Ezekiyele 34 - Libuka Lya Kuyela

Balishani bamu Ishalela

¹ Lizu lya Nyambi ya Ngula lyezile kukwami ngayi,

² “Obe mwana muntu yanga ukambile balishani bamu Ishalela, kabatongweze ngayi, ‘Nyambi ya Ngula ukwamba ngayi, makando wenu enu balishani bamu Ishalela, muli na kulilela tuhu enu bamwine! Kati mulishani kaliha nafwanini kulisha bambelele ndi?

³ Mwanwanga mahwe kami mwavwalanga bivwalo binatendiwi ha wushako wa bambelele, mwazihanga bambelele ba kushuwa ngoboni kushinga kulisha bambelele mufwako.

⁴ Shilolo mushumishe baya banapopo hinge kupanga baya ba kukola kami shilolo mupambe ha bitombo bya baya banalemana. Shilolo mubweshe baya banashanuku kami shilolo muye na kushinga baya banayongala. Munengi bakakutwaminina baya bali na wukali na shilala.

⁵ Nohobene bambelele bapanzanine ndaba kaliha kwekalile mulishani, pe oho bapanzanine bafutukile kwinga byakulya bya tunzama nimwato twa mu lishaka.

⁶ Bambelele bami bapanzaninine ku mapili na ku binkanda nimwabyo. Bapanzaninine mu litunga nimwalyo, pe kowa ou wayile na ku bashinga hinge kubalama.

⁷ Haya enu balishani yuvwililenu ku lizu lya Nyambi ya Ngula.

⁸ Nyambi ya Ngula ukwamba ngayi mwa shikuma ngonehe nayoya, bambelele bami babapukulakale ndaba kunabulu balishani. Bambelele bami bafutukakale byakulya bya tunzama twa mu lishaka. Balishani bami shilolo baye na kushinga bambelele bami. Bali na kulilama tuhu nibo bamwine kulama bambelele bafwako.

⁹ Haya enu balishani yuvwililenu lizu lya Nyambi ya Ngula.

¹⁰ Nyambi ya Ngula ukwamba ngayi, aba balishani ku bashinga nifwako, nikashinga bambelele bami kukwabo, kami kukabetabilisha ngayi bakalishe bambelele bami nifwako, kami kuka baleha ngayi bakalilamenga tuhu nibo bamwine nifwako. Nikabayangula bambelele bami kutina bakafutuka kwinga byakulya byabo.”

Mulishani wamuwahe

¹¹ “Ebye nibyo ali na kwamba Nyambi ya Ngula ngayi, Amimwine nikashinga bambelele bami pe nikabalama.

¹² Ngonehe mulishani alamanga bambelele baya analete hamo munyima ya kupanzana, na nami kami nikalama bambelele bami. Nikabalamwina na kubafumisha kuzimbalila nimwazo kuya bapanzaninine ha mutena uyo wa mincimpwe na makando.

¹³ Nikabafumisha ku mikoka naku matunga nikaba kungula na kubabwesha ku litunga lyabo. Nikabalama shiwahe ha mapili a Ishalela na kutushinzi twa mema na muzimbalila nimwazo za litunga.

¹⁴ Nikababuyishila ku mwila wawuwahe, mu ku mwena mukati ka mapili na mu zimbuwa na muzimbalila muli mwila wawuwahe yili mu litunga lya Ishalela.

¹⁵ Amimwine nikalama bambelele bami, kami nikabalangika hanci. Eshe nisho akwamba Nyambi ya Ngula.

¹⁶ Nika shingashinga baya banayongala, nikabwesha baya banashanuku, nikapamba ha bitombo bya baya banalemana kami nikashumankanisha baya banapopo, ngoboni ba kushuwa na baya ba kushuma nikabalobesha. Nikabuyisha bambelele bami mu wuwahe.”

¹⁷ Nyambi ya Ngula ukwamba ngayi, “Haya enu bambelele bami nikamiyata mukati kenu umo na wamina, nikafumisha babawahe ku bababi pe nikafumisha bambelele ku bampongo.

¹⁸ Kati kaliha shashiwahe ngayi enu mubuyile mu mabuyishilo amawahe ndi? Kati munafwanini kulyatangila bya kubuya biya binashalaho na mawulu ndi? Kati kaliha shashiwahe ngayi enu munwe mema akuyela ndi? Kati munafwanini kulyatangila mu mema aya anashalaho ngayi mwanga afundale na ndoba ndi?

¹⁹ Kati bambelele bami banafwanini kulya ebye munalyatangili ndi? Kati banafwanini kunwa mema awa munalyatangili ngayi abundale na ndoba ndi?

²⁰ “Nyambi ya Ngula ukwamba ngayi, Ami nikayata byambo mukati ka bambelele ba kushuwa na bambelele ba kuyonda.

²¹ Munanyakwili bambelele baya bali na kukola kunkumo, munabanyakili kwakutali na litanga.

²² Nikalamwina bambelele bami pe kaliha niketabila ngayi bakabapukule, kami nikayata mukati ka mbelele umo na wamina.

²³ Nikabapanika mulishani umo wakufweka ngo mukamulimo wami Ndavita ngayi mwanga akabalame. Ukabalama shiwahe, pe niye ukenga mulishani wabo.

²⁴ Ami Nyambi ya Ngula nikenga Nyambi yabo pe mukamulimo wami wakufweka ngo Ndavita niye ukenga mwene hakati kabo. Nibyo ninamba Ami Nyambi ya Ngula.”

²⁵ “Nikalimama nabo kulimama kwa kuleta ku mwena, kami nikafumisha tunzama twa mu lishaka nimwato mu litunga, ngayi mwanga bambelele bami bakatweshe kwikala shiwahe mu mafuba hinge kulangana shiwahe mu lishaka mwakubula malamo.

²⁶ Mfuywezi zami zikekala mumwabo naha zimbalila zazinguluka shinkanda shami, nikabatandalisha na mvula hashikati shendi sha kuloka.

²⁷ Mitondo ya mumafuba yikekala na mikabo na limvu likatutwisha zimbuto, pe bantu bakekala shiwahe mu litunga. Bakalimuka ngayi Ami nili Nyambi ya Ngula oho nikaketula mawenge wabo na kubafumisha mu maboko a baya babayakile mu wulungo.

²⁸ Bakamatunga kuka balwisha kami bafwako, pe tunzama twa mu lishaka kuka baziha na ku balya kami tufwako. Bakekala mu ku mwena pe kowa muntu ukabatinisha.

²⁹ Ami nikabapanika litunga lya wilo shikuma kami nikamanisha nzala mu litunga. Pe bakamatunga kaliha bakatwesha ku balimbwilisha kami.

³⁰ Pe bakalimuka ngayi Ami nili Nyambi ya Ngula ou Nyambi yabo nili nabo kami bakalimuka ngayi baka litala lya Ishalela benga bantu bami. Eshe nisho anamba Nyambi ya Ngula.

³¹ Enu bambelele bami litanga liya nikulela, muli bantu bami kami Ami nili Nyambi yenu.” Eshe nisho anamba Nyambi ya Ngula.