Ezekiyele 48 - Libuka Lya Kuyela

Kutapa kwakuya kwa Litunga Hakati ka Mishobo

¹ Awa niwo mazina a mishobo ya Ishalela, kutatika ku nginza yaku ncelele ya kufuma ku liziba lya Menditelenyani ku munzi wa Hetiloni, kuya ku Hamati Pashi, kuya ku munzi wa Haza Enani, kuya naku nginza ya mukati ka wene wa litunga lya Ndamashika na Hamati. Mushobo nimwawo uli na kutambula shiketu shimo sha litunga sha kufuma ku nginza yaku mushamuko kuya ku nginza ya ku mponci, mu nzila eye ya kufuma ku ncelele kuya ku mabukubuku shikenga sha Ndani.

² Asha ukatambula shiketu shimo sha litunga, eshe shikatenda nginza na litunga lya Ndani kufuma ku mushamuko kuya ku mponci.

³ Nafwitali ukatambula shiketu shimo sha litunga, eshe shikatenda nginza na litunga lya Asha kufuma ku mushamuko kuya ku mponci.

⁴ Manashe ukatambula shiketu shimo sha litunga, eshe shikatenda nginza na litunga lya Nafwitali kufuma ku mushamuko kuya ku mponci.

⁵ Efulemu ukatambula shiketu shimo sha litunga, eshe shikatenda nginza na litunga lya Manashe kufuma ku mushamuko kuya ku mponci.

⁶ Lubena ukatambula shiketu shimo sha litunga, eshe shikatenda nginza na litunga lya Efulemu kufuma ku mushamuko kuya ku mponci.

⁷ Yunda ukatambula shiketu shimo sha litunga, eshe shikatenda nginza na litunga lya Lubena kufuma ku mushamuko kuya ku mponci.

Shiketu shashiwahe sha mukati ka Litunga

⁸ Kutenda nginza na litunga lya Yunda kufuma ku mushamuko kuya ku mponci shikenga shiketu eshe mukafungwila, muwipi walyo likenga makilomita likumi na abili pe kami wutali umo ku mushamuko kutwala ku mponci ngonehe shitapilo shinapanikiwi ku mishobo. Litala lya Nyambi ya Ngula likekala hakati.

⁹ Hakati ka nou mwanya, shiketu shimo sha litunga shikafunguliwa kuli Nyambi ya Ngula ukenga mukala wa makilomita likumi na abili mu wutali na makilomita likumi muwipi.

¹⁰ Bakankombela bakekala na shitapilo ku litunga elye lya shizila, kufuma ku mushamuko kuya ku mponci shiketu shabo shikenga mukala wa makilomita 12.5 mu wutali na makilomita mutanu muwipi kufuma ku ncelele kuya ku mabukubuku. Pe Litala lya Nyambi ya Ngula likekale mukati.

¹¹ Mwanya ou wa kuyela ukenga wa bakankombela bazukulya Zandoki, aba bombatalile ndayano zami kaliha bakonkele baka Ishalela mukutenda byabibi, ngonehe batendele Balevi.

¹² Nohobene bakawana mwanya wa litunga kwakwipi na mwanya wamina wa Balevi, bakawana kami niwo ukenga wa kuyela shikuma kupitakana nimwayo.

¹³ Balevi bakawana mwanya shiketu shikale hahepi na shiketu sha bakankombela. Muwutali shiyinge makilomita 12.5, muwipi shiyinge sha makilomita mutanu kufuma ku ncelele kuya ku mabukubuku.

¹⁴ Litunga linafunguliwi kuli Nyambi ya Ngula linengi litunga lyaliwahe kupitakana nimwawo, kami kowa muntu ukafwanina kulandishalyo, hinge kutambashanalyo, hinge kunungulwila ku muntu wamina.

¹⁵ Mwanya uya unashala, unengi mukala wa makilomita 12.5 mu wutali na muwipi makilomita abili na shiketu sha kilomita, kaliha sha kuyela ngoboni bantu bakaliyavwisha nimwabo. Bakatwesha kwikalamo hinge kuliyavwisha liya litunga lili hakati.

¹⁶ Kami likenga lya kulingana zimbalila nimwazo, mukala wa mamita 2,250 kumbalila na mbalila.

¹⁷ Pe kuzinguluka zimbalila nimwazo za munzi kukekala mwanya wakubula shimina wazintambo za mamita 125 mbalila na mbalila.

¹⁸ Litunga lyashalileko oho munzi watendiwakale ha mwanya wa hambalila ya mwanya wa kuyela, mukala wa makilomita mutanu mu wutali na makilomita abili na shitika sha kilomita muwipi kumbalila ya mushamuko. Makilomita mutanu mu wutali na makilomita abili na shiketu sha kilomita muwipi ku mabukubuku, nilyo bakaliyavwisha kwinga mafuba ku bantu bakwikalamo.

¹⁹ Muntu nimwendi wekalanga mu munzi, howa ndaba hinge mushobo wa Ishalela, niye ukalimanga muya mu litunga.

²⁰ Nohobene, zimbalila nimwazo za mukati ka nou mwanya bafungwile kwinga wa kuyela, ukalingane mbalila na mbalila makilomita 12.5, kuwezelelako na mbalila ya munzi.

Litunga lya Kalela

²¹ Litunga lyashalaho ku mbalila yaku mushamuko naku mponci likenga lya Kalela. Litunga lyendi likakuma ku mushamuko wa mushinzi wa Yondana na ku mponci ku liziba lya Menditelenyani. Hakati ka litunga lyendi hakekale litunga lyami lya kuyela na Litala lya Nyambi ya Ngula,

²² hamo na shitapilo sha Balevi na lukena lwa Yelushalema. Ku nginza yaku ncelele ku litunga lya mwana mwene likenga litunga lya Yunda, pe litunga lili ku nginza ya mabukubuku likenga litunga lya Mbenjamani.

Litunga lya Mishobo Yamina

²³ Ngoboni mishobo iya yinashalili, kufuma ku mbalila yaku mushamuko kuya ku mponci, Mbenjamani ukatambulako shiketu sha litunga lyendi.

²⁴ Kutenda nginza na litunga lya mushobo wa Mbenjamani, kufuma ku mbalila ya mushamuko kuya ku mponci, Shimiyoni ukatambulako shiketu sha litunga lyendi.

²⁵ Kutenda nginza na litunga lya Shimiyoni, kufuma ku mbalila ya mushamuko kuya ku mponci, Ishaka ukatambulako shiketu sha litunga lyendi.

²⁶ Kutenda nginza na litunga lya Ishaka, kufuma ku mbalila ya mushamuko kuya ku mponci, Zembuloni ukatambulako shiketu sha litunga lyendi.

²⁷ Kutenda nginza na litunga lya Zembuloni, kufuma ku mbalila ya mushamuko kuya ku mponci, Ngandi ukatambulako shiketu sha litunga lyendi.

²⁸ Kutenda nginza na litunga lya Ngandi, kuya ku mabukubuku, nginza yikapita kufuma ku Tamale kuya ku mema a Melimba Kandeshi, nginza yaba ka Engepita kukuma ku liziba lya Menditilenyani.

²⁹ Eye niyo nzila mu ku fwanina kutapilamo litunga shiketu na shiketu ku Baishalela kwinga likona lyabo. Eshe nisho na kwamba Ami Nyambi ya Ngula.

Mapangati amu Yelushalema

³⁰ Awa niwo mapangati amu lukena. Kumbalila ya ku ncelele akenge mamita 2,520 akekale na mapangati ahatu ku mbalila ya kembi nimwako.

³¹ Mapangati a minzi atumbiwe mazina a bantu baishalela, pe mapangati ahatu aku ncelele akatumbiwe mazina ngayi lipangati lya Lubena, lipangati lya Yunda na lipangati lya Levi.

³² Kumbalila yaku mushamuko kembi kakenge mamita 2,520, pe kakekale na mapangati ahatu akatumbiwa mazina ngayi lipangati lya Yoshefwa, lipangati lya Mbenjamani na lipangati lya Ndani.

³³ Kumbalila yaku mabukubuku, yikufwanikiziwa mamita 2,520, pe kakekala na mapangati ahatu akatumbiwa mazina ngayi lipangati lya Shimiyoni, lipangati lya Ishaka na lipangati lya Zembuloni.

³⁴ Kumbalila yaku mponci, yikufwanikiziwa mamita 2,520, kakekala na mapangati ahatu akatumbiwa mazina ngayi lipangati lya Ngandi, lipangati lya Asha na lipangati lya Nafwitali.

³⁵ Wutali nimwawo wakuzinguluka kembi zimbalila nimwazo zinaa yengile mamita 9,000. Lizina lya luya lukena kufuma hano kutwala kumbili likatumbiwa ngayi, “NYAMBI YA NGULA ULI KUYO.”