Ezekiyele 5 - Libuka Lya Kuyela

Ezekiyele ukusheha huki kwinga shilimukisho sha ku shushuliwa

¹ Nyambi ya Ngula wambile ngayi, “Mwana muntu, shimba mukwale wawutwe uliyavwishe ha ku sheha mulevu wobe na huki zobe nimwazo. Niho ufwanikize huki zobe na shipimisho pe utapezo mu zimbalila zihatu.

² Uhokeshe shiketu sha wuhatu shazo mu lukena oho nzita yakamana. Ukashimbeho zimina pe ukaziketozole na mukwale wobe, oho ukazingulukanga lukena. Ukayumbile zinashalaho ku nozo muyilu pe ami nikazilwisha na mukwale wami.

³ Ukatenteke zihuki zazishe pe ukalivungilezo mukati ka mungundo wa bivwalo byobe.

⁴ Pe ukatutwisheko zazishe kukwazo kami, ukaziyumbile mu mundilo pe ukazilehe zikahokenga. Mundilo ukafumaho ukapanzanina ku mukoka nimwawo wa Ishalela.”

⁵ Nyambi Mpandashilanga wambile ngayi, “Mona, Yelushalema namuyaka hakati ka kaye na matunga amina hinga amuzinguluka.

⁶ Ngoboni Yelushalema wakananganine ndayano zami na kufutuka kwinga wamubi shikuma kupitakana mikoka yamina, wakubula kwombatala shikuma kupitakana matunga anamuzinguluku. Yelushalema wakanine ndayano zami na kubula kuzombatala.

⁷ Haya yuvwilila obe Yelushalema kunebye nili na kwamba, Ami Nyambi ya Ngula, ha kubula kwombatala hinge kukonka ndayano zami, munaliletelele ukalu kupitakana matunga anamizinguluku. Enu munakonko ndayano za matunga amina.

⁸ Nohobene Ami Nyambi ya Ngula, nili na kumitongweza ngayi, Ami nili kamalamo wenu. Nikamiyata oku matunga nimwawo amimona.

⁹ Mukutendanga byuma bya wunyengwe, nohebene Ami nikashushula Yelushalema nehe nabulile kutenda pe nifwako kukashitenda kami.

¹⁰ Nohobene, bahemi ba mu Yelushalema bakalya banababo na banababo kami bakalya bahemizabo. Nikamishushula pe aba bakashalaho babomi bakapanzanina mu zimbalila nimwazo.

¹¹ “Nohobene, nehe nenga Nyambi wakuyoya, elye nilyo lizu lya Nyambi ya Ngula ndaba mwazilwile Litala lyami na wubi nimwawo, byuma nimwabyo bya wunyengwe mwatendelenga, Ami nikamiketwila hanci kwakubula nceshe.

¹² Bantu ba shitika sha wuhatu bakafwa ku malweli a kubula kupangiwa na kukapande, bamina bakaketuliwa na mikwale ha munkanda wa lukena. Nikapanzanishila bamamaninino mu zimbalila nimwazo na kubakonka na mukwale.

¹³ “Mukayuvwa wukali na kupilama kwami, hantu noho nikalibela. Oho nimwabyo byakamoneka enu mukalimuka ngayi Ami Nyambi ya Ngula ukumilwisha ndaba ya kubula kupwisha kwenu.

¹⁴ Muntu nimwendi wakufuma ku matunga aya anamizinguluku ou ukupita kwakwipi nanenu ukamihepa na kumyongoloka kupitila kwakutali.

¹⁵ “Oho nikapilama na kukaliha nanenu na kumishushula, matunga nimwao anamizinguluku akakanka. Akatilamina kukwenu na nkole na kumi hengamina. Eshe nisho akwamba Nyambi ya Ngula.

¹⁶ Nikashepesha ku byakulya byenu na kumi lehela ngayi mufwe ku nzala. Mukayuvwa eshe yakolanga nzala ngonehe munayahiwi mivwi yayitwe ya kumilobesha.

¹⁷ Nikatuma nzala na tuyamana ba lishaka mu kuziha banabenu, nikatuma malweli a kubula kupangiwa na mishunga na nzita mu kumiziha.” Eshe nisho ninamba Ami Nyambi ya Ngula.