamina babilolo bayile ku Yelushalema na kubepula ngayi, “Kati yani unamipaniki ngovu za kutenda lino Litala lya Nyambi na kulihongozola nehe?”

⁴ Babepwile kami mazina a bantu nimwabo aba bayavwilenga ku kutenda Litala lya Nyambi.

⁵ Ngoboni Nyambi wapenzele ha bakakutwaminina ba Bayunda, pe babilolo ba ku Pesha babulile ku bakanisha kutenda mulimo hantu kutwala ha shikati shiyo bakatikitililile kuli Mwene wamunene Ndaliyashi na kutambula kukumbula kwendi.

⁶ Awa niwo mazu batumine kuli Ndaliyashi mwene wamunene mu liñwati.

⁷ “Kuli mwene wamunene Ndaliyashi mwanga ulelenga mu ku mwena.”

⁸ “Obe mwene ya ngoma uku fwanina kulimuka ngayi etu twayile ku litunga lya Yunda pe twakawanine ngayi Litala lya Nyambi Wamunene lili na kutendululiwa na mamanya amanene na mikambo ya bitondo yayaliwakale. Mulimo unatendiwi shiwahewahe pe uli na kuya kumbili wanguwangu.”

⁹ “Niho twepwile bakakutwaminina bantu ngayi batutongweze ou wabapana ngovu za kutendulula Litala lya Nyambi na kulihongozola.

¹⁰ Twabepwile kami mazina wabo ngayi tutweshe kukutongweza ngayi aba nibo ba kutwaminina owe mulimo.

¹¹ Pe bakumbwile ngayi, ‘Tunengi bakamulimo wa Nyambi wa muyilu na hanci, pe tulinakutendulula Litala lya Nyambi elye batendele ha kutatika na kuhongozoliwa myaka yayingi ya kunyima na mwene wa ngovu wamu Ishalela.

¹² Ngoboni ndaba bankakazetu bapilamishile Nyambi wa Muyilu, pe wetabilile ngayi bakomiwe kuli mwene Nembukandineza waku Mbambiloniya waku likota lya wene wa Kalendiya. Litala lya Nyambi lyalobeshiwile pe bantu batwaliwile mu wutampwa ku Mbambiloniya.

¹³ Niho mu mwaka wakutatika wakulela kwendi mu Mbambiloniya, mwene wamunene Shilushi wapanine ndayano zaha Litala lya Nyambi ngayi litendululiwe.

¹⁴ Niho abweshele ngolinde na shiliva na bitendesho bya mu Litala lya Nyambi, ebye afumishile Nembukandineza mu Litala lya Nyambi mu Yelushalema na kubiyaka mu litala lya kulemeshela banyambi bendi mu Mbambiloni. Mwene Shilushi wabweshele byuma ebye na kubipanika kuli muluwe umo watumbiwile ngayi Sheshimbaza, ou emikile kwinga kalela wamu Yunda.

¹⁵ Pe mwene wamutongwezele kubishimba na kubibwesha ku Yelushalema mu Litala lya Nyambi, na kutendulula Litala aha lyekalilenga mwaka.

¹⁶ Nohobene Sheshimbaza wayile na kuyala mwimbi walyo, mulimo wakuzika watwalilileho ku balika hayo kuleta naku lelo, ngoboni nihano Litala lya Nyambi shilolo limane.’ ”

¹⁷ “Haya ndi shikukuwahilisha obe mwene ya ngoma kwikale ku shingishisha mu libuka lya Likota lya wene wamu Mbambiloni hamina kampe mwene Shilushi wabakanishile hinge ndi wabetabilishile kutendulula Litala lya Nyambi mu Yelushalema. Haya tutongweze bihanganiko bili mu mutima wobe.”