Ezekiyele 29 - Libuka Lya Kuyela

Kulubulula bya kushushula Engepita

¹ Ha mutena wawulikumi na abili mu ngonda ya wulikumi mu mwaka wawulikumi Nyambi ya Ngula wambile kukwami ngayi,

² “Mwana muntu, tongweza Fwalo mwene waku Engepita na kulubulula kukwendi hamo na Baengepita nimwabo ngayi bakashushuliwa.

³ Obe amba ngayi ebye nibyo ali na kwamba Nyambi ya Ngula. Mona, ami nili mukankole wobe, Obe Fwalo, mwene waku Engepita. Obe litoshi ngandu walalanga mu mushinzi, ukwamba ngayi, Nayilo wenga wobe, ukwamba ngayi obe wawulengele,

⁴ Nikayaka kahanto mu mimbanga yobe, na kwingisha zinci za mu mushinzi wobe zikukakatile. Nikakukokela ha lukandwa lwa mushinzi wa Nayilo, hamo na zinci ziya za kukakatili.

⁵ Nikakuyumbila mu libelelengwa, obe hamo na zinci za mumushinzi wobe, ukawila hanci, kami kowa ukakutola na kukufunda. Nikalupanika ku batuyoni, na batuyamana kwinga byakulya byabo.

⁶ “Niho bantu nimwabo ba Engepita bakalimuka ngayi Ami nili Nyambi ya Ngula. Obe Engepita wengile ngonehe muwana wa litete.

⁷ Oho Baishalela ba kulalabilile ku kukwata, wapokokele na kuyaha mu zinkwapa zabo, oho ba kuyendaminine, wapokokele na ku bayuvwisha kukola ha mongo nimwaho.

⁸ Nohobene, Ami Nyambi ya Ngula nikamba ngayi, mona nikuleta nzita hahobe ngayi yilobeshe bantu na batuyamana.

⁹ Litunga lya Engepita likafutuka lipembe, niho ukalimuke ngayi Ami nili Nyambi ya Ngula. Obe wambile ngayi mushinzi wa Nayilo wenga wobe, kami obe wawulengele,

¹⁰ haya mona Ami nili kamalamo wobe hamo na kamalamo wa mushinzi wobe, nikafutula litunga lya Engepita kwinga lipembe, kufuma ku Mingindo kuya ku Shiyene, kukuma na ku nginza na Etopya.

¹¹ Kowa muntu hinge kayamana ukalyatamo, ha myaka ya makumi anaa kowa shuma shikendamo.

¹² Nikengisha Engepita kwinga lipembe mukati ka matunga nimwawo. Ha myaka makumi anaa minzi ya Engepita yikekala mu mapembe. Nikengisha Engepita kwinga bakakuholama, baketukila ku litunga nimwalyo na kwikala hakati ka bantu bashenge.”

¹³ Nyambi ya Ngula ukwamba ngayi, “Kunyima ya myaka makumi anaa, nikabwesha baka Engepita kubafumisha mukati ka mikoka omu nabapanzanishile,

¹⁴ nikabafumisha mu wulungo, pe nikababweshela ku Patiloshi ku mabukubuku a Engepita oku bafuminine. Kuyo kukekala wene wakupopa.

¹⁵ Ukenga wene wakupopa shikuma kupitakana wene nimwawo, pe wufwako kami kukaliyemeza hayilu yaminayo mikoka. Nikabashepesha ngayi bakabule kutwesha kami kulela matunga amina.

¹⁶ Bantu bami Baishalela bafwako kami kuka yendamina hali Engepita, pe ku shushula oku kuka banukisha milandu yabo iya batendele oho babanyepelenga ngayi babayavwe. Niho baishalela bakalimuka ngayi Ami nili Nyambi ya Ngula.”

Mwene Nembukandineza ukakoma Engepita

¹⁷ Ha mutena wakutatika mu ngonda wakutatika mu mwaka wa 27 mwaka wa wuntapwa, Nyambi ya Ngula wambile kukwami ngayi,

¹⁸ “Mwana muntu, Nembukandineza mwene waku Mbambiloni, wafunzwile bakanzita bendi mu kulwisha Tile, wakandamikile banzita bendi kushimba miziho yayilemu na ha mitwe yabo hafutukile zitenda naha mafuzi wabo hahutukile na kutenda mafuzo mafuzo. Hinge noho batendele noho mwene hinge bantu bendi kaliha batweshele kuwanaho shuma shimina ha kuyanda kwabo.

¹⁹ Nohobene haya eshe nisho ali na kwamba Nyambi ya Ngula, nikapanika litunga lya Engepita kuli Nembukandineza mwene wa Mbambiloni, pe niye ukapukula na kuyangula na kushimba wuheti nimwawo wamu Engepita kwinga bya kuhingisha ku bakanzita bendi.

²⁰ Nikamupanika Engepita kuhingisha ha mulimo wendi, ndaba ngayi banzita bendi bantendelele milimo. Eshe nisho ali na kwamba Nyambi ya Ngula.

²¹ “Ha mutena uya bantu Baishalela bakekala kami na ngovu, pe obe Ezekiyele nikakutongweza bya ku fwanina kwamba kukwabo. Niho bakalimuke ngayi Ami nili Nyambi ya Ngula.”