Ezekiyele 25 - Libuka Lya Kuyela

Kuyata Kwa Nyambi Ha Matunga 25:1—32:32 Kulubulula bya Amoni

¹ Nyambi ya Ngula wambile kukwami ngayi,

² “Obe mwana muntu, bilika ulubwilile bakalitunga lya Amoni.

³ Tongweza Baamoni bayuvwilile kunebye nikwamba Ami Nyambi ya Ngula ngayi, enu mwawahililile ha ku mona litala lyami likuziluluka na ha ku mona litunga lya Ishalela linonga, ha ku mona baka Yunda hibatwaliwa mu wuntapwa.

⁴ Nohobene niketabilisha bakufuma ku mushamuko ngayi bamikone. Nibo bakatunga minzi na kwikala mu litunga lyenu. Bakalya mikabo na kunwa mahwe biya byengilenga byenu.

⁵ Ami nikafutula munzi wa Lamba kwinga mwanya wakubuyishila bakamela na litunga nimwalyo lya Amoni kwinga mwanya wakukongelanga bambelele. Niho mukalimuke ngayi Ami nili Nyambi ya Ngula.”

⁶ “Eshe nisho na kwamba Ami Nyambi ya Ngula ngayi, ‘Enu mwakambililile mu maboko wenu na kukiloka ha ku wahilila na kuhandula litunga lya Ishalela.

⁷ Ndaba yanebye mwatendele, ami nikamipanika ku matunga ngayi mwanga akamipukule. Nikaminongesha nimwenu nahiyo ngayi mwanga mukabule kukenga mukoka, hinga kukekala na litunga lyenu kami. Niho mukalimuke ngayi Ami nili Nyambi ya Ngula.’”

Kulubulula bya Mowambi

⁸ Nyambi ya Ngula unakwamba ngayi, “Litunga lya Mowambi linakwamba ngayi Yunda unengi ngonehe matunga amina nimwawo.

⁹ Nohobene Ami niketabilisha minzi ya kinga nginza ya baka Mowambi ngayi yikalwishiwe, hamo na ziya zinkena zaziwahe, Mbeti Yeshimoti, Mbaalu Meyoni na Kiliyatayimu.

¹⁰ Ami niketabilisha matunga aku libelelengwa lya ku mushamuko ngayi akakone Mowambi hamo na Amoni, ngayi Mowambi ukabule kwinga mukoka kami.

¹¹ Ami nikashushula baka Mowambi, nibo bakalimuka ngayi Ami nili Nyambi ya Ngula.”

Kulubulula bya Endoma

¹² Nyambi ya Ngula unakwamba ngayi, “Bakalitunga lya Endoma babweshele nguma kuli Yunda, haya kubweshela kwabo kunalete mulandu wa wunene shikuma ku Endoma.

¹³ Nohobene Nyambi ya Ngula unakwamba ngayi, ‘Nikashushula Endoma na kuziha bantu nimwabo na tuyamana tulimo. Ami nikabipisha liyo litunga na kulifutula mapembe, kubalikila munzi wa Temani kutwala ku munzi wa Ndendani. Nibo bakazihiwa na mukwale.

¹⁴ Nikabweshela nguma ku Endoma, ndaba ya bantu bami baka Ishalela, kami bakayuvwisha Endoma kupilama kwami kwakunene. Endoma ukalimuka eshe shikutontoloka kubweshela kwami.” Eshe nisho anamba Nyambi ya Ngula.

Kulubulula bya Fwilishita

¹⁵ Nyambi ya Ngula unakwamba ngayi, “Bakalitunga lya Fwilishitina banabweshele nguma ha bakankole babo ba mwaka na kubanongesha munzimbo.

¹⁶ Nohobene Nyambi ya Ngula unakwamba ngayi, ‘Ami nikalwisha baka Fwilishita na kubanongesha. Nikanongesha bantu ba Keleta nimwabo muyo mumbuwa ya baka Fwilishitina.

¹⁷ Ami nikabashushula shikuma na kubweshela nkole yayinene hahabo, kami bakayuvwa kupilama kwami. Niho bakalimuka ngayi ami nili Nyambi ya Ngula.’”