Ezila 3 - Libuka Lya Kuyela

Kulemesha Nyambi ku kutatika kami

¹ Oho ngonda wa mutanu na zibili yapitile, bantu ba Ishalela nimwabo bazikakale mu minzi yabo. Niho nimwabo bakungulukile mu Yelushalema ngo muntu umo.

² Niho Yoshuwa mwana Yehozandaki na baminendi bakankombela na Zelumbambelu mwana Shelatiyele hamo na bawushinda wendi, batendulwile kaala ka Nyambi wa Ishalela, ngayi mwanga batweshe kuhokeshelaho zinkombela na kukonka kufundiziza kuya kwatikitiwile mu mazu a Moshesha, muntu wa Nyambi.

³ Batampwa baya balubukile batinine bantu baya bekalilenga mu litunga liyo, ngoboni batendulwile kaala na kukazikila haya kemaninenga mwaka. Niho batatikile kami kuhokeshelaho zinkombela kuli Nyambi ya Ngula za lumenemene na lumenemene na zinkombela za mazolo na mazolo.

⁴ Bapingile Shimbo sha Minkungwa kuya na shiheka, pe ha mutena ha mutena bakombelelele zinkombela zashingiwilenga ha mutena uyo.

⁵ Bakombelelele zinkombela zaha mutena ha mutena kwinga za kuhokesha za nzimba na nozo zengile za kukombelela ku Shimbo sha Kutelama kwa ngonda naku bikungulukilo byamina nimwabyo okwe alemeshiwilenga Nyambi ya Ngula, kuyakako kami na zinkombela nimwazo ziya zapanikiwilenga kuli Nyambi ya Ngula mu kufunga kwa bantu.

⁶ Bantu oho shilolokale batatike kutendulula Litala lya Nyambi, ngoboni batatikile kuhokeshela zinkombela kuli Nyambi ya Ngula ha mutena wakutatika wa ngonda wa mutanu na zibili. Ngoboni mwimbi wa Litala lya Nyambi shilolo uzikiwe.

Mulimo wakutendulula Litala lya Nyambi ukutatika

⁷ Bantu bapaninenga mali bakakubaza mamanya na bambazi, kami bapaninenga byakulya na bya kunwa na mazi a olive ngayi bitumiwe ku minzi ya Tile na Shindoni na kutambashana na bitondo bya shinda bya ku Lembanoni byaletiwilenga na liwate kukuma ku Yopa. Ebye nimwabyo byatendiwilenga na ngovu za Shilushi mwene wamunene wamu Pesha.

⁸ Nohobene mu mwaka wawubili oho balubukakale ku Litala lya Nyambi ku Yelushalema, ku mwanya kwekalile mwaka Litala lya Nyambi. Mu ngonda wawubili Zelumbambelu mwana Shelatiyele na Yoshuwa mwana Yozandaki na mashaliza a bawushinda wabo bakankombela na balevi na baya nimwabo bafumine ku wutampwa kwiza ku Yelushalema. Bahatile balevi kutatika ba myaka makumi abili na kuya kumbili, batatikile mulimo. Zelumbambelu mwana Shelutiyele na Yoshuwa mwana Yehozandaki na wingi wa baminabo bakankombela na Balevi na bantu nimwabo bafumine mu wutampwa kulubuka mu Yelushalema. Balevi nimwabo ba myaka makumi abili hinge kupitakana bayakiwile mukwendesha milimo ya kutendulula Litala lya Nyambi.

⁹ Nohobene Kalevi Yeshuwa na bana bendi bamu livumo lya Hondabiya na Kandimiyele na bana bendi baliwanine hamo mukwinga bakulwane bakakwendesha mulimo wakutendulula Litala lya Nyambi. Balevi ba ku Livumo lya Henandandi ba bayavwilenga.

¹⁰ Oho bakakuzika batatikile kuzika mwimbi wa Litala lya Nyambi, bakankombela hinga bavwala mu bivwalo byabo bakwalamine mu myanya yabo hinga bakwata zimpandula mu maboko wabo na Balevi bamu livumo lya Ashafwi bekalile kuyo hibambeta mikwashi. Bayemezele Nyambi ya Ngula ngonehe kufundiziza kuya bapanikiwile ku shikati sha Ndavita mwene wa Ishalela.

¹¹ Kami bembililenga na kuliyangushuna na kuyemeza Nyambi ya Ngula na kukambilila na ku bokela mazu wano ngayi, “Nyambi ya Ngula wamuwahe, kami nceshe zendi zenga za mwaya myaka ha Ishalela.” Bantu nimwabo bawulumwinine na ngovu zabo nimwazo na kuyemeza Nyambi ya Ngula, ndaba ngayi mwimbi wa Litala lya Nyambi wabalikiwile.

¹² Wingi wa bakulwane, bakankombela na Balevi na bakulwane ba mavumo aba bamonene Litala lya Nyambi lya kutatika, oho bapenzelenga ku mwimbi wa Litala lya Nyambi lyazikiwilenga, balilile naku kuwa. Ngoboni bamina aba bekalile kuyo bawulumwinine na ku wahilila.

¹³ Kowa muntu watweshele kutapulula mukati ka miyoyo ya kulila naku wulumwina kwa ku wahilila, ndaba miyoyo eye batendelenga yanenehele shikuma, pe yatweshele kuyuvwanika kwakutali.