Ezekiyele 37 - Libuka Lya Kuyela

Mukulo wa bifupa bya kuyuma

¹ Ngovu za Nyambi ya Ngula zekalile hahami pe Moyo wendi wantwalile niho akanyakile mukati ka mukulo wenzalile na bifupa bya kuyuma.

² Wanyendeshele mukatikabyo namonene bifupa byabingi byabunganine hanci muya mu mukulo, kami byengile bya kuyuminina shikuma.

³ Niho anyipwile ngayi, “Obe mwana muntu, kati ebye bifupa bikutwesha kuyoya ndi?” Nakumbwile ngayi, “Obe Nyambi ya Ngula, obe tuhu ukulimuka.”

⁴ Niho ambile kukwami ngayi, “Lubulula kunebye bifupa, pe amba ngayi, enu bifupa bya kuyuma yuvwenu lizu lya Nyambi ya Ngula.

⁵ Ebye nibyo akwamba Nyambi ya Ngula kunebye bifupa ngayi, niketabilisha ngayi moyo wize mumwenu pe mukekala na wumi.

⁶ Nikamiyaka makana na kwitabilisha ngayi mwikale na mishunyi, kami nikamifwika shitembe, nikayaka moyo mumwenu pe mukekala na wumi. Pe mukalimuka ngayi Ami nili Nyambi ya Ngula.”

⁷ Niho nalubulwile ngonehe antongwezele. Oho nambilenga nayuvwile miyoyo ya kulinunga kwa bifupa, pe bifupa byezile hamo, shifupa na shifupa shatatikile kulinungila ku shamina.

⁸ Oho napenzele, namonene makana atatikile kwiza hahabyo na mishunyi yamonekele hahabyo na shitembe shabifwikile, ngoboni kaliha mwekalile moyo mumwabyo.

⁹ Nyambi wambile kukwami ngayi, “Obe mwana muntu, lubulula ku moyo ngayi, ebye nibyo akwamba Nyambi ya Ngula ngayi, ‘Obe moyo fuma kuzimbalila nimwazo woyela muneye mituntu ya kufwa ngayi mwanga yikale na wumi.’ ”

¹⁰ Nalubulwile ngonehe antongwezele, moyo wenginine mu mituntu, niho bekalile na wumi pe bemanine, lyengile likunge lyalinene lya bakanzita.

¹¹ Nyambi wambile kukwami ngayi, “Mwana muntu, ebye bifupa nilyo litala nimwalyo lya Ishalela, pe banakwamba ngayi, ‘Bifupa byetu binayuminini kami kulumbeza kwetu kunamana na litunga lyetu lyalobakale.’

¹² Haya lubulula wambe kukwabo ngayi, Nyambi ya Ngula ukwamba ngayi, enu bantu bami nikafukulula binzimbi byenu na kumi fumishamo. Nikamibwesha ku litunga lya Ishalela.

¹³ Pe enu bantu bami mukalimuka ngayi Ami nili Nyambi ya Ngula oho nikafukulula binzimbi byenu na kumi fumishamo.

¹⁴ Nikayaka Moyo wami mumwenu pe mukayoya, kami nikamikalika mu litunga lyenu. Mukalimuka ngayi Ami nili Nyambi ya Ngula ninamba kami nikashitenda. Eshe nisho anamba Nyambi ya Ngula.”

Yunda na Ishalela mu Wene Umo

¹⁵ Lizu lya Nyambi ya Ngula lyezile kukwami ngayi,

¹⁶ “Mwana muntu shimba muwana utikiteho ngayi, ‘Bayunda na Ishalela ba kulikwatashana hamo. Kami shimba muwana wamina utikiteho ngayi, Baefulemu nibo baka litala lya Yoshefwa na Baishalela ba kulikwatashana hamo nendi.’

¹⁷ Nungila ebye bitondo hamo mwanga shinge shitondo shimo mu liboko lyobe.

¹⁸ Oho bantu bobe bakakwipula ngayi eshe shikutontolola bishini,

¹⁹ ukabatongweze ngayi, Nyambi ya Ngula ukwamba ngayi, nikashimba muwana wa Yoshefwa uya uli mu liboko lya Efulemu na muwana wa baka lulimi lwa Ishalela baya ba kundama kukwendi na kuwu nungila ku muwana wa Yunda na kuwinga tuhu muwana umo mu liboko lyami.

²⁰ Ukamoneshe bantu ebye bitondo oku hinga wabikwata mu liboko lyobe.

²¹ Pe ukabatongweze ngayi, Nyambi ya Ngula ukwamba ngayi, Nikafumisha baka Ishalela nimwabo ku mikoka oku banayi, nikaba kungula oku nimwako bali pe nikababwesha mu litunga lyabo.

²² Nikabenga mukoka umo mu litunga, ha mapili a Ishalela. Mwene umo niye ukabalela nimwabo. Nohobene kaliha kami bakalitapulula mwanga kukekale mikoka yibili, hinge wene wubili.

²³ Kami kaliha bakalibipisha nibo bamwine na kulemesha tunankishi, kaliha bakatenda byuma byawunyengwe, kami kaliha bakatenda biheka byabibi. Nikabayatila ku wubi wabo nimwawo uya batendelenga, nikabayowesha ngayi mwanga bakenge bantu bami kami Ami nikenga Nyambi yabo.

²⁴ “Mukamulimo wami Ndavita niye ukenga mwene yabo, nimwabo bakekala na mulishani umo. Bakayoya na mazu wami pe bakwombatala ndayano zami.

²⁵ Bakayoya mu litunga liya napanine mukamulimo wami Yakobo, litunga muya bayoyelenga batatizenu. Nibo na banababo na bazukulyabo bakekalanga muya mu litunga shikati nimwasho. Mwene wakufweka ngo mukamulimo wami Ndavita niye ukabalelanga mwaya myaka.

²⁶ Nikalimama nabo bya kwikala mu ku mwena, kukenga kulimama kwa mwaya myaka. Nikabatangamisha kami nikabahanyisha, pe nikayaka Litala lyami lya kuyela mukati kabo mwaya myaka.

²⁷ Nikekala hamo nabo, bakenga bantu bami, kami Ami nikenga Nyambi yabo.

²⁸ Matunga akalimuka ngayi Ami nili Nyambi ya Ngula ninahata Ishalela ngayi enge wa kuyela, ndaba Litala lyami likekala hakati kabo mwaya myaka.”