Ezekiyele 36 - Libuka Lya Kuyela

Mfuywezi za Nyambi ha litunga lya Ishalela

¹ Nyambi ya Ngula wambile kukwami ngayi, “Mwana muntu lubulula ku mapili a Ishalela ngayi, Enu mapili a Ishalela yuvwenu lizu lya Nyambi ya Ngula.

² Ndaba bamalamo benu bambilenga ngayi, ‘Haya aya mapili aku mwaka etu tuku wakona.’ ”

³ Haya yanga ukabalubulwile pe ukambe ngayi, “Nyambi ya Ngula ukwamba ngayi, oho bamalamo benu bamipukwile na kumi lyatilila kuzimbalila nimwazo pe mwengile likona lya matunga nimwawo, bantu batatikile kumi kendula na kumitungula.

⁴ Haya enu mapili a Ishalela munafwanini kuyuvwa lizu lya Nyambi ya Ngula. Ebye nibyo akwamba Nyambi ya Ngula ku mapili naku binkanda naku tunkonkolonga naku mikulo, kunebye nimwabyo binashiwuku naku zinkena zinashala nahiya ziya bapukwile ziya bali na kukendula bakamatunga nimwawo aya anazingulukuko.”

⁵ Nyambi ya Ngula ukwamba ngayi, ninamba mazu na wukali wantukumina ya kulwisha awa matunga nimwawo hamo na litunga nimwalyo lya Endoma. Banashimbi litunga lyami na mitima ya kutangala oku hibakendula, banashimbi na zimbuwa zalyo za kubuyishila kwinga likona lyabo.

⁶ “Haya yanga ukalubulule ku litunga lya Ishalela. Yanga ukatongweze mapili na binkanda na tunkonkolonga na mikulo ngayi, ‘Nyambi ya Ngula uli na kwamba na wukali walihungu, ndaba bakamatunga bali na kumi kendula kami bali na kumi lyatilila.’

⁷ Nyambi ya Ngula ukwamba ngayi, nikulibeza hinga nakatula liboko ngayi awa matunga amizinguluka naniwo kami akalyatililiwa.

⁸ Ngoboni ha mapili a Ishalela mitondo yikazobela mabizi na kuyima mikabo ya bantu bami ba Ishalela ndaba wuluno baboke ku munzi.

⁹ Enu bantu bami Ami nili nenu hamo, nikamibwesha mu litunga pe nikamitampika.

¹⁰ Nikahanyisha bantu baya muli nabo hamo na baka litala nimwalyo lya Ishalela, mukekala mu zinkena pe mukatungulula nimwabyo biya byashalile hinga bya shiwuka.

¹¹ Nikahanyisha balume hamo na tuyamana tuya muli natwo, kami mukavula shikuma kupitakana eshi mwekalile, mukekala na bana babengi. Nikamileha mukekale ngonehe mwekalilenga, nikamitangamisha kupitakana eshi mwekalilenga. Pe mukalimuka ngayi Ami nili Nyambi ya Ngula.

¹² Nikamibwesha enu bantu bami baka Ishalela, ngayi mukekale kami mu litunga. Likenga likona lyenu nohobene liya litunga kuketabila mwanga bana benu bakafwe ku nzala lifwako.”

¹³ Nyambi ya Ngula ukwamba ngayi, “Bantu bali na kwamba ngayi litunga lili na kulya bantu kami lili na kupukula bana bamu litunga.

¹⁴ Haya kufuma hano litunga lifwako kukalya bantu, kami lifwako kukapukula bana benu. Eshe nisho akwamba Nyambi ya Ngula.

¹⁵ Kaliha niketabilisha bakamatunga ngayi mwanga bakamitukane kami. Lisheni liya mwayuvwilenga lya kukenduliwa ku bantu kukekalako lifwako. Kami bana benu kukafumishiwa mu litunga lyenu bafwako.” Eshe nisho anamba Nyambi ya Ngula.

Mfuywezi ha bantu ba Ishalela

¹⁶ Kami lizu lya Nyambi ya Ngula lyezile kukwami ngayi,

¹⁷ “Mwana muntu, oho bantu ba Ishalela bekalilenga mu litunga lyabo, balibipishile na biheka byabo hamo na zintendelo zabo. Biheka byabo ku meho ami byengile ngo mazilo aya ekalanga nawo mbuyama ndi nayi ku ngonda.

¹⁸ Niho netilile wukali wami hahabo ndaba bayitilile mukeza mu litunga kami babipishile litunga na tunankishi twabo.

¹⁹ Nabatandilile mu matunga ashenge pe bapazaninine mu matunga. Nabayatile kwezekesha na biheka byabo hamo na zintendelo zabo.

²⁰ Pe omu mu matunga nimwamo bayile lizina lyami lya kuyela lyabipile, ndaba bantu babatoyelenga ngayi, ‘Aba nibo bantu ba Nyambi ya Ngula ngoboni banashiyi litunga lyendi.’

²¹ Nekalile na shitima ha lizina lyami lya kuyela ndaba baka Ishalela balibipishile mukati ka matunga kuya bayile.”

²² Haya yanga ukambe ku baka litala lya Ishalela ngayi, “Nyambi ya Ngula ukwamba ngayi, ebye nikatenda kaliha byenu baka litala lya Ishalela, ngoboni ndaba ya lizina lyami lya kuyela elye munabipishi mukati ka matunga muya mwayile.

²³ Nikaholola kuyela kwa lizina lyami lyalinene elye munabipishi mukati ka matunga. Bakalimuka ngayi Ami nili Nyambi ya Ngula, oho nikamonesha kuyela kwami kupitila mumwenu pe bakalimonena nibo bamwine. Eshe nisho akwamba Nyambi ya Ngula.

²⁴ Nikamifumisha ku mikoka nimwayo naku matunga nimwawo pe nikamibwesha mu litunga lyenu.

²⁵ Nikamyanzila mema akuyela hahenu, pe mukayela, nikamiyelesha ku mazilo naku tunankishi twenu nimwato.

²⁶ Nikamipanika mutima wawupya na bihanganiko byabipya, nikafumisha mumwenu mutima wa limanya na kumipana mutima wawuntu.

²⁷ Nikayaka Moyo wami mumwenu pe nikamitwaminina ngayi mukombatale mazu wami na kulama ndayano zami eze ninamipana.

²⁸ Mukekala mu litunga liya napanikile bankakazenu, mukenga bantu bami pe Ami nikenga Nyambi yenu.

²⁹ Nikamilamwina ku mazilo enu nimwawo. Nikamimeneshela mbuto nohobene enu kukekala kami mu nzala mufwako.

³⁰ Nikawezelela mikabo yaku mitondo na mbuto yamu mafuba mwanga mukabule kuyuvwa lisheni ku bakamatunga ndaba ya nzala.

³¹ Mukanuka zinzila zenu zazibi na byuma byabibi biya mwatendele, niho mukaliyuvwa wubi enu bamwine ndaba yanebye nimwabyo byabibi nanebye byawunyengwe.

³² Nyambi ya Ngula ukwamba ngayi, nikushinga mulimuke ngayi kaliha nili na kutenda ebye ndaba yanenu, enu bantu ba Ishalela. Munafwanini kuyuvwa lisheni na wunginga ndaba yanebye munatende.”

³³ Eshe nisho anakwamba Nyambi ya Ngula ngayi, “Ha mutena ou nikamiyowesha ku wubi wenu nimwawo, nikamikalika mu zinkena zenu kami nimwabyo, biya byashiwukile bikatungululiwa.

³⁴ Litunga liya lyashalile nahiya likalimiwa pe bakakwenda baya bamonenenga mafuba wenu hinga azika bakawamona analimiwi.

³⁵ Pe bakamba ngayi elye litunga lyashalile nahiya hano lyafutukakale ngo mfuba ya Endeni. Zinkena zashiwukile ziya zashalile nahiya ziloba hano zili mu bipata kami mwekalakale na bantu.

³⁶ Niho baya bakashala ha matunga aya amizinguluka bakalimuka ngayi Ami nili Nyambi ya Ngula ninatungululu biya byashiwukile na ku shanga mbuto mu litunga muya mwashalile nahiya. Ami Nyambi ya Ngula ninamba pe nikashitenda.

³⁷ “Eshe nisho akwamba Nyambi ya Ngula ngayi, nikayuvwilila nimwabyo ebye bakalomba bana ba Ishalela kukwami, pe nikabetabila mwanga bakahanye ngonehe bambelele.

³⁸ Bakahanya ngonehe bambelele bankombela, ngonehe bahanyanga bambelele mu Yelushalema ha shikati sha bimbo bya kuhatiwa. Zinkena zabo zinashiwuku zikenzala na mihoko ya bantu. Pe bakalimuka ngayi Ami nili Nyambi ya Ngula.”