Ezila 4 - Libuka Lya Kuyela

Kulwisha ha kutendulula Litala lya Nyambi

¹ Oho bamalamo ba Yunda na Mbenjamani bayuvwile ngayi aba banafumu mu wutampwa bali na kutendulula Litala lya Nyambi ya Ngula, Nyambi wa Ishalela,

² niho bayile mu kulimona na Zelumbambelu na bakulwane ba mavumo, pe bambile ngayi, “Netu kami tulifungile nenu ha kutendulula Litala lya Nyambi. Netu twalemeshanga Nyambi umo Ou mwalemeshanga, kami ku balika haya atuletele kuno Eshahandoni mwene wamunene wa Ashiliya, twakombelelenga zinkombela kuli Nyambi.”

³ Ngoboni ba Zelumbambelu na Yoshuwa na bakulwane ba mavumo a Ishalela babatongwezele ngayi, “Enu muli bantu bashenge kushinga tufwako kuyavwa kwenu kwa kutenda ku Litala lya Nyambi ya Ngula Nyambi yetu. Tukatendalyo etu bamwine, ngonehe atutongwezele Shilushi mwene wamunene waku Pesha.”

⁴ Niho bantu aba bazikilenga mwaka mu litunga bashingile kukwangisha na kutinisha Bayunda na ku bakanisha kutenda Litala lya Nyambi ya Ngula.

⁵ Bapanine lizika kanwa ku babilolo ba wene wa Pesha ngayi bakanishe bakamilimo. Bazaminine kutenda noho bikati nimwabyo bya kulela kwa mwene Shilushi na mu kulela kwa mwene wamunene Ndaliyashi.

Kulwisha kwa mulimo wakutendulula Yelushalema

⁶ Mu mwaka uya atatika kulela mwene wamunene Zekishi, bamalamo babo bazikilenga mu litunga lya Yunda na Yelushalema bayakile bihepwa hahabo ebye batikitile bya kubalwisha.

⁷ Shikati sha kulela kwa mwene wamunene Atazekishi waku Pesha, ba Mbishilama na Mitilendati na Tambilu na baminabo, batikitile liñwati kuli mwene. Liñwati lyatikitiwile mu Shialamayiki kami oho lyalabiwilenga banungwililenga mazu.

⁸ Kalela Lehumi na Shimishayi mukakutikita wamu litunga, batikitile liñwati kuli mwene Atazekishi habya Yelushalema ngayi,

⁹ “Liñwati elye linafumu kuli kalela Lehumi na Shimishayi mukakutikita wamu litunga, hamo na baminabo bakakuyata na babilolo nimwabo, aba bengile bantu bakutatika kufuma ku Eleki naku Mbambiloni na Shusha mu litunga lya Elamu.

¹⁰ Kami hamo na bantu bamina aba afumishile ku minzi yabo mwene wamunene na mpupo Oshinapalaa, pe wabazikishile mu lukena lwa Shamaliya naku zimbalila nimwazo zamu litunga lya ku mponci ya mushinzi wa Yufuleti.”

¹¹ Liñwati elye balitikitile nehe ngayi, “Kuli Mwene wamunene Atazekishi liñwati elye linafumu kukwetu etu bantu ba ku mponci ya mushinzi wa Yufuleti.

¹² “Tukushinga ngayi obe mwene ya ngoma ulimuke ngayi Bayunda aba bafumine ku matunga wobe amina banaziki mu Yelushalema, bali na kutendulula luya lukena lwalubi lwa mafutufutu. Batatikakale kutendulula twimbi kami tuli hahepi na kumana.

¹³ Obe mwene ya ngoma, ndi lukena luno lukutendululiwa na twimbi twalwo hitukumana, pe bantu bakaleha kutela mitelo nimwayo na mutelo wobe wa wene ukashepa.

¹⁴ Ndaba etu tuli mu ngovu zobe obe mwene ya ngoma, kushinga tufwako ku mona eshe hishitendiwa, pe etu tunahanganiki nehe ngayi,

¹⁵ ushingishishe mu mabuka aya batentekelenga bankakazobe. Ndi ukutenda noho, ukuwana ngayi luno lukena lwenga lwa mafutufutu, pe kami ngayi ku balika kubikati bya bashikale nilwo lwaletelenga mushunga ku bamyene naku batulela bamu matunga. Bantu balwo bengile babakalu bikati nimwabyo ha ku balela. Eshe nisho shuma balobeshele luno lukena.

¹⁶ Nohobene etu tunawana ngayi lukena luno ndi lukutendululiwa na twimbi twalwo tunamana kulungu, pe obe mwene ya ngoma kwinga ngayi ukekala na ngovu ha litunga lya ku mponci ya mushinzi wa Yufuleti kami ufwako.”

¹⁷ Mwene wamunene Atazekishi wakumbwile ngayi, “Kuli kalela Lehumi na Shimishayi mukakutikita wa litunga na baminenu mwekala nabo mu Shamaliya na wingi wabo bekala ku mponci ya mushinzi wa Yufuleti nikumishangwisha.”

¹⁸ “Liñwati elye wantuminine ba linungwilile na kulindabila shiwahe.

¹⁹ Nayakile ndayano za ku shingishisha, pe mwa shikuma kwa waniwa ngayi ku balika kubikati bya kushikale Yelushalema walwishilenga ngovu za wene, kami ngayi lwekalilenga na bakakulwisha nabakakuleta mishunga.

²⁰ Bamyene bangovu balelelenga Yelushalema na shiketu nimwasho sha ku mponci sha mushinzi wa Yufuleti, batambwilenga mutelo na mukungwila.

²¹ Nohobene yimikenu ndayano ku bantu ngayi obo bantu balehe kutendulula lukena hantu ami nikabatongweze.

²² Tendenu shawanguwangu, ngayi kukabule kwikala wukalu mukati ka wene wami.”

²³ Oho bamanishile tuhu kulabila liñwati Lehumi na Shimishayi na baminabo, elye lyafumine kuli mwene wamunene Atazekishi, banyankupilile ku Yelushalema na kukandamika Bayunda ngayi balehe kutendulula lukena.

Mulimo wakutendulula ukatwalililaho

²⁴ Niho mulimo waku Litala lya Nyambi elye lyekalile mu Yelushalema wemikiwile, pe wemanine hantu ha mwaka wawubili wakulela kwa mwene Ndaliyashi waku Pesha.