Ezekiyele 27 - Libuka Lya KuyelaLwimbo lwa malila lwa Tile 1 Nyambi ya Ngula wambile kukwami ngayi, 2 Obe mwana muntu, yimbilila Tile lwimbo lwa malila. 3 Amba kuli Tile, ou wekala kunkumo ya liwate, mukakutenda mikwebo na bantu aba bekala kumbalila nimwayo ya bibumbo bya liwate. Mutongweze eshe akwamba Nyambi ya Ngula ngayi, Obe Tile, ukwamba ngayi, “Niliwamuwahe ku shifwekesha.” 4 Munzi wobe wenga liwate, bakakutenda ba kutendele shiwahe. 5 Obe wengile ngo shishepe shashinene baliyavwishile maleenge amawahe ha ku shitenda, aha mutondo wa mupani aku lipili lya Sheniya, nanebye bya Shinda byafuminenga ku Lembanoni, nisho batendeshele shishimi shobe hayilu ya wato. 6 Batendele bilapo ha mitondo ya Oka yaku Mbashani. Batendele bya kufwika ha mato bya mitondo ya Paini yaku bikuli lya Shayipulashi, na kuyengabyo na mayewe a banzovu. 7 Makwiza wobe akuvuwisha engile akubalanga, likwiza lyaliwahe lya kulelema lyafumine ku Engepita. Lyengile lya wangu kulimukiwa hinge kwakutali. Likwiza lyobe lya kutinisha mwana lyafuminenga ku shikuli sha Elishahi, lyekalile na mishombela ya wuhombo na kufumbuluka. 8 Bantu bobe bakakuvuwa, bafumine ku Shindoni na Alibandi. Bantu bobe bawutungu, obe Tile, bekalile mumwobe, nibo ba kuvuwilenga. 9 Wekalile na balume bawutungu kupitakana, aba bengile bakakubaza mato bafumine ku Ngembalu. Bakakuvuwa nimwabo bafumine kuzimbalila nimwazo batendelenga mikwebo, mu matala akulandishila obe. 10 Bantu bafumine ku Pesha naku Lundi naku Puti bengile banzita bobe. Bapatikilenga makebo wabo na zihoshi zabo mu zintanda zenu. Banengi balume bamitambwilile wuwahe wenu. 11 Banzita bafumine ku Alibandi na Heleki balaminenga twimbi twabo na banzita bafuminenga ku Ngamandi balaminenga tutambo twobe, bapatikilenga makebo wabo ha twimbi twobe, nibo ba kuwahishile. 12 Bantu ba ku Tashishi batendele mikwebo nobe bashimbile shiliva, byondo, muwe na makango mu kutambashana na byuma byobe byabingi. 13 Bantu bamu Ngilishi, Tumbalu na Mesheki batendele nobe mikwebo, watambashaninenga ntutu yobe na bandungo na byuma bya lubemba. 14 Watambashaninenga ntutu yobe na bambishi na bakakukandama ha bambishi na bambongolo baku Mbeti Tongama. 15 Watendele mikwebo na bantu bafumine ku Ndendani na bantu babengi bafumine ku bibumbo bya matunga amengi ba kupanikile mayewe a banzovu na bitondo bya Imboni mu kutambashana na ntutu yobe. 16 Bantu ba ku Shiliya batendele nobe mikwebo, ndaba wekalile na byuma byabingi. Batambashaninenga na nobe mamanya amawahe a nkololobya a emelalundi na Kolalu na Lumbi na makwiza a shimbombo akufumbuluka na likwiza lya kulelema lyaliwahe mu ku landa wuheti wobe. 17 Yunda na Ishalela batambashaninenga ntutu yobe na loto na wushi na mazi a olive na wanga. 18 Bantu ba ku Ndamashika balandilenga wuheti wobe na ntutu yobe kubitambashananga na waine ya fuminenga ku Helumboni na wushako wafumine ku Shaha. 19 Bantu ba noko balandile byondo na kashiya na byuma bya kutoba ku ntutu yobe, kubiyumbila waine yaku Helumboni na wutonge waku Shahali. 20 Bantu ba ku Ndendani balandishile zinyangwa za miyemba za kwikala ha bambongolo na kutambashana na wuheti wobe. 21 Baka Alembiya na batulela bamu litunga lya Kenda balandishilenga nobe bana babambelele, bikungwe na bampongo. 22 Bakamikwebo ba ku Shemba naku Lama bakulandisha bya kutoba byabiwahe shikuma, bya lukumba na mamanya a ndando na ngolinde. 23 Bakamikwebo ba ku Zinkena za Halani na Kanehe na Endeni na Shemba na Ashule na Kilumandi batendele nobe mikwebo. 24 Bakulandisha bivwalo byabiwahe shikuma, bya shimbombo na bya kubalanga na manala a kubyazima akutanga na nyimbwa za ntebe na nyimbwa zazishezishe za kupohela shiwahe. 25 Mato amanene afumine ku Tashishi ashimbile wuheti wobe. Obe wengile ngonehe wato ha liwate, unalongiwi na byuma byabilemu. 26 Oho bakakuvuwa bobe, banakulete hakati ka liwate, mpepo yaku mushamuko ya kuteweshelele hakati ka liwate. 27 Oho wato wobe watewele, pe wuheti wobe nimwawo wakulandisha na bakakuvuwa bobe nimwabo na bakakubaza mato bobe, na bakakulandisha bobe nimwabo na banzita bobe nimwabo bekalile mu wato balobele mu liwate. 28 Bantu baya bekalile ha lukandwa bayuvwile, kukaloka kwa bakakuvuwa mato bobe oho batewelenga, 29 Mato nimwawo anayongo bakakuvuwa mato banayi ha lukandwa, 30 nimwabo bali na kulila ndaba yanobe, ba kulifukwila lukungu ha mitwe yabo, ba kulivumba mu mutoko. 31 Bakusheha huki zabo ndaba yanobe, na kuvwala bivwalo bya malila. Mitima yabo yina pempuku oho ba kulila. 32 Bakatumba lwimbo lwa malila hahobe ngayi, “Kati yani ukulifwanikiza na Tile, lukena luya lunalobo mu liwate?” 33 Oho byuma byobe bya kulandisha byayile mu nciza ya liwate, bantu nimwabo bawahililile. Waheteshele bamyene ba hanci na wuheti wobe. 34 Haya unatewe mu liwate, obe unandokama mu mampunga a liwate. Ntutu yobe na bantu baya ba kutendelele milimo, banandokama hamo na nobe mu liwate. 35 “Bantu nimwabo bekala ha shibumbo sha liwate, banakomoko ha kutamwa kwobe, hinge bamyene babo banayuvwu shikuma bowa, bowa unaholoko ha zimpala zabo. 36 Bakamikwebo nimwabo ba kukuhengamina, kutina kwingina mu kuloba kwobe. Banakulila ngayi, obe unayi unayililili.” |
Libuka Lya Kuyela © Bible Society of Zambia, 2020.
Bible Society of Zambia