Ezekiyele 45 - Libuka Lya Kuyela

Shitapilo sha Litunga sha Nyambi

¹ Oho litunga likutapiwa kupanika shiketu ku mushobo na mushobo, shiketu shimo shikakoweziwe kwinga sha Nyambi ya Ngula. Shinafwanini kwinga sha zintambo za makilomita 12.5 mu wutali na makilomita 10 muwipi. Ou mwanya ukenga wa kuyela.

² Mukati ka shiketu eshe, mwanya wa mamita 250 mbalila nimwayo ukenga mwanya wa Litala lya Nyambi ya Ngula. Kuzinguluka mwanya nimwawo ukenga wa zintambo za mamita 25.

³ Shiketu sha mwanya, ufwanikize mwanya wa makilomita 12.5 mu wutali na makilomita mutanu muwipi, ha mwanya ou hakekala Litala lya Nyambi ya Ngula, mwanya wa kuyela kupitakana myanya nimwayo.

⁴ Shikenga shiketu sha kuyela sha litunga shinapanikiwi bakankombela, aba ba kutenda milimo mu Litala lya Nyambi ya Ngula. Ukenga mwanya ukekala matala abo na Litala lya Nyambi ya Ngula.

⁵ Shiketu shimina sha zintambo makilomita 12.5 mu wutali washo na makilomita mutanu muwipi shikenga sha Balevi bakakutenda milimo mu Litala lya Nyambi ya Ngula, oku niko kukekala na minzi yabo.

⁶ Hahepi na mwanya wa kuyela, kwekalile kami mwanya wamina wakulingana zintambo makilomita 12.5 mu wutali na makilomita abili na shitika, mwanya bawushiyile kwinga mwanya wakwikala bantu ba Ishalela.

Litunga lya Mwana mwene

⁷ Shiketu shimina sha litunga shikenga sha kalela. Kufuma ku mwanya wa kuyela na ku lukena likakuma ku mponci kuya ku liwate lya Menditilenyani naku mushamuko ku nginza kulwa mushamuko. Kufuma ku mushamuko kuya ku mponci nilyo likenga lya kwezekela hamo mu wutali kwinga ngo limo ku myanya yapanikiwile ku mishobo ya Ishalela.

⁸ Mwanya ou ukenga shitapilo sha mwana mwene mu litunga lya Ishalela, ngayi niye wufwako kami kukayandisha bantu, ngoboni akalehe litunga nimwalyo likashalako kwinga lya mishobo ya baka ishalela.

Ndayano kuli mwene

⁹ Nyambi ya Ngula ukwamba ngayi, “Enu batulela ba Ishalela, munabipishi shikati shashitali shikuma. Lehenu mishunga na shilala. Tendenu byakwoloka na kupwisha. Enu ku fwanina kami kutanda bantu bami mu litunga lyabo mufwako. Eshe nisho ninamba ami Nyambi ya Ngula.

¹⁰ “Muntu nimwendi uku fwanina kuliyavwisha bipimisho na bifwanikizo bya kupwisha.

¹¹ Mpingwilisho ya kufwanikiza byuma bya kuyuma yikulifweka na mpingwilisho ya byuma bya kubombola. Pe mpingwilisho eye yenga Homele, pe mwaku fwanina kutendela nehe, Homele yimo maefwa likumi, hinge ngayi zintumba likumi.

¹² “Wulemu wa byuma uku fwanina kwinga nehe, mangelashi akulingana makumi abili, akenge shekela yimo, mashekela 60, akenge mita yimo.

¹³ “Eze nizo zintupu mukatupula, shitika shimo sha 60 sha loto, shitika shimo sha 60 sha luku.

¹⁴ Unafwanini kutupula mazi a olive, shitika shimo sha mwanda sha kuyima kwa mitondo yenu, (Fwanikizilenubyo mu mazao, mazao likumi akwinga wulemu umo mpingwilisho yimo yikwinga kakote kamo.)

¹⁵ Mutupule mbelele umo kufumisha ha myanda yibili ku mabuyishilo amawahe a Ishalela. Enu mukalete zintupu za mpeka, batuyamana ba kuhokeshiwa na batuyamana ba zintupu za kulilumikila, kwinga shihingo kukwabo. Eshe nisho ninamba ami Nyambi ya Ngula.

¹⁶ “Bantu nimwabo bamu litunga bakalete eze zintupu ngayi akaliyavwishe mwene waku Ishalela.

¹⁷ Ukenga mulimo wa mwana mwene wakupanika batuyamana ba kuhokeshiwa nimwabo na zintupu za mpeka na zintupu za mwitilila za mikoka nimwayo wa Ishalela ha bimbo nimwabyo. Kutelama kwa ngonda na mutena wakukatala naha ha bimbo nimwabyo bya Baishalela. Ou mwene uku fwanina kupanika zintupu za ha wubi, zintupu za mpeka, zintupu za kuhokeshiwa nimwazo na zintupu za kulilumikila, za kufumisha wubi wa baka Ishalela.”

Bimbo

¹⁸ Nyambi ya Ngula wambile ngayi, “Ha mutena wakutatika ku ngonda ya kutatika, uku fwanina kutupula nkunzi wakubula nyanco na kuyelesha Litala lya Nyambi.

¹⁹ Mukankombela ukashimba mukeza wamina wa kayamana wa ntupu ya ha wubi a wulambe ha bikwiliti bya ku bipana bya Litala lya Nyambi, ku zinkomi zinaa za kaala na ha bikwiliti bya ku lipangati lya mukati ka shinzanza.

²⁰ Mukatendenga shuma shimo ha mutena wa mutanu na abili mu ngonda, kwimanina muntu nimwendi waku bipisha ha wubi wakubula kufunga hinge mu wulube. Pe ha kutenda noho mukalamanga shiwahe Litala lya Nyambi.

²¹ “Ha mutena wawu 14 ku ngonda wakutatika mu ku fwanina ku balika Shimbo sha Kupitilila. Ha matena mutanu na abili muntu nimwendi ukalya linkende lya kubula mumena.

²² Ha mutena wakutatika kwa Shimbo mwana mwene unakulela unafwanini kutupula nkunzi kwinga ntupu ya ha wubi wendi na bantu nimwabo.

²³ Ha matena mutanu na abili a Shimbo, ou mwene uku fwanina kutupula kuli Nyambi ya Ngula zintupu za kuhokeshiwa za bankunzi ba mutanu na babili na bambelele ba mutanu na babili bakubula nyanco na kubihokesha nimwabyo. Uku fwanina kami kutupula shikungwe wa mpongo ha mutena ha mutena kwinga ntupu ya ha wubi.

²⁴ Ha nkunzi nimwendi na shikungwe nimwendi wa mbelele uya unatupuliwi, kukekale ntupu ya 17.5 tukote na mishashi yihatu ya mazi a olive.

²⁵ “Ha bimbo bya makunka, ebye bya balikanga ha mutena wawu 15 mu ngonda ya 7, mwana mwene ukapanika ha matena nimwawo a mutanu na abili ntupu yimo ya ha wubi, zintupu zimo za kuhokeshiwa nimwazo na zintupu zimo za mpeka na mazi a olive.”