Ezekiyele 41 - Libuka Lya Kuyela

¹ Niho uya muntu antwalile mukampenci ka hakati, mu Mwanya wa Kuyela. Wafwanikizile nzila ya lipangati pe nilyo lyengile mamita ahatu mbalila nimwayo,

² na mamita mutanu muwipi wa shihala na twimbi twa mamita abili na shitika sha mita mu lupati nimwamo. Niho kami afwanikizile kampenci hanci, pe niko kengile ka mamita makumi abili mu wutali na mamita likumi muwipi.

³ Niho ayile ku kampenci ka mukati, wakafwanikizileko nzila yayile kuyo, pe yengile mita yimo mu kunonka na mamita ahatu muwipi wayo na twimbi mbalila nimwayo yengile mamita ahatu na shitika sha mita mu mpimo yalyo.

⁴ Wafwanikizile kampenci, pe niko kengile mamita likumi zimbalila nimwazo. Kampenci aka kekalila ku nciza ya kampenci ka hakati. Niho ambile kukwami ngayi, “Ou unengi Mwanya wa Kuyela shikuma.”

Tumpenci twatendiwilile ha twimbi twa Litala lya Nyambi

⁵ Niho uya muntu afwanikizile limota lya Litala lya Nyambi, nilyo lyengile mamita ahatu mu mpimo yalyo. Ha limota nimwaho ha zinguluka Litala lya Nyambi, hekalile tumpenci twatushetushe twa kulifweka twengile twa mamita abili muwipi.

⁶ Tumpenci otu twaketwiwile mu zimbalila zihatu na tumpenci twa makumi ahatu hanci nimwaho. Mamota a Litala lya Nyambi, engile akushepa kupitakana hanci ngayi tumpenci twikale shiwahe ha limota ngayi mikambo hinga ingina mu limota.

⁷ Makandamino akukuma ku litala lya kulishampika lya wubili na lya wuhatu. Litala lya Nyambi lyamonekele kwinga lya kwezekela hamo ku mpimo nimwayo kukuma na kuyilu ndaba ya tumpenci twa ha munkanda wa limota.

⁸ Namonene ngayi kwekalile shuba sha kulyatila nimwako kuzinguluka Litala lya Nyambi nimwako. Kupimiwa kwayo yengile mamita ahatu mu wutali.

⁹ Mamota aha munkanda wa tumpenci otwe, twengile mamita 2.5. Kwekalile mwanya wakubulukaho shimina,

¹⁰ wakiyamine kuzinguluka Litala lya Nyambi mukati ka twimbi na tumpenci muyo batendelelenga milimo bakankombela. Mwanya wakushalaho wakubula shuma sha zikiwileho wengile mamita likumi.

¹¹ Kwekalile shipana shimo shengininenga mu tumpenci kumbalila ya ku ncelele ya Litala lya Nyambi na shipana shimina shenginine mu nowo ekalile ku mabukubuku a Litala lya Nyambi.

Litala lya ku mponci

¹² Kwekalile litala ku mponci lya lipenzele na mbanza ya Litala lya Nyambi, lyengile mamita 45 mu wutali, pe muwipi yengile mamita 35, pe twimbi twabyo byengile mamita abili na shitika kuzingulukako.

Kufwanikiziwa nimwako kwa Litala lya Nyambi

¹³ Niho uya muntu afwanikizile ha munkanda wa Litala lya Nyambi, pe yengile mamita makumi mutanu mu wutali. Kufuma ku mazezelo a Litala lya Nyambi, kuketula kuya ha nciza ya shinzanza sha shipango, ku mwanya wakwakutali wa litala ku kampenci, mukala wengile wa mamita makumi mutanu mu wutali,

¹⁴ na mulupati wakuketula hambili ya Litala lya Nyambi, kuyakako na mwanya wakubula kuzikiwa shimina, wengile wa mamita makumi mutanu kuzimbalila nimwazo.

¹⁵ Niho afwanikizile muwipi wa litala ku mponci ya Litala lya Nyambi ya Ngula na limota lyalyo ku zimbalila nimwazo, yengile mamita makumi mutanu. Kampenci kaku menginino a Litala lya Nyambi, kampenci kakanene na mwanya wa kuyela shikuma,

Kutontolola bya Litala lya Nyambi ya Ngula

¹⁶ nimwabyo byatendiwile na bihala bya bitondo kufuma hanci kutwala ku mampananga. Mampananga awa atweshekelenga kufwikiwa.

¹⁷ Twimbi twa mukati ka Litala lya Nyambi, twatutali ngo hayilu ya bipana hafwikiwile shikuma na bya kubaza,

¹⁸ bya mitondo ya minkomona na makelumbi a mbando. Pe mitondo ya minkomona yekalile hakati ka makelumbi a mbando, likelumbi nimwendi wekalile na zimpala zibili.

¹⁹ Lupala lwa muntu luya lwapenzele ku mutondo wa munkomona ku nciza yimo na ku nciza yimina lupala lwa shimbwi lwapenzeleko. Nisho shekalile nehe kuzingwilisha bishimi nimwabyo,

²⁰ kufuma hanci kukuma na hayilu ya bipana.

²¹ Bikwiliti bya bipana bya Mwanya wa Kuyela byengile bya kwezekela hamo. Hambili ya menginino a Mwanya wa Kuyela shikuma kwekalile shuma shamina shiya shamonekelenga,

Kaala ka bitondo

²² ngonehe kaala ka bitondo. Nisho shengile mita yimo na shitika mu wutali na mita yimo muwipi. Zimpangwa zasho za mu zinkomi, hakati kasho na zimbalila zasho nimwazo shatendiwile na bitondo. Uya muntu wambile kukwami ngayi, “Eye niyo tebulu yinemana ku meho a Nyambi ya Ngula.”

Bihala

²³ Kwekalilenga bipana ku zinkumo nimwazo na za nzila ya kupitila ku kampenci kakanene pe kami na ku zinkumo nimwazo ku nzila ya ku mapitilo aku Mwanya wa Kuyela shikuma.

²⁴ Kwekalile bihala bya kulilamika biya bya shinkulukilenga hakati.

²⁵ Kwekalilenga mitondo ya minkomona na makelumbi a mbando byabaziwilile ha bipana ku kampenci kakanene, ngonehe kuyo bene byekalile ha mamota. Kwekalile bitondo byafwikiwilenga hayilu ya munkanda wa shipana ku kampenci kaku menginino a Litala lya Nyambi.

²⁶ Kuzinkumo za kampenci aka kwekalile mampananga na tumpenci twengile twa kutanga na bitondo bya minkomona.