Ezekiyele 33 - Libuka Lya Kuyela

Shikukulupisho Sha Nyambi Ha Bantu Bendi 33:1—37:28 Nyambi ukuyaka Ezekiyele kwinga mukakulama

¹ Nyambi ya Ngula wambile kukwami ngayi,

² “Obe mwana muntu tongweza bantu bobe bikatendiwa nakaleta nzita ku litunga. Bantu bamu litunga liyo ba kulihatila muntu umo mukati kabo kwinga mukakulama.

³ Oho niye aku mona bakankole beza uku fwanina ku shiba mpandula ngayi atosheshe muntu nimwendi.

⁴ Ndi muntu wamina ukuyuvwa mpandula pe a kubula kutwalako mutima, ndi mukankole ukwiza na kumuziha pe ukanyanciwa niyemwine ha lufu lwendi.

⁵ Niye mwine unalishingili lufu lwendi, ndaba shilolo atwale mutima wendi kukushiwululiwa. Shinga wayakileko mutima shinga wapulukile.

⁶ Ngoboni ndi mukakulama uku mona bakankole hibeza pe niye ha kubula ku shiba mpandula kutoshesha bantu, bakankole bakeza na kuziha baya bantu ndaba ya wubi wawuya mukakulama. Pe ami nikapana mulandu ku mukakulama ha lufu lwa baya bantu.

⁷ “Obe mwana muntu haya nakuyakakale kwinga mukakulama bantu nimwabo ba Ishalela. Obe ukakumisha kukwabo ebye nimwabyo nikakutongweza bya ku bashiwulula.

⁸ Ndi ami nikutoya muntu ngayi, ‘Obe muntu uli wamubi unafwanini kufwa,’ pe obe hiwukubula kumutongweza ngayi mwanga atenguluke ku wubi wendi, uya muntu ukafwa ndaba ya wubi wendi ngoboni mulandu wendi nikawuyaka ha mutwe wobe.

⁹ Ngoboni ndi obe ukwambila muntu ha wubi wendi pe niye ha kubula kuleha kutenda byabibi, uya muntu ukafwa ndaba ya wubi wendi, ngoboni obe ukalipulwisha obe mwine.”

Mulimo wa muntu na muntu

¹⁰ Nyambi ya Ngula wambile kukwami ngayi, “Obe mwana muntu yanga ukambe ku baka Ishalela ngayi, enu munamba ngayi, ‘Milandu yetu na wubi wetu binatuwishili hanci haya twalobakale ndaba yabyo. Haya tukayoya nahiti?’

¹¹ Batongweze ngayi, ‘Mwa shikuma ngonehe Ami Nyambi ya Ngula nayoya kaliha nawahililanga na lufu lwa muntu ukutenda wubi ngoboni nashinganga ngayi atenguluke, mwanga afume ku wubi pe ayoye. Tengulukenu! Tengulukenu fumenu ku zinzila zazibi! Kati ndabangani mu kufwila enu baka litala lya Ishalela?’

¹² “Haya mwana muntu tongweza baka Ishalela ngayi, ‘Ndi muntu wakulunga ha ku balika kutenda byabibi uya wuwahe atendele mwaka kutwesha kumulamwina wufwako, muntu wakuluwa ndi ukutenguluka pe ukapuluka. Muntu wakulunga ndi ukubalika kutenda wubi ukafwa mu uya wubi.’

¹³ Ami ndi nikukulupisha wumi ku muntu wakulunga, ngoboni ndi niye a kukulupila ha kulunga kwendi kwa mwaka pe ha ku balika kutenda byabibi, nohobene biya bya kulunga atendele mwaka kutwesha kukanukiwa bifwako, ukafwa ndaba ya uya wubi anatende.

¹⁴ Ndi nikwamba ku mukawubi ngayi, ‘Mwa shikuma ukufwa,’ ngoboni ndi ha ku shiya kutenda wubi, ha ku balika kutenda byabiwahe na byakwoloka,

¹⁵ pe ha kubwesha ebye akwatile ndaba ya mu kuli ou apanikile minendi hinge kubwesha ebye ayibile pe ha ku shiya nimwabyo byabibi na kukonka mwayila ndayano mwa shikuma ukayoya kukafwa wufwako.

¹⁶ Ami nikamuyatila ku wubi ou atendele. Niye ukayoya ndaba unabaliki kutenda byabiwahe na byakwoloka.

¹⁷ “Obe Ezekiyele, haya bantu bobe bakwamba ngayi, ‘Nzila ya Mwene ya kubula kwoloka.’ Ngoboni nzila yabo niyo ya kubula kwoloka.

¹⁸ Ndi muntu wakulunga ukuleha kutenda byabiwahe pe ha ku balika kutenda byabibi, ukafwa ndaba yanebye anatende.

¹⁹ Ndi muntu wakuluwa ukutenguluka pe ha kufuma ku byabibi, ha ku balika kutenda byabiwahe na byakwoloka uya muntu ukayoya ndaba yanebye akutenda.

²⁰ Ngoboni bantu ba Ishalela bakwamba ngayi, ‘Nzila ya Mwene ya kubula kwoloka.’ Ami nikayata muntu na muntu kwezekesha nanebye akutenda.”

Lukena lwa Yelushalema lukushiwuka

²¹ Ha mutena wa mutanu mu ngonda ya wulikumi, mu mwaka wawulikumi na yibili munyima ya kutwaliwa mu wuntapwa, mulume watinine kufuma ku Yelushalema pe niho ezile kukwami, wantongwezele ngayi, “Lukena lunashiwuku.”

²² Mazolo oho uya mulume shilolo akume, ngovu za Nyambi ya Ngula zezile hahami. Oho kwashile lumenemene uya mulume wakumine, Nyambi ya Ngula wafukulwile kanwa kami pe niho kami natweshele kwamba.

²³ Lizu lya Nyambi ya Ngula lyezile kukwami ngayi,

²⁴ “Obe mwana muntu, aba bantu bashala mu mapembe a zinkena zamu litunga lya Ishalela bali na kwamba ngayi, ‘Abulahama wengile tuhu muntu umo ngoboni wakonene litunga. Etu tuli babengi, mwa shikuma litunga lyapanikiwa kukwetu kwinga likona lyetu.’

²⁵ Haya batongweze ngayi, ‘Ebye nibyo akwamba Nyambi ya Ngula ngayi, munakulya nyama na mukeza wayo, kami mwapenzanga kutunankishi ngayi tumiyavwe, kami mwazihanga bantu. Kati litunga liku fwanina kupanikiwa kukwenu ndi?’

²⁶ Enu mwa kulupila ha mikwale yenu. Ntendelo yenu yenga ya wunyengwe, muntu nimwendi ukutenda wumambe na mukaza minendi. Kati litunga liku fwanina kupanikiwa kukwenu ndi?

²⁷ Batongweze ngayi, eshe nisho akwamba Nyambi ya Ngula ngayi, mwa shikuma ngonehe nayoya Ami Nyambi, nimwendi ou uli mu lukena luya luli na kuloba ukazihiwa mu nzita. Nimwendi ou uli mumafuba ukaliwa ku tunzama twa mu lishaka. Nimwendi ou uli mubipata na mumanzolongoma ukafwa ku wulweli.

²⁸ Litunga nikalifutula mapembe, ngovu bakuliyemeza nazo zikamana. Mapili a Ishalela akabipa nohobene kowa muntu ukatwesha kupitamo.

²⁹ Oho nikashushula bantu ha wubi wabo, nakufutula litunga kuliyinga mapembe, pe bakalimuka ngayi Ami nili Nyambi ya Ngula.”

Lizu lya muluwe likulubuluka

³⁰ “Obe mwana muntu, bantu bali na kwamba byobe oho ba kuliwana ku kembi ka lukena hinge kubipana bya matala wabo, bakwamba ku umo na wamina ngayi, ‘Tuyenunga tukayuvwe lizu linafumu kuli Nyambi ya Ngula.’

³¹ Bantu bami bakwiza kukwobe ngonehe batendanga shikati nimwasho. Bakwikala ku meho obe na kuyuvwilila lizu lyobe, ngoboni kutenda ebye ba kuyuvwa bafwako. Bakwamba tuhu na tunwa ku monesha ngo ngayi bancinga, ngoboni mu mitima yabo bali na mutongo wakuwana mali munzila ya kubula ku fwanina.

³² Kukwabo unengi ngonehe muntu uya uli na lizu lyaliwahe ukuyimbila nyimbo za ku haka hinge muntu uya ukumbeta shiwahe kahanzi. Bakuyuvwa lizu lyobe ngoboni kutenda ebye ba kuyuvwa bafwako.

³³ Ngoboni mazu awa unamba akakuma ha shikati sha kulinzalishilila pe bakalimuka kupwisha, nohobene bakalimuka ngayi muluwe wa Nyambi ya Ngula wekalile mukatikabo.”