Ezekiyele 9 - Libuka Lya Kuyela

Yelushalema ukushushuliwa

¹ Niho nayuvwile Nyambi habilikiza ngayi, “Yekenu kuno, enu balume mu kuya na kushushula lukena. Letenu bilwisho byenu.”

² Wanguwangu balume mutanu na umo bafuminine kunyima ya lipangati lya ku ncelele lya ku Litala lya Nyambi, umo na umo kukwabo washimbile shilwisho mu shipushu. Hakati kabo hekalile mulume wavwalile likwiza lya kulelema lyaliwahe, hinga ashimba shuma sha kutikitisha. Nimwabo bezile na kwimana ku kaala ka lubemba.

³ Niho kubyazima kwa wuwahe wa Nyambi wa Ishalela kwakatukile kufuma ha makelumbi a mbando, oku kwekalile na kuya ku menginino a Litala lya Nyambi. Nyambi ya Ngula wehanine mulume wavwalile likwiza lya kulelema lyaliwahe, uya wekalile na byuma bya mukakutikita

⁴ pe wambile kukwendi ngayi, “Yanga mu lukena nimwalwo lwa Yelushalema na kuyaka lushato ha zimpala za bantu nimwabo aba bakuyandishiwa na kulila ndaba ya byuma bya wunyengwe nimwabyo bikutendiwa mu lukena.”

⁵ Nayuvwile kami Nyambi amba ku balume bamo ngayi, “Mukonkenu mu lukena mukamuzihe. Hinga mukashiyaho muntu, hinge ku muyuvwila nceshe.

⁶ Zihenu balume babakulwane, bandumbana, batunkanga, bamandizabo na batwanuke. Ngoboni hinga mukwata muntu nimwendi uli na lushato mu lupala. Tatikilenu kuno ku litala lyami. Niho batatikile na bantwamina aba bemaninenga kuyo ku Litala lya Nyambi.”

⁷ Nyambi wambile kukwabo ngayi, “Bipishenu litala lyami ha kwinzalisha mituntu ya bantu ba kufwa. Tendenu milimo.” Nohobene, batatikile kuziha bantu mu lukena.

⁸ Oho bazihilenga bantu nashalile kuyo ninkayami, pe nashinkamine hinga nakinka lupala hanci na kubilikiza ngayi, “Obe Nyambi ya Ngula, kati unapilamini Yelushalema ngayi ulobeshe bantu nimwabo aba banashala mu Ishalela ndi?”

⁹ Nyambi wakumbwile ngayi, “Bantu ba Ishalela na Yunda banatende wubi wawunene shikuma. Litunga nimwalyo linenzala na mukeza kami lukena lunenzala na mishunga. Banakwamba ngayi, ‘Nyambi ya Ngula unafutamini litunga, kami kutumona wufwako.’

¹⁰ Nohobene Ami nifwako kuka bayuvwila nceshe nikababweshela ebye banatende ku baminabo.”

¹¹ Niho uya mulume wavwalile likwiza lya kulelema lyaliwahe abokele washimikile ncango zendi ngayi, “Natende eshe mwamba.”