Ezekiyele 38 - Libuka Lya Kuyela

Kulubulula Kwa Kulwisha Ngongi

¹ Lizu lya Nyambi ya Ngula lyezile kukwami ngayi,

² “Mwana muntu yanga ukambile Ngongi wamu litunga lya Mangongi, kalela waku Mesheki naku Tumbalu, mwambile ngayi,

³ Nyambi ya Ngula ukwamba ngayi, nili na kukulwisha obe Ngongi kalela waku Mesheki naku Tumbalu.

⁴ Nika kuzingwilisha, nikayaka tuhanto ku mimbanga yobe pe nika kukoka hamo na makunge obe a bakakulwa nzita, hamo na bambishi bobe na baya bakakukandama ha bambishi baya bali na bya kulwisha, hamo na baya nimwabo banashimbi makebo na mikwale.

⁵ Balume ba ku Pesha na Etopya naku Puti bakekala nendi hinga bashimba makebo kami hinga bavwala zihoshi za shondo.

⁶ Balume nimwabo bakakulwa nzita bamu litunga lya Ngomela bakekala nendi hamo nanaba ba ku litunga lya ku ncelele lya Mbeti Tongama. Ukekala na makunge amengi a bakakulwa nzita.

⁷ “Mutongweze aliwahishile na kulibalakanya hamo na makunge nimwawo aya a bakakulwa nzita aya anakungulukili kukwendi, niye ukawatwaminina.

⁸ Mwakapita myaka yayingi nikamutongweza kuya na kulwisha litunga liya lyafumine munzita, muya muli bantu ba kungwile kufuma ku mikoka na kubabwesha ku mapili a Ishalela aya ashalile nahiya. Bafumishiwile ku mikoka na kubabwesha mu litunga muya bali na kuyoya shiwahe nimwabo mu ku mwena.

⁹ Ukaba kulumukila na kubalwisha ngonehe alokanga mvula wa likandavula, ukafwika litunga ngonehe likumbi, makunge obe a bakakulwa nzita hamo na makunge amengi a mumikoka ukekala nawo.

¹⁰ “Nyambi ya Ngula ukwamba ngayi, ha mutena uyo bihanganiko bikeza mu mutima wobe pe ukatenda biheka bya kuluwa.

¹¹ Ukamba ngayi, ‘Nikalwisha litunga lili na minzi ya kubula twimbi, lili na bantu bakubula mangunga baya ba kuyoya mu ku mwena, baya bali mu minzi ya kubula twimbi na tupatisho, minzi ya kubula mapangati.

¹² Bantu baya bali mu minzi iya yengile ya ku shiwuka mwaka, ukabayibila na kubapukula. Banakunguliwi kufuma ku mikoka, bali na kulela tuyamana twatwingi kami bali na wuheti wawingi. Bekala mu litunga lyekala hakati ka kaye.’

¹³ Bantu ba ku Shemba na Ndendani na bakamikwebo ba ku Tashishi bakakwipula ngayi, ‘Kati unakungulu bantu obe bakakulwa nzita ngayi mwanga uyibe na kupukula wuheti wawingi wanaba bantu ndi?’ Kati ukushinga ku shimba shiliva na ngolinde na bimuna na wuheti wabo ngayi mwanga wituke nawo ndi?”

¹⁴ “Haya mwana muntu, yanga ukalubulule, tongweza Ngongi ngayi, ‘Nyambi ya Ngula ukwamba ngayi, ha mutena uyo bantu bami Baishalela bakayoya mu ku mwena, na nobe ukalimuka.

¹⁵ Ukeza kufuma kumbalila yobe ya kwakutali yaku ncelele, ukeza na likunge lyalinene lya bakanzita bangovu, baya bakafuma ku mikoka yayingi, nimwabo bakeza hinga bekala ha bambishi.

¹⁶ Ukalwisha bantu bami ba Ishalela ngonehe likumbi lya fwikanga ha litunga. Ha matena aya akeza, obe Ngongi nikakwitabilisha ngayi ukalwishe litunga lyami, mwanga mikoka bakandimuke. Nikaliyavwisha obe ndaba ya shifungo shami sha kuyela mwanga nimwabo bakamone ebye nikatenda.

¹⁷ Obe natoyelenga ku mwaka kupitila mu bakamilimo bami bamiluwe bamu Ishalela, balubulwilenga ha matena akunyima ngayi Ami nika kuleta kwiza mu kulwisha Ishalela.” Eshe nisho anamba Nyambi ya Ngula.

Nyambi Ukushushula Ngongi

¹⁸ Ha mutena uya oho Ngongi akalwisha Ishalela, nikakaliha shikuma.

¹⁹ Nikwamba hinga na kaliha shikuma ngayi, ha mutena uyo litunga lya Ishalela likakanka shikuma.

²⁰ Zinci na tuyoni na tuyamana nimwato twa mu lishaka nanebye nimwabyo bya kalabanga hanci hamo na muntu nimwendi wahano hanci nimwabo bakakanka ku meho ami. Mapili akawila hanci kami manzolongoma akalendozoka, pe twimbi nimwato tukashiwukila hanci.

²¹ Nyambi ya Ngula ukwamba ngayi, nikalwisha Ngongi ha mapili nimwawo, pe bantu bendi bakalifutulukila na kulilwisha umo na wamina na mukwale.

²² Nikashushula Ngongi na malweli hamo na zindufu. Likandavula na mvula wa mamanya, na mundilo na shalufwa bikamwitikila hamo na makunge a bakanzita, baya bakekala kumbalila yendi.

²³ Mu nzila eye nikamonesha matunga nimwao ngayi Ami nili wamunene kami nili wa kuyela. Bakalimuka ngayi Ami nili Nyambi ya Ngula.