Ezila 1 - Libuka Lya Kuyela

Mwene Shilushi ukutongweza Bayunda ngayi baboke ku Yelushalema

¹ Mu mwaka wakutatika uya Shilushi wamu Pesha ashwanine kwinga mwene wamunene Nyambi ya Ngula washumishile lizu elye ambile muli muluwe wendi Yelemiya ngayi linge lya kupwisha. Wapanine Shilushi kubilika na kutikita na kutuma mu matunga a wene wendi nimwawo likalabiwe na kubilikiwa ngayi,

² “Eze nizo ndayano za Shilushi mwene wamunene wamu Pesha. Nyambi ya Ngula, Nyambi wa Muyilu, unanyaka kwinga kalela wa hano hanci nimwaho. Unampana ngovu za kumuzikila litala mu Yelushalema mu litunga lya Yunda.

³ Haya enu nimwenu bantu ba Nyambi bakushinga ku boka, yenu ku Yelushalema mu Yunda, pe Nyambi ya Ngula, Nyambi yenu mwanga akekale hamo nanenu. Mukatendulule Litala lya Nyambi ya Ngula, Nyambi wa Ishalela, niye Nyambi Ou ukulemeshiwila mu Yelushalema.

⁴ Ndi ku bali bamo mukatikenu bashili mu wutampwa muno mu litunga bakushinga kuyavwiwa ngayi baboke mu litunga lyabo, bandambo babo ba ku fwanina ku bayavwa. Banafwanini kubapana shiliva na ngolinde na byuma byaha mukala na bimuna hamo na zintupu za kutupula mu Litala lya Nyambi mu Yelushalema.”

⁵ Niho bakulwane ba ku mavumo a mishobo ya Yunda na Mbenjamani na bakankombela na Balevi na bantu nimwabo aba Nyambi ashingilenga ngayi baboke, baliwahishilile kuya mu kutendulula Litala lya Nyambi ya Ngula mu Yelushalema.

⁶ Bandambo babo nimwabo babayavwile na kubapana byuma byabingi shikuma, byengile bya Shiliva na ngolinde na byuma byaha mukala na bimuna hamo na byamina byabilemu shikuma na zintupu za kutupula mu Litala lya Nyambi.

⁷ Mwene Shilushi wababweshelele zindonga za kukunama na zinkomoki ebye ashimbile Mwene Nembukandineza mu Yelushalema na kubiyaka mu litala lya banyambi bendi.

⁸ Shilushi mwene waku Pesha wabipanine kuli Mitilendati mukulwane waku mfuma ya wene, ou wabilabilile Sheshimbaza kalela wamu Yunda.

⁹ Wingi wabyo, byengile zindonga za kukunama za ngolinde 30 na zindonga za kukunama za shiliva 1,000, hamo na zindonga zamina za kukunama zengile 29.

¹⁰ Zindonga za ngolinde zazishe za kukunama zengile 30 na zindonga za shiliva zazishe za kukunama zengile 410 hamo na bitendesho byamina 1,000.

¹¹ Bya kuliyavwisha nimwabyo bya ngolinde nabya shiliva na byamina byengile 5,400. Ebye nimwabyo Sheshimbaza wayile nabyo oho niye na batampwa bamina bafumine ku Mbambiloni kuya ku Yelushalema.