Ezekiyele 7 - Libuka Lya Kuyela

Kukotoka kwa Ishalela kuli hahepi

¹ Nyambi ya Ngula wambile kukwami ngayi,

² “Mwana muntu, eshi nili na kwamba Ami Nyambi ya Ngula ku litunga lya Ishalela, oku niko kukotoka kwa litunga nimwalyo.

³ “Ishalela kukotoka kwobe kwezakale, ukayuvwa kupilama kwami, nika kuyata kunebye watendele. Nikakushushula kuya na biya bya wunyengwe mwatendele.

⁴ Nifwako kuka kuleha hinge kukuyuvwila nceshe, ngoboni nika kushushula ha byuma bya wunyengwe biya watendele, pe ukalimuka ngayi Ami nili Nyambi ya Ngula.”

⁵ Eshe nisho ali na kwamba Nyambi ya Ngula ngayi, “Kunyima ya makando kukeza kami amina kukwenu.

⁶ Kukotoka kwezakale, kukotoka kuya kwezakale, mutena unakushintikizi. Haya walobakale.

⁷ Kukotoka kwezakale hahenu enu bantu mwekala mu litunga, shikati shinakumu, mutena uli hahepi, mutena wa lumpa, kaliha mutena waku wahilila na kutangala ha mapili.

⁸ “Wuluno mukayuvwa wulemu wakupilama kwami, Ami nili na kumiyata kunebye mwatendele. Ami nikamishushula ku bya wunyengwe biya mwatendele.

⁹ Nifwako kukamileha hinge kumiyuvwila nceshe, nikamishushula ku byuma bya wunyengwe biya mwatendele, pe mukalimuka ngayi Ami nili Nyambi ya Ngula, kami ngayi Ami namishushulanga.

¹⁰ “Mutena wa makando uli na kwizilila Ishalela. Kuluwa kwa bantu na kuliyemeza kuli na kuhanya ngo maluba.

¹¹ Makando ali na kututwisha kuluwa kwakwingi, kowa hakati kabo shuma shikashalaho, hinge wuheti, hinge ku wuwahe wabo.

¹² “Shikati shakumakale, mutena uli hahepi. Mukakulanda hinga awahilila na mukakulandisha hinga alila, ndaba wukali wa Nyambi ukawila ha muntu nimwendi.

¹³ Ndaba mukakulandisha wufwako kukatwesha kukaboka kunebye analandishi, oho bashili na kuyoya ndaba wukali wa Nyambi ukawila muntu nimwendi, pe bakawubi bafwako kutwesha kupuluka.

¹⁴ Bashibile mpandula, pe nimwabo ba kuliwahisha, ngoboni kowa muntu wakuya ku nzita, ndaba wukali wami ukawila bantu nimwabo.”

¹⁵ “Bantu bali na kulwa nzita ha munkanda, malweli na nzala bili mumatala, muntu nimwendi uli ha munkanda ukafwila mu nzita na muntu nimwendi uli mu lukena ukafwa ku nzala naku malweli.

¹⁶ Ndi kuli bamo bakapanza bakatinina ku mapili matela ku mikulo anatinishiwi, ngoboni ndaba ya wubi wabo bakafwa.

¹⁷ Maboko a muntu nimwendi akapopa na manungo wabo akakanka.

¹⁸ Bakavwala mincangwe, kami nibo bakakanka nimwabo, mitwe yabo yikashehiwa nibo kami bakayeneshiwa.

¹⁹ Bakayumbila shiliva na ngolinde yabo mu mikwakwa ngo byuma byowa, ndaba shiliva hinge ngolinde yifwako kuka balamwina ku wukali wa Nyambi ya Ngula. Nibo kutwesha bafwako kwikutisha mahungu wabo hinge kwikutisha mavumo wabo. Byengile ngo shipukalisho kukwabyo.

²⁰ Baliyemezelenga na bya kuliyenga byabiwahe, ngoboni balivwishilangabyo mukutenda tunankishi twa wunyengwe. Nohobene nisho Nyambi ya Ngula aleteshele wuheti wabo kwinga wawunyengwe kukwabo.”

²¹ Nyambi ya Ngula wambile ngayi, “Nikabipana ku bayeni kwinga nkabo naku bantu bakuluwa naku wubipisha.

²² Ami nifwako kutwalako bihanganiko, oho Litala lyami likubipishiwa hinge oho bezi bakalitubula na kwinginamo na kulibipisha.

²³ “Byuma nimwabyo binapocakana, litunga linenzala na bakakuziha na zinkena zinenzala na mishunga.

²⁴ Nikaleta bantu ba mikoka yayibi shikuma kuno na kubaleha mwanga bashimbe minzi yenu. Balume ba kushuma bakayawa kuliyemeza kwabo oho nikaleha mikoka yikabipisha myanya ya kuyela eye mwalemeshelanga.

²⁵ Oho makando akeza, bakashinga ku mwena ngoboni kaliha bakawanako.

²⁶ Makando akukonka amina makando, ncango zazibi kukonka ncango zamina zazibi. Bantu bakanyepa bamiluwe ngayi babalubulwile ebye ba ku mona, bakankombela bakabula bya ku longesha bantu na bantwamina bakabula bya ku fwanina kwambila.

²⁷ Mwene ukalila na bana ba bamyene kulumbeza kwabo kukamana na bantu bakakanka na bowa. Nikabashushula ku nimwabyo biya batendele. Nikabayata ngonehe eshe bayatile baminabo, pe bakalimuka ngayi Ami nili Nyambi ya Ngula.”