Ezekiyele 28 - Libuka Lya Kuyela

Mazu akushushula mwene waku Tile

¹ Nyambi ya Ngula wambile kukwami ngayi,

² “Mwana muntu, tongweza mwene waku Tile ebye nikwamba Ami Nyambi ya Ngula ngayi, ‘Uli na mutima wakulilundumika, kami ukulitoya ngayi uli nyambi. Wekalanga ha litanda lya banyambi, hakati ka liwate lya kunonka. Ngoboni obe ulituhu muntu, kaliha nyambi.

³ Ee, uli wakukeya kupitakana Ndanyele, kowa sha kuwi sha kuholama kukwobe.

⁴ Ngana zobe na ku yuvwishisha kwobe, binakuheteshe. Kami unalikungwilili ngolinde na shiliva.

⁵ Na ngana zazinene za mikwebo, unawezelele ku wuheti wobe. Mutima wobe una kulilundumika mu wuheti.

⁶ Nohobene, eshe nisho anakwamba Nyambi ya Ngula ngayi, “Ukulihanganika ngayi uliwakukeya ngonehe Nyambi,

⁷ haya mona nikaleta bayeni mu kukulwisha, bantu bakuluwa shikuma, bakalobesha wuheti wobe nimwawo, ou unawana mu ku shoshoka na kukeya kwobe.

⁸ Bakakuyumbila mu liwate, ukafwa lufu lwa mponde.

⁹ Kati ushili kwamba ngayi uli nyambi hambili ya nobo ba kukuziha ndi? Hinga wenga muntu, kaliha nyambi, oho ukekala mu maboko anobo bakakukuziha.

¹⁰ Kami ukafwa lufu ngonehe lwa bantu bakubula wunyambi, mu maboko a bayeni.” Eshe nisho anakwamba Nyambi ya Ngula.

Kuwa kwa mwene waku Tile

¹¹ Nyambi ya Ngula wambile kukwami kami ngayi,

¹² “Mwana muntu, tuwa mbingo hali mwene waku Tile, mutongweze ebye nikwamba Ami Nyambi ya Ngula ngayi, ‘Obe wengile shihembwilizo ha byabiwahe nimwabyo, wenzalile na ngana kami wengile wumuwahe.

¹³ Wekalilenga mu Endeni mu mfuba ya Nyambi, pe waliyengelenga na mamanya a ndando yayinene a mishobo nimwayo, a ndayimondi na topazi na yashipa, kalisholiti na mbeliyilu na onikishi na shafwila, lumbi na emelalundi na bya kuliyenga nimwabyo bya ngolinde. Ebye nimwabyo byatendiwilile obe ha mutena uya walengiwile.

¹⁴ Nakutendele kwinga likelumbi wakutinisha mu kukulama, obe wekalilenga ha lipili lya kuyela lya Nyambi, wendelenga hayilu ya mamanya amawahe.

¹⁵ Nyinkalo yobe yengile ya kubula nyanco, kufuma ku mutena walengiwile, hantu noho watatikile kutenda wubi.

¹⁶ Mukuvula kwa mikwebo yobe, eshe shakutwalile ku mishunga na kutenda wubi. Nakukandamikile kufuma ha lipili lya kuyela, obe likelumbi nakufumishileko kuyo, mukati ka mamanya amawahe.

¹⁷ Wengile wakuliyemeza ha wuwahe wobe, wabipishile ngana zobe ndaba ya ku shinga mpupo, nakuwishilile hanci kwinga shihembwilizo ku bamyene bamina.

¹⁸ Watendele wubi wawunene shikuma, na mikwebo yobe ya kubula kupwisha, wabipishile myanya yobe ya kulemeshela. Nabangizile mundilo ha munzi wobe, na kukuhokesha peluu. Nakufutwile kwinga mutoko hambili ya bantu ba kumonenenga.

¹⁹ Na bantu nimwabo ba kulimukile, banakomoko shikuma, ndaba wakumakale kumamanino amakalu kami obe unayililili.”

Kulubulula bya ku nyanca Shindoni

²⁰ Nyambi ya Ngula wambile kukwami ngayi,

²¹ “Mwana muntu, ambila munzi wa Shindoni,

²² batongweze ngayi, ‘Ami Nyambi ya Ngula nikwamba kukwabo, ami nili kamalamo kobe, Shindoni kami nikaholola wuwahe wami mukatikobe. Bakalimuka ngayi Ami nili Nyambi ya Ngula, oho nika kushushula na kuholola kuyela kwami kukwobe.

²³ Nikatuma malweli kukwobe na mukeza mumikwakwa yobe, bantu nimwabo bakamana na kufwa na nzita yikamiholokela, pe mukalimuka ngayi Ami nili Nyambi ya Ngula.’”

Ishalela ukatandalishiwa

²⁴ Nyambi ya Ngula wambile ngayi, “Kowa ku matunga aya azinguluka aya ayandishilenga Ishalela akenga ngonehe mihengela na mitwampuku ya kulemeka Ishalela. Niho bakalimuke ngayi Ami nili Nyambi ya Ngula.”

²⁵ Nyambi ya Ngula wambile ngayi, “Nikabwesha bantu ba Ishalela kufuma ku mikoka oku na bapanzanishilile, kami bantu nimwabo bakalimuka ngayi ami nili Nyambi wa kuyela. Bantu ba Ishalela bakayoya kami mu litunga lyabo, litunga napanikile mukamulimo wami Yakobo.

²⁶ Bakekala muyo mu ku mwena, bakazika matala na kulima mafuba a mikolobozi ya shinyanca, nikashushula bandambo babo aba babayandishilenga, kami Ishalela ukekala mu ku mwena. Niho bakalimuka ngayi Ami nili Nyambi ya Ngula, Nyambi yabo.”