Ezekiyele 46 - Libuka Lya Kuyela

Mwene na Bimbo

¹ Nyambi ya Ngula wambile ngayi, “Lipangati lya ku mushamuko lya kuya ku shipango sha mukati linafwanini ku shinkiwa ha matena mutanu na umo akutenda milimo, ngoboni mwafwanina ku shinkulula lipangati ha mutena wakukatala na ha shimbo sha kutelama kwa ngonda.

² Mwana mwene ukengina mu shipango sha shikwinji kufuminina ha munkanda, kwiza na kwimana kunkumo ya zimpangwa. Bakankombela bakakombelela na kutupula ntupu ya kulilumikila. Kuyo ku lipangati niye uku fwanina kulemesha, pe niho aboke ha munkanda. Lipangati lifwako ku fwanina ku shinkiwa hantu ku mazolo.

³ Ha mutena nimwawo wakukatala naha kutelama kwa ngonda bantu nimwabo kami bakashintama na kulemesha Nyambi ya Ngula hambili ya liya lipangati.

⁴ Ha mutena wakukatala mwana mwene uku fwanina kutupula kuli Nyambi ya Ngula bambelele mutanu na yimo na shikungwe bakubula nyanco.

⁵ Hamo na shikungwe nimwendi, mwana mwene uku fwanina kutupula ntupu ya mpeka ya kulingana makilongilamu 9, hamo na bana babambelele niye uku fwanina kutupula mu wingi omu akushingila nimwamo, niye ukaleta mishashi yihatu ya mazi a olive.

⁶ Ha shimbo sha kutelama kwa ngonda, mwana mwene ukakombelela nkunzi wamushe na bana ba bambelele mutanu na umo na shikungwe wa mbelele nimwabo bakubula nyanco.

⁷ Ntupu ya mpeka yikenga shitika sha ntumba ha nkunzi nimwendi na shikungwe nimwendi na nimwabyo ebye akushinga kupana. Mishashi yihatu ya mazi a olive akapanikiwa na shitika nimwasho sha ntupu ya mpeka.

⁸ Mwana mwene ha kwingina nafwanini kwinginina ha munkanda wa lipangati na nzila ya kampenci kakanene, na kututikila na nzila eye engininine.

⁹ “Oho bantu bakwiza mu kulemesha Nyambi ya Ngula ha shimbo nimwasho, obo bakwinginina na lipangati lya ku ncelele nibo bakatutikila na lipangati lya ku mabukubuku, obo bakwingina na lipangati lya mabukubuku bakatutikila na lipangati lya ku ncelele. Kowa muntu ukafwanina kututikila na lipangati elye anayinginini, ngoboni muntu nimwendi uku fwanina kututikila ku lipangati lya kuyahikiza.

¹⁰ Mwana mwene ukekala hakatikabo, akengina mukati nabo kami bakwingina mukati, oho akututika nabo kami ba kututikila hamo nendi.

¹¹ Ha matena akupinga shimbo na matena a bimbo, ntupu ya mpeka yikenga shitika sha ntumba ku nimwendi nkunzi hinge shikungwe wa mbelele. Bakakulemesha bakapana ebye bakushinga kupanika ha mwana mbelele nimwendi. Mishashi yihatu ya mazi a olive yikapanikiwa ku shitika nimwasho sha ntumba.

¹² “Oho mwana mwene akushinga kupanika ntupu ya shishemo kuli Nyambi ya Ngula, hinge ntupu ya kuhokeshiwa hinge ndi ntupu ya kulilumikila lipangati lya ku mushamuko lya kuya ku shipango sha mukati bakamushinkwililalyo.”

Zintupu za ha Mutena ha Mutena

¹³ Nyambi ya Ngula wambile ngayi, “Ha mutena ha mutena shikati nimwasho sha lumenemene, uku fwanina kutupula kuli Nyambi mbelele wa mwaka umo kwinga nkombela wakubula nyanco.

¹⁴ Hamo na ntupu ya mpeka ya wulemu wa mutanu wa muhunga wa loto, yikutendiwa lumenemene nimwalwo, hamo na lita yimo ya mazi a olive yakufungilisha hamo na muhunga wa loto. Ndayano eze za ha kutupula ntupu ya mpeka kuli Nyambi ya Ngula zikekalako shikati nimwasho.

¹⁵ Nohobene uku fwanina kutupula mwana mbelele, muhunga wa loto na mazi a olive lumenemene na lumenemene mwaya myaka.”

Mwene na Litunga

¹⁶ Nyambi ya Ngula ukwamba ngayi, “Ndi mwene uya uli na kulela ukupana ndoba yendi yimo ku umo ha bana bendi, nilyo likenga lya uya mwanakwinga shiketu sha ntutu ya ba lupashi lwendi.

¹⁷ Ngoboni ndi mwana mwene mukakulela akupanika ku umo wa bakamilimo bendi ku litunga lyendi, nilyo likenga wuheti wa mwana mwene kami oho mwaka wakukuliza wakeza litunga lika boka kuli mwana mwene. Nilyo linengi lyendi, ndele niye na bana bendi nibo banafwanini kuliheta mwaya myaka.

¹⁸ Mwene kaliha nafwanini kushimba wuheti nimwawo wa bantu. Ndi kuli litunga limina akushinga kupana ku bana bendi, lyafwanini kwinga litunga lya kundama kukwendi, ngayi hinga ayandisha bantu bami ha ku bayangula litunga lyabo.”

Binzanza bya ku Litala lya Nyambi ya Ngula

¹⁹ Niho muntu antwalile ku menginino a tumpenci kwakwipi na lipangati, otu tunengi tumpenci twa kuyela twa bakankombela. Wenikile mwanya kumbalila ya mushamuko ya tumpenci

²⁰ na kwamba ngayi, “Ou niwo mwanya bakankombela bakatelekela nyama eye bakatupula kwinga ntupu ya ha wubi hinge ya kulilumikila na kuyoha zintupu za muhunga wa loto, nohobene ngayi kowa sha kuyela shikutwaliwa ha munkanda wa shinzanza sha shipango, oku shikutwesha Kubipisha.”

²¹ Niho antwalile ku munkanda wa shinzanza sha shipango na ku monesha ngayi zinkomi nimwazo ha zimbalila zinaa zekala na shinzanza.

²² Mu zinkomi nimwazo zinaa kwekalile tunzanza twatushe, otu twengile mamita 20 mu wutali na mamita 15 muwipi.

²³ Kamo na kamo kekalile na kembi ka limanya kazingulukako na myanya ya maziko azikiwile ku kembi.

²⁴ Niho ou muntu wantongwezele ngayi, “Ebye nibyo binzanza oku bakamilimo yamu Litala lya Nyambi bakatelekelanga zinkombela eze bantu bakatupulanga.”