Ezekiyele 35 - Libuka Lya Kuyela

Kulubulula bya Endoma

¹ Lizu lya Nyambi ya Ngula lyezile kukwami ngayi,

² “Mwana muntu ambila lipili lya Sheya.

³ Batongweze ngayi, Nyambi ya Ngula ukwamba ngayi, nili na kukulwisha obe lipili lya Sheya, nika kulwisha na ngovu zami pe nikamingisha mapembe.

⁴ Nikashiwula zinkena zobe, pe litunga lyobe nikalifutula mapembe. Pe mukalimuka ngayi Ami nili Nyambi ya Ngula.

⁵ “Shikati nimwasho obe wengile kamalamo wa Ishalela, na kubetabilisha bantu ba Ishalela ha shikati oho bekalile mu makando amanene ngayi bashushuliwile.

⁶ Mwa shikuma ngonehe nayoya Ami Nyambi ya Ngula, nika kuleha ngayi ukafwe ku mponde na batupondwa bakakutanda. Mponde yikakukonkezeka ndaba uli na mulandu wakuyita mukeza.

⁷ Nikashiya lipili lya Sheya mu mapembe pe nikaziha muntu nimwendi uya ukapitamo.

⁸ Nikafwika mapili obe na mituntu pe zinyutu za baya bakazihiwa munzita zikawila ha binkanda namu mikulo.

⁹ Nikakufutula mapembe a mwaya myaka, pe kowa muntu eze akatweshe kami kwikala mu zinkena zobe. Niho ukalimuka ngayi Ami nili Nyambi ya Ngula.

¹⁰ “Wambile ngayi awa matunga abili Ishalela na Yunda hamo na limvu lyawo nimwabyo binengi byobe pe bikekala mu ngovu zobe, hinge ndi Ami Nyambi ya Ngula ou Nyambi yabo niko nili.

¹¹ Haya mwa shikuma oho Ami Nyambi ya Ngula nayoya, nika kubweshela kwezekesha na wukali wobe na mwili wobe na nzimbo yobe, ngonehe watendele ku bantu bami. Bakalimuka ngayi Ami ni kumishushula hanebye mwatendele kukwabo.

¹² Pe ukalimuka ngayi Ami Nyambi ya Ngula nayuvwile matuka nimwawo wambile ha bya mapili a Ishalela, kami wambile ngayi haya nimwabyo byashalakale nahiya kami byapanikiwakale kukwobe ngayi mwanga ubivote.

¹³ Nayuvwu mazu akulilundumika na kuliyemeza aya wambile hahami.

¹⁴ Nyambi ya Ngula ukwamba ngayi kaye nimwako kakawahilila oho nikalobesha litunga lyobe.

¹⁵ Nobe wawahililile oho litunga lya Ishalela lyalobele, nohobene na nobe kami nisho nika kutenda. Ukafutuka lipembe obe lipili lya Sheya na litunga lya Endoma nimwalyo. Pe muntu nimwendi ukalimuka ngayi Ami nili Nyambi ya Ngula.”