Ezekiyele 40 - Libuka Lya Kuyela

Shimonekesho Sha Litala Lya Nyambi Lya Kumbili 40:1—48:35 Ezekiyele ukutwaliwa ku Yelushalema

¹ Wengile mutena wawulikumi ku ngonda, mu mwaka wawupya oho kuwana tuli na myaka 25 mu wuntapwa, kami kuwana kwapitakale myaka likumi na yinaa kufuma ha kukomiwa kwa Yelushalema, ha shikati shiyo, ngovu za Nyambi ya Ngula zezile hahami pe wantwalile ku Yelushalema.

² Nyambi mubimono byendi wantwalile ku litunga lya Ishalela, niho akanyikalikile ha lipili lyalitali, kululumana nahaya nekalile, namonene matala akulifweka ngonehe aya ekalile mu lukena.

³ Niho ahenyeshelele kwakwipi, pe namonene mulume wabyaziminenga ngonehe lubemba, wemanine mu lipangati hinga akwata kakwiza ka kulelema ka kupimisha na muwana wakupimisha mu liboko lyendi.

⁴ Uya mulume wambile ngayi, “Mwana muntu, penza na meho obe kami yuvwa na matu obe, yaka bihanganiko byobe kunebye nimwabyo nikuku monesha, ndaba unaletiwi kuno ngayi mwanga nikumoneshebyo. Ukatongweze baka mukoka wa Ishalela nimwabyo ebye uku mona.”

Lipangati lya ku mushamuko

⁵ Namonene Litala lya Nyambi na kembi kaya kalizingulukile. Muwana wakupimisha uya akwatile uya mulume, mu wutali wengile mamita ahatu. Niho apimine kembi na muwana pe kekalile na mamita ahatu mu wutali kami kekalile na mamita ahatu mu wuliti.

⁶ Niho ayile ku lipangati lya ku mushamuko, wakankalalile ha tukandamisho pe wapimine ku menginino alyo, pe wawanine ngayi mu kunonka lili na mamita ahatu

⁷ Kwekalile kami tutala twa bakakulama, twengile mamita ahatu mu wutali kami muwipi twengile mamita ahatu. Pe mamita abili na shitika niwo wengile wuliti wa kembi kakufuma ha katala kamina kuya ha kamina. Kufuma ku tutala twa bakakulama, kwekalile menginino a wutali wa mamita ahatu aya alulumanine ku menginino a kampenci kaya kapenzele ku Litala lya Nyambi.

⁸ Wapimine kami kaya kampenci,

⁹ pe wawanine ngayi kekalile na mamita anaa mu kunonka. Mamaninino ako engile anyahamina aya ashingile kukuma naku Litala lya Nyambi, pe ku mamaninino ekalile na twimbi twa wuliti wakukuma ku mita yimo.

¹⁰ Tuya tutala twa bakakulama twekalile mu lipangati lya ku mushamuko twekalile tuhatu, noku noku, nimwato twengile twa kwezekela hamo na wuliti wa kembi kakufuma ha katala kamina kuya ku kamina wengile wa kwezekela hamo.

¹¹ Niho uya mulume apimine mulupati lwa liya lipangati, wawanine ngayi engile mamita mutanu na yimo na shitika, pe ku menginino alyo engile mamita mutanu.

¹² Kumenginino a tutala twa bakakulama kwekalile kembi kakepi, kengile kama shentimita makumi mutanu mu wutali, kami mu wuliti kekalile nama shentimita makumi mutanu. Tumpenci twengile twa mamita ahatu muwipi na mu wutali ha kamo na kamo.

¹³ Niho apimine muya mwa kupitila, kufuma ha kembi ka kampenci kamo na kuya ku kembi ka kampenci kaya kanaliyahikizi nako, engile mamita likumi na abili na shitika kufuma ha shipana shamina kuya ha shamina.

¹⁴ Wapimine kami kampenci kakumamaninino kaya kekalile kwakwipi na kembi kaku shipango, kekalile na mamita likumi mulupati.

¹⁵ Wutali wa nzila ya lipangati nimwalyo kufuma ku kembi kaku menginino kutwala ku kampenci ka mukati kaku menginino, engile mamita 25.

¹⁶ Kwekalile tumampananga twatushe mu tumpenci nimwato ha twimbi twahanyima naha twimbi twa mukati kufuma ha kampenci kamina kuya ha kamina. Ha kembi kaya kapenzele mu nzila ya lipangati hekalile bifwekesha bya kumangula bya mitondo ya minkomona.

Shipango sha ha munkanda

¹⁷ Niho uya mulume antwalile mushipango sha ha munkanda, kwekalile tumpenci 30 ha kembi ka ha munkanda, kuya kwekalile mwanya wakulambulula na mamanya kuzingwilisha shipango.

¹⁸ Eshe shipango shekalile ha mwanya wakunyekama uya wengile wakulambulula kukakuma naku mapangati, kami wengile wakwezekela hamo muwipi na mu wutali.

¹⁹ Niho apimine wutali wakufuma ku lipangati lya mukati kukuma naha munkanda wa shipango sha mukati, pe wawanine ngayi engile mamita makumi mutanu kuboka ku mushamuko na mamita kami makumi mutanu kuboka ku ncelele.

Lipangati lya ku ncelele

²⁰ Niho uya mulume apimine lipangati lya ku ncelele, liya likwingina ku shipango sha ha munkanda.

²¹ Wapimine kami na tutala twa bakakulama tuya twekalileko, twengile tuhatu noku noku na twimbi twatwo nimwato, ku menginino a lipangati, nimwabyo byengile bya kwezekela hamo ngonehe bya ku lipangati lya ku mushamuko. Lipangati lyengile mamita 25 mu wutali na mamita 12.5 muwipi.

²² Kampenci kaku menginino na mampananga na bifwekesha bya kumangula bya mitondo ya minkomona biya byekalile ha kembi ka mu nzila ya lipangati byengile bya kulifweka na biya byekalile ku lipangati lya ku mushamuko. Kwekalile tukandamisho mutanu na tubili twa kuya ku lipangati, na kampenci ku mamaninino kakwinginina kalipenzele na shipango.

²³ Shipango sha mukati shekalile na lipangati lya mukati liya lyalipenzele na lipangati lya ku ncelele ngonehe kami lyekalile lipangati lya ku mushamuko. Uya mulume wapimine mwanya wa mukati ka aya mapangati alipenzele, pe wawanine ngayi engile mamita makumi mutanu.

Lipangati lya ku Mabukubuku

²⁴ Niho uya mulume antwalile ku mbalila ya ku mabukubuku, kuyo nakamonene lipangati lyapenzele ku mabukubuku. Wapimine twimbi twa kuya ku lipangati, na kampenci ka ku menginino, byengile bya kwezekela hamo na aya mapangati amina.

²⁵ Kwekalile mampananga kuya ku tumpenci twa kuya ku lipangati ngonehe ziya zekalile ku mapangati amina. Lipangati lyengile mamita 25 mu wutali na mamita 12.5 muwipi.

²⁶ Kwekalile tukandamisho mutanu na tubili twa kuya ku lipangati, na kampenci ku mamaninino kakwinginina kalipenzele na shipango. Kapenci kekalile na bifwekesha bya kumangula bya mitondo ya minkomona, ha twimbi twa mu nzila ya lipangati kwekalile shifwekesha shimo noku noku.

²⁷ Shipango sha mukati shekalile na lipangati liya lyapenzele ku mabukubuku, uya mulume wapimine mwanya wa mukati ka aya mapangati alipenzele, pe wawanine ngayi engile mamita 50.

Lipangati lya ku mabukubuku lya shipango sha mukati

²⁸ Uya mulume wanyingizile mu lipangati lya ku mabukubuku niho antwalile mu shipango sha mukati. Wapimine lipangati lya mukati, pe wawanine ngayi lyengile lya kwezekela hamo na mapangati amina.

²⁹ Tutala twa bakakulama tuya twekalile mu lipangati, na twimbi twa mukati ku menginino, na kampenci ka ku menginino, nimwabyo byengile bya kwezekela hamo na nebye byekalile ku mapangati amina.Tutala twa bakakulama na kampenci ka ku menginino, nimwabyo byekalile na mampananga.

³⁰ Lipangati lyengile mamita 25 mamita 12.5 muwipi.

³¹ Kampenci ka ku menginino a lipangati kapenzele ha shipango sha ha munkanda, kwekalile bifwekesha bya kumangula bya mitondo ya minkomona ha twimbi tuya twekalile ku menginino a lipangati. Kwekalile tukandamisho mutanu na tuhatu ha kwingina mu liya lipangati.

Lipangati lya ku mushamuko lya shipango sha mukati

³² Niho uya mulume antwalile kulwa mushamuko wa shipango sha mukati, wapimine lipangati lya mukati, pe wawanine ngayi lyengile lya kwezekela hamo na mapangati amina.

³³ Tutala twa bakakulama tuya twekalile muya mu lipangati na kampenci ka ku menginino, na twimbi twa mukati ku menginino, nimwabyo byengile bya kwezekela hamo nanebye byekalile ku mapangati amina. Tutala twa bakakulama na kampenci ka ku menginino, nimwabyo byekalile na mampananga. Lipangati lyengile mamita 25 mu wutali na mamita 12.5 muwipi.

³⁴ Kampenci ka ku menginino a lipangati kapenzele ha shipango sha ha munkanda, kwekalile bifwekesha bya kumangula bya mitondo ya minkomona ha twimbi tuya twekalile ku menginino a lipangati. Kwekalile tukandamisho mutanu na tuhatu ha kwingina mu liya lipangati.

Lipangati lya ku ncelele lya shipango sha mukati

³⁵ Niho uya mulume antwalile ku lipangati lya ku ncelele, wapimine lipangati pe wawanine ngayi lyengile lya kwezekela hamo na mapangati amina.

³⁶ Ngonehe mapangati amina na nilyo kami lyekalile na tutala twa bakakulama, na twimbi twa mukati, lyekalile na kampenci ka ku menginino kami ku tumpenci kwekalile mampananga. Lipangati lyengile mamita 25 mu wutali na mamita 12.5 muwipi.

³⁷ Kampenci ka ku menginino a lipangati kapenzele ha shipango sha ha munkanda, kwekalile bifwekesha bya kumangula bya mitondo ya minkomona ha twimbi tuya twekalile ku menginino a lipangati. Kwekalile tukandamisho mutanu na tuhatu ha kwingina mu liya lipangati.

Matala ekalile hahepi na lipangati lya ku ncelele

³⁸ Ku lipangati lya shipango sha ha munkanda, ku menginino alyo kwekalile kampenci kekalile ku mbalila yaku ncelele, muya bakankombela bayoweshelelenga tuyamana twa ntupu ya kuhokesha.

³⁹ Ku kampenci ka ku menginino a lipangati, kwekalile zitebulu zibili kuzimbalila nimwazo haya bazihililenga tuyamana twa ntupu ya kuhokesha na ntupu ya ha wubi na ntupu ya kulyambwilila.

⁴⁰ Kumenginino a lipangati lya ku ncelele, ku zimbalila nimwazo kwekalile zitebulu zibili kami ku zimbalila nimwazo za ku kampenci ka ku menginino a lipangati kwekalile zitebulu zibili.

⁴¹ Nohobene kwekalile zitebulu zinaa kumbalila yimo, pe kumbalila yamina kwekalile kami zinaa, nimwazo hamo zengile zitebulu mutanu na zihatu ziya zekalile mu lipangati nimwalyo. Haya ha zitebulu niho bazihililenga tuyamana.

⁴² Zitebulu zinaa ziya zekalile mu kampenci kakuwahishila zinkombela, zengile za kutenda ha mamanya, ziya zitebulu mu wutali kufuma hanci zengile mashentimita 50 pe wunene wa tebulu mulupati na mu wutali yengile ya kwezekela hamo, engile mashentimita 75 mu nzinguluke nimwamo. Byuma nimwabyo baliyavwishilenga ha kuziha tuyamana twa zinkombela byekalilenga hahaya ha zitebulu.

⁴³ Kwekalile tuhanto twa wutali wakukuma ku mamilimita 75 tuya twakolekiwile ha kembi kuzingwilisha kampenci nimwako. Nyama nimwayo ya tuyama twa zintupu byekalilenga ha zitebulu.

⁴⁴ Ha munkanda wa lipangati lya mukati kwekalile tutala twa baka kuyimbila tuya twekalile mu tumpenci twa shipango sha mukati. Kampenci kamo kekalile kulwa lipangati lya ku ncelele, pe kapenzele kulwa mabukubuku. Pe kami kampenci kamina kekalile kulwa lipangati lya ku mabukubuku, pe kapenzele kulwa ncelele.

⁴⁵ Uya mulume wambile kukwami ngayi, “Aka kampenci kanapenze kulwa mabukubuku, niko ka bakankombela baya bakatendanga milimo mu Litala lya Nyambi ya Ngula.

⁴⁶ Aka kampenci kanapenze kulwa ncelele, niko ka bakankombela baya bakatendanga milimo ku kaala. Aba bakankombela nibo bazukulu ba Zandoki, nibo tuhu bamo ba ku mukoka wa Levi baya banafwanini kwiza hahepi na Nyambi na kumutendela milimo.”

Shipango sha mukati na Litala lya Nyambi ya Ngula

⁴⁷ Uya mulume wapimine shipango pe wawanine ngayi shengile sha kwezekela hamo, shekalile na mamita makumi mutanu muwipi na mu wutali. Kaala kekalile ha munkanda hambili ya Litala lya Nyambi.

⁴⁸ Niho antwalile ku menginino a Litala lya Nyambi, wapimine menginino pe wawanine ngayi ekalile na mamita abili na shitika mu kunonka, muwipi ekalile na mamita mutanu na abili, pe wapimine twimbi tubili twa ku menginino, wawanine ngayi wuliti wato wakumine ku mita yimo na shitika ha kamo na kamo.

⁴⁹ Kwekalile tukandamisho ku menginino a Litala lya Nyambi, muwipi twekalile na mamita likumi, pe mu wutali twekalile na mamita mutanu na yimo, kami kwekalile zimpangwa zibili zekalile ku menginino, yimo oku yamina oku.