Ezila 10 - Libuka Lya Kuyela

Biyongola bya kumanishilamo kuliyekela

¹ Oho Ezila alombelelenga na kulitabila, halila na kulivumba hanci, kumbili ya Litala lya Nyambi, likunge lyalinene lya Baishalela, balume na bambuyama na batwanuke bakungulukilile kukwendi, hibalila shikuma.

² Niho Shekaniya mwana Yehiyelu wamu livumo lya Elamu, wambile kuli Ezila ngayi, “Tunabipishi kuli Nyambi yetu ha kuyeka bambuyama ba muno mu litunga, ngoboni hinge shingi noho kulumbeza niko kushili ku Baishalela.

³ Haya tunafwanini kulimama na Nyambi yetu ngayi tulubule bambuyama aba na bana babo. Tukatenda ngonehe munatubele, obe na bamina aba ba kulemeeka ndayano za Nyambi. Tukatenda ngo mwayila ndayano za Nyambi.

⁴ Zinengi ngovu zobe, haya tenda omu ukushingila. Tunapenze kukwobe, likwatishe pe ushitende.”

⁵ Nohobene Ezila watatikilile kubakakutwaminina ba bakankombela na Balevi na bantu ba Ishalela nimwabo ngayi balibeze na kutenda ngonehe ahanganikile Shekaniya.

⁶ Niho Ezila afumine kumbili ya Litala lya Nyambi na kwingina mu litala lya Yehohanani mwana Eliyashimbu, pe wonzelelemo wushiku umo na kulihohoma na kulila ndaba ya kubula kwoloka kwa batampwa. Kaliha walile hinge kunwa mema.

⁷ Lizu lyatumiwile mu Yelushalema nimwamo namu Yunda, ngayi obo nimwabo balubuka mu wutampwa ba ku fwanina kukungulukila mu Yelushalema,

⁸ pe ha matena ahatu, ndi kukekala muntu eze akakwange kwiza, kuya na biyongola bya babilolo na bakulwane pe ukayanguliwa wuheti wendi nimwawo kami ufwako kuka labiwa kwinga umo wamu shikungulukilo sha batampwa.

⁹ Hakati ka matena ahatu, ha mutena wa 20 wa ngonda wa mutanu na zinaa, bantu nimwabo bekalilenga mu litunga lya Yunda na Mbenjamani, bezile ku Yelushalema pe bakungulukilile ha mbanza ya Litala lya Nyambi. Mvula walokelenga shikuma, noho ndaba ya mvula na kuliyakata kwa shiya shikungulukilo bantu nimwabo bakankilenga.

¹⁰ Mukankombela Ezila wemanine pe wambile kukwabo ngayi, “Enu bantu bakubula kulunga, enu munaleteshe wubi ha Ishalela ha kuyeka bambuyama ba mapukwenda.

¹¹ Hayaboni, yitabilenu wubi wenu kuli Nyambi ya Ngula Nyambi wa bankakazenu na kutenda shifungo shendi. Litapululenu ku naba bantu ba muno mu litunga kami lubulenu bakazenu aba bambuyama ba mapukwenda.”

¹² Bantu babilikizile na kukumbula ngayi, “Nimo, tukatenda nimwabyo obyo ukwamba.”

¹³ Ngoboni bambile kami ngayi, “Likunge lya bantu linanenehe kami mvula uli na kuloka shikuma. Kutwesha kwimana hano ha mbanza nehe tufwako. Eshe kaliha shinengi shuma shiya shikutwesha kutendiwa ha mutena umo hinge matena abili byo, ndaba wingi wetu nimwetu tuna bipishi shikuma ha shuma eshe.

¹⁴ Haya babilolo betu bekalile mu Yelushalema batilamine haneshe shambo. Niho muntu na muntu uli na mbuyama wa lipukwenda, mulehenu eze ha shikati shikemikiwa, hamo na bakakutwaminina na bakakuyata bamu munzi wendi. Mu nzila eye wukali wa Nyambi ha shuma eshe ukatula.”

¹⁵ Kowa muntu walwishile shihanganiko shiyo ndele Yonatana mwana Ashaheli na Yazeya mwana Tikiva nibo aba bemanine nabo bengile ba Meshulama na Shambetayi wa Kalevi.

¹⁶ Aba balubukile ku wutampwa betabilile ku shihanganiko eshe, nohobene Ezila mukankombela wemikile balume mukati ka bakulwane ba mavumo, pe mazina wabo atikitiwile. Ha mutena wakutatika wa ngonda ya wulikumi batatikile ku shingishisha kwabo,

¹⁷ pe bamanishile ku shingishisha ha byambo bya balume ha bambuyama ba mapukwenda ha mutena wakutatika mu ngonda ya kutatika.

Balume aba bekalile na bakazabo ba mapukwenda

¹⁸ Hakati ka bazukulya bakankombela, aba bayekele bambuyama ba mapukwenda. Muhoko wa mazina a bihemunwino bya bakankombela. Ku lupashi lwa Yoshuwa na bakonzobendi, bana ba Yehozandaki kwatikitiwile Mayasheya na Eliyeza na Yalimbu na Ngendaliya.

¹⁹ Bakulupishile kulubula bakazabo, pe batupwile shikungwe wa mbelele kwinga ntupu ya ha wubi wabo.

²⁰ Ku livumo lya Imele, bengile Hanani na Zembandiya.

²¹ Ku livumo lya Halimu bengile Mayasheya na Eliya na Shemaya na Yehiyelu na Uziya.

²² Ku livumo lya Pashiha bengile Eliyonayi na Mayasheya na Ishimaele na Natanele na Yozambandi na Elisa.

²³ Hakati ka mavumo aba Balevi bengile Yozambandi na Shimeyi na Kalaya niye watumbiwile (kami ngayi Kelita) na Petahiya na Yunda na Eliyeza.

²⁴ Ku bakakwimbila wengile Eliyashimbu. Kubakakulama mapangati a Litala lya Nyambi bengile Shalumu na Telemu na Uli.

²⁵ Hakati ka mavumo a Baishalela bamina, ku livumo lya Paloshi bengile Lamiya na Iziya na Malikiya na Miyamini na Eliza na Malikiya na Mbenaya.

²⁶ Ku livumo lya Elamu bengile Mataniya na Zakaliya na Yehiyelu na Ambindi na Yelemoti na Eliya.

²⁷ Ku livumo lya Zatu bengile Eliyonayi na Eliyashimbu na Mataniya na Yelemoti na Zambandi na Aziza.

²⁸ Ku livumo lya Mbembayi bengile Yehohanani na Hananiya na Zambayi na Atilayi.

²⁹ Ku livumo lya Mbani bengile Meshulama na Maluki na Andaya na Yashuba na Shela na Yelemoti.

³⁰ Ku livumo lya Pahati Mowambi bengile Andina na Kelale na Mbenaya na Mayasheya na Mataniya na Mbezalela na Mbinuyi na Manashe.

³¹ Ku livumo lya Halimu bengile Eliyeza na Ishiya na Malikiya na Shemaya na Shimiyoni,

³² na Mbenjamani na Maluki na Shemaliya.

³³ Ku livumo lya Hashumi bengile Matenayi na Matatahi na Zambandi na Elifweleti na Yelemayi na Manashe na Shimeyi.

³⁴ Ku livumo lya Mbani bengile Maandayi na Amalama na Uyelu

³⁵ na Mbenaya na Mbendiya na Keluhi

³⁶ na Vaniya na Melemoti na Eliyashimbu

³⁷ na Mataniya na Matenayi na Yaashu.

³⁸ Ku livumo lya Mbani na Mbinuyi bengile Shimeyi

³⁹ na Shelemiya na Natani na Andaya

⁴⁰ na Makinandebayi na Shashayi na Shalayi

⁴¹ na Azalelu na Shelemiya na Shemaliya

⁴² na Shalumu na Amaliya na Yoshefwa.

⁴³ Ku mavumo a Nembo bengile Yeyiwelu na Matitiya na Zambandi na Zembina na Yandayi na Yowele na Mbenaya.

⁴⁴ Balume nimwabo bayekele bakazi ba bambuyama ba mapukwenda babalubwile na bana babo ngayi bayenga.