Ezekiyele 42 - Libuka Lya Kuyela

Matala abili kwakwipi na Litala lya Nyambi

¹ Niho ou muntu antwalile ha munkanda wa shipango sha shinzanza na kuntwaminina ku litala lya ku ncelele kumbalila ya Litala lya Nyambi, kaliha kwakutali na litala lya ku mponci ya Litala lya Nyambi.

² Elye litala lyengile mamita makumi mutanu mu wutali na mamita makumi abili na mutanu muwipi.

³ Kumbalila yimo ya tilaminine ku mwanya wakunkumo ya Litala lya Nyambi, yengile mamita likumi muwipi, lyamina lya tilaminine na nzila ya kulambulula ha kuyala mamanya, yekalile ha munkanda wa shipango. Yatendiwilile mu zimbalila zihatu, limo na limo lyayakiwile kunyima lili mu nceto yalyo.

⁴ Kumbalila ya ku ncelele ya litala elye kwekalile nzila ya kupitila ya mamita mutanu muwipi na mamita makumi mutanu mu wutali na menginino kumbalila yayo.

⁵ Tumpenci twa kuyilu twengile twatushe kupitakana tuyo twa hakati na twa ku nceto nitwo twayakiwile kunyima shikuma.

⁶ Tumpenci tuhatu nimwato twekalile twakwezekela hamo twemanine ha limvu kami kaliha twashumine ha zimpangwa ngonehe matala amina amu shipango.

⁷ Pe kuyo kwekalile kembi kunkumo ya tumpenci na kunkumo ya shipango ha munkanda hambili ya tumpenci, pe mu wutali walyo lyengile mamita makumi abili na mutanu.

⁸ Otu tumpenci twekalile ha munkanda wa shipango twengile mamita 25 mu wutali, pe hambili ya Litala lya Nyambi ya Ngula yengile mamita 50.

⁹ Ku mamaninino a tumpenci twa ku nceto kwekalile shipana ku mushamuko shakwinginina mu shipango, kufuma oku kembi katatikilile.

¹⁰ Kumbalila yaku mabukubuku a Litala lya Nyambi, kwekalile litala lya kulifweka lyekalile hahepi na litala lya ku mponci kunkumo ya Litala lya Nyambi.

¹¹ Hambili ya tumpenci kwekalile nzila ngonehe yiyo ya kumbalila ya ku ncelele. Yengile ya kufwanikizila hamo na ntendelo yimo na mengino akulifweka.

¹² Kwekalile bipana kumbalila yaku mabukubuku, ku mushamuko kunkumo oku kwatatikilile limota.

¹³ Niho uya muntu wambile kukwami ngayi, “Nimwawo matala awa abili anengi akuyela, omu bakankombela bakengina kuli Nyambi ya Ngula na ku lilako zintupu za kuyela shikuma. Bakankombela bakayakamo zintupu za kuyela, zintupu za mpeka, zinkombela za kutupuliwa ha wubi hinge za kulyambwilila, ndaba mwanya wa kuyela.

¹⁴ Oho bakankombela banekala mu Litala lya Nyambi ya Ngula, pe bakushinga kuya ha munkanda wa shipango, banafwanini ku shiya bivwalo banaliyavwishinga ha kutenda milimo kuli Nyambi ya Ngula. Banafwanini kuvwala bivwalo byashenge oho shilolo baye ha munkanda kumbalila oku banakungulukili bantu.”

Kufwanikiziwa kwa mwanya wa Litala lya Nyambi

¹⁵ Oho ou muntu amanishile kufwanikiza mwanya wa mukati ka Litala lya Nyambi, wantwalile ha munkanda mu kututikila ku shipana sha ku lipangati lya ku mushamuko pe niho afwanikizile mwanya wa ha munkanda.

¹⁶ Niye washimbile muwana wendi wakupimisha na kufwanikiza mbalila yimo yaku mushamuko, yengile mamita 250.

¹⁷ Niho kami akapimine kumbalila yaku ncelele, wapimineko mamita 250.

¹⁸ Niho afutukile na kupima kami kumbalila yaku mabukubuku, wapimineko mamita 250.

¹⁹ Niho afutukilile na kupima kami kumbalila yaku mponci, wapimineko mamita 250.

²⁰ Nohobene wafwanikizile zimbalila nimwazo zinaa, pe kwekalile kembi kazingulukileko, nimwako kengile mamita 250 muwipi na mu wutali. Nibo bafwako kutapulula mukati ka nebye binengi bya kuyela na nebye bya kubula kuyela.