Ezekiyele 44 - Libuka Lya Kuyela

Mulimo wa lipangati lya ku mushamuko

¹ Uya muntu wantwalile ha munkanda wa lipangati kumbalila ya ku mushamuko wa Litala lya Nyambi. Lipangati lyengile lya ku shinka,

² pe Nyambi ya Ngula wambile kukwami ngayi, “Elye lipangati likekala lya ku shinka, lifwako kami kukashinkululiwa. Kowa muntu ukaliyavwishalyo, ndaba ngayi ami Nyambi wa Ishalela nenginininemo. Nilyo likekala lya ku shinkiwa.

³ Kalela ukutwesha kwinginamo na kulya byakulya bya kuyela ku meho wami. Niye uku fwanina kuliyavwisha kukwinginina na kututikila ku nzila ya lipangati kupita mu kampenci kakanene ka mukati kunkumo.”

Ndayano mwa ku fwanina kuyinginina mu Litala lya Nyambi

⁴ Niho ou muntu antwalile kumpitisha mu lipangati lya ku ncelele kumbili ya Litala lya Nyambi ya Ngula. Natilaminine namonene ngayi Litala lya Nyambi ya Ngula linenzala na wuwahe wendi. Nawilile hanci na lupala lwami hinga lwa kinka hanci,

⁵ pe Nyambi ya Ngula wambile kukwami ngayi, “Mwana muntu, yuvwilila kunebye ukuyuvwa na ku mona. Nikutongweza ndayano na bilongesha bya kwendeshelamo Litala lyami. Limuka bantu nimwabo bakwitabilishiwa kwingina mu Litala lya Nyambi na naba babula kwitabilishiwa.”

⁶ Tongweza bantu bakakumfutulukila baka Ishalela ngayi, Ami Nyambi ya Ngula mpandashilanga nikwamba ngayi, enu bantu ba Ishalela shiyenu biheka byenu bya mazilo.

⁷ Bya kwitabilisha bayeni na bakakubula kuya ku mukanda aba bakubula kunyombatala, kwingina mu litala lyami oho mazi na mukeza bya zinkombela zili na kutupuliwa kukwami, nohobene bantu bami banakiluku kulimama kwami ha kuwezelela ku byuma bya wunyengwe ba kutenda.

⁸ Munayaka bayeni kwinga bakakulama byuma byami bya shizila ebye namipanikile kulama mu litala lyami, kupitakana ngayi enu mubitende.

⁹ Nyambi ya Ngula ukwamba ngayi, “Kowa muyeni wakubula kuya ku mukanda ukengina mu litala lyami, kowa hinge muyeni uya wakwikala mukati ka baka Ishalela.

¹⁰ “Nikashushula balevi hamo na bantu Baishalela aba banciyile mu kulemesha tunankishi.

¹¹ Bakatenda milimo mu litala lyami, mu kulama mapangati na kutenda milimo ya mu litala lyami. Nibo ba kutwesha kuziha tuyamana otu batupulanga bantu ha ntupu ya kuhokesha na zinkombela, kami nibo bakekala kuyo kubatendela milimo.

¹² Balevi bapukalishile Baishalela ha kulemesha tunankishi mu ntendelo eye batwaminine bantu bami kutenda wubi, nohobene Ami Nyambi ya Ngula nikulibeza ngayi balevi bakashushuliwa.

¹³ Bafwako kukantendela milimo kwinga bakankombela hinge kuhenyena hahepi na shuma shamina shiya sha kuyela kukwami, hinge kwingina ku mwanya wa kuyela, ngoboni bakayuvwishiwa lisheni, ndaba ya milimo yabo ya wunyengwe eye ba kutenda ya wubi.

¹⁴ Ngoboni nikabayaka kwinga bakakulama litala lyami, kutenda milimo nimwayo iya yinafwanini kutendiwa kuyo.”

Bakankombela

¹⁵ Nyambi ya Ngula wambile ngayi, “Bakankombela ba ku mushobo wa levi bazukulya Zandoki, nibo bazaminine kuntendela milimo mu kupwisha mu litala oho nimwabo baka ishalela bafumine kukwami. Nohobene, haya nibo bantu aba ba kufwaninina kuntendela milimo na kwiza hambili yami mu kumpanika mazi na mukeza bya zinkombela.

¹⁶ Nibo ninkayabo, nibo bakengina mu litala lyami, mukutenda milimo ku kaala kami na kutwaminina kulemesha mu litala.

¹⁷ Oho bakwingina munzila ya lipangati lya mukati ka shipango, bakavwala bivwalo bya kulelema, kaliha bafwanina kuvwala bivwalo byashenge bya kutunga ha wushako. Oho ba kutenda milimo mu shipango hinge mu Litala lya Nyambi.

¹⁸ Bakapambenga makwiza a kulelema kumitwe na tuputula twa makwiza a kulelema, kami bafwako kukavwala mukunzi, hinga bakavwala shuma nimwasho shikabaletela shitukutuku.

¹⁹ Oho shilolokale batutikile ha munkanda wa shipango ku bantu, bafwanina kuvwula bivwalo bavwala ha kutenda milimo mu Litala lya Nyambi na kubishiya mu tumpenci twa kuyela.

²⁰ “Bakankombela kaliha bafwanina ku sheha mitwe yabo, hinga kulela huki zabo kwinga zazitalitali, ngoboni ba ku fwanina kuziketwilanga.

²¹ Bakankombela kaliha bafwanina kunwa waine oho bakwingina mu shipango.

²² Kaliha wafwanina kuyeka mukazi wa mfwile hinge wakulubulula, uku fwanina kuyeka kankanga waka ishalela hinge mfwile wa mukankombela.

²³ “Bakankombela bakalongesha bantu bami kutapuluka kuli mukati kanebye bya kuyela nanebye bya kubula kuyela na mukati ka bya ku fwanina nanebye bya kubula ku fwanina kupanika nkombela.

²⁴ Oho ndi hali shambo, bakankombela bakayata shambo kukonka ndayano zami. Bakalama ndayano zami na kufundiziza kwami kwa habimbo na kulama Mutena wakukatala kwinga wa kuyela.

²⁵ “Mukankombela hinga alibipisha ha kukwata mutuntu, ndele unengi mutuntu wa bahemi bendi hinge mutuntu wa waku bana bendi, hinge mukonzo wendi hinge mpanzendi wa muzike.

²⁶ Haya ndi mukankombela akukwata mutuntu wa muntu wakufwa, walibipishakale pe uku fwanina kuliyelesha kuya na shiheka ha matena mutanu na abili.

²⁷ Ha mutena akengina mu shipango sha Litala lya Nyambi, ngayi atende kami milimo uku fwanina kutupula ntupu ya ha wubi.” Eshe nisho nikwamba Ami Nyambi ya Ngula.

²⁸ “Bakankombela, bali na wunkombela kwinga shitapilo shabo eshe napana kuli Ishalela kufuma ku mukoka kuya ku mukoka wamina. Kaliha bafwanina kwikala na wuheti mu Ishalela. Ami wuheti wabo.

²⁹ “Zintupu za mpeka na zintupu za ha wubi na zintupu za kulyambwilila bikenga byakulya bya bakankombela, bakatambula byuma nimwabyo mu Ishalela banapaniki kukwami.

³⁰ Bakankombela bakatambula biya bya kuhoma nimwabyo na shuma nimwasho banatupulu kukwami. Shikati nimwasho bantu ba kuyoha mankende, bafwanina kupana bakankombela linkende lya kutatika kwinga ntupu, pe mfuywezi zami zikekala ha minkanda yabo.

³¹ Mukankombela kaliha wafwanina kulya kayamana hinge kayoni wakulifwila, hinge wakuzihiwa ku minendi kayamana.”