Ezekiyele 23 - Libuka Lya Kuyela

Bambuyama babili baka wubi

¹ Nyambi ya Ngula wambile kukwami ngayi,

² “Obe mwana muntu, shikati shamina kwekalile bambuyama babili mandiyabo umo.

³ Oho nibo bashili wanuke batendelenga lwiholwiho, kami oho bekalilenga mu Engepita batendelenga lwiholwiho, nibo bavulamine bya nkaanga yabo na kuyibipisha mu wunjenge.

⁴ Wamukulwane watumbiwile ngayi Ohola, mukonzo wendi watumbiwile ngayi Oholiba. Ohola wengile Shamaliya, wakanuke Oholiba wengile Yelushalema. Ami nabayekele nimwabo niho bambelekelele bana babalume na ba bambuyama.

⁵ “Ohola wengile wami, ngoboni wazaminine kwinga walwiholwiho na kushinga ba kuhakiwa bendi ba ku Ashiliya,

⁶ baya bavwalile mu bivwalo bya shimbombo bya nzita, babalemu na babilolo ba mpupo, nimwabo bengile babawahe bakakulwa na bambishi.

⁷ Niye watendele wunjenge na babilolo nimwabo ba Baashiliya na kulibipisha niye mwine ha kulemesha tunankishi twa Baashiliya.

⁸ Kami wazaminine lwiholwiho ngonehe atendelenga mu Engepita omu avulaminine bya nkaanga yendi kufuma ha shikati oho engilenga kankanga, balume balanganinenga nendi na kumutenda ngonehe walwiholwiho.

⁹ Nohobene ami namupanikile ku Baashiliya aba ashingilenga shikuma.

¹⁰ Nibo bamuvulile na kumushiya muhelengwa, bakwatile bana bendi babalume na ba bambuyama, pe niho bamuzihile na mukwale. Bakazi nimwabo noku noku bashimokelenga bya lufu lwendi.

¹¹ “Hinge noho, Oholiba wamonene ebye atendele yayiyendi, pe niye wabenkanyine na kwinga walwiholwiho shikuma kupitakana yayiyendi Ohola eshe ekalilenga.

¹² Niye wahakile na kushinga Baashiliya babalemu na babilolo, bakanzita aba bavwalilenga bya kubyazima na bakanzita bakakukandama ha bambishi, nimwabo baya bengile bandumbana babawahe.

¹³ Ami namonene ngayi wengile walwiholwiho shikuma, hamo na yayiyendi wubili wabo bengile bababi.

¹⁴ “Niye wapitakanishile lwiholwiho shikuma bene, wayembulukile na bibumbwabumbwa bya baka Mbambiloni bya ku bazila ha bishimi na kulombiwa mu wulombo wakufubila,

¹⁵ na tuponda twa mu zinkanda zabo na tuponda twa kuhakiwa twa kupamba kumitwe yabo ku moneka ngo babilolo ba litunga lya Mbambiloni.

¹⁶ Wanguwangu oho abamonene, wayuvwile nyumwa pe watumine miluwe kukwabo mu Mbambiloni.

¹⁷ Baka Mbambiloni bezile mu kulala nendi. Nibo balalile nendi na kumubipisha shikuma, ku mamaninino bengile bawunyengwe kukwendi.

¹⁸ Waliholwele ha kuyela na kuletesha muntu nimwendi alimuke ngayi wenga walwiholwiho. Ami nayuvwilenga wunyengwe ngonehe nekalilenga na yayiyendi.

¹⁹ Niye wengile walwiholwiho lwa kupitakanisha, wanukilenga matena ngonehe eshe ekalilenga kankanga, oho engilenga lwiholwiho mu Engepita.

²⁰ Niye walishingilenga na balume ba linyawe shikuma, bekalile na ngovu shikuma ngo bambongolo mu linyawe na linyawe nimwalyo lya wumbishi.

²¹ Obe Oholiba washingilenga ku bokela kutenda wubi wobe ngonehe watendelenga ha wunkanga mu Engepita omu balume bafukanishilenga mabele wobe na kuyongesha nkaanga yobe.”

Kuyata kwa Nyambi ha mbuyama wakanuke

²² Haya, obe Oholiba, eshe nisho akwamba Nyambi ya Ngula kukwobe, ami nikaletesha ngayi, “Bakakuhakiwa bobe bakakupilamine na ku baleta ngayi bakuzinguluke mu kukulwisha.

²³ Nikaleta nimwabo baka Mbambiloni na Bakalendiya, balume bakufuma ku Pekondi, Showa na ku Koa na Baashiliya nimwabo. Batwanuke babawahe na babilolo ba kulimukiwa nimwabo. Nimwabo bengile batulela na babilolo ba mpupo na bakakukandama ha bambishi.

²⁴ Nibo bakakulwisha kufuma ku zimbalila nimwazo, bakaleta nzita yayinene na makoloyi amanene na bileyi. Banapakata makebo na zihoshi, pe bakamizinguluka. Ami nikamitengulwila kukwabo ngayi bakamiyate na ndayano zabo.

²⁵ Ami nika kukalihila ndaba ya lihungu, nikabaleha bakakutende kwezekesha mu kupilama. Nibo bakaketula muzulu wobe na matu wobe na baya bashalileho bakazihiwa na mukwale. Ee, bakakuyangula bana bobe babalume nanaba babambuyama na baya bashalile nimwabo bakabahokesha na mundilo hibatona.

²⁶ Nibo bakatabozola bivwalo byobe na ku kuyangula makaya wobe.

²⁷ Ami nikamanisha linyawe lyobe na lwiholwiho lwobe watendelenga oho ushili mu Engepita. Obe wufwako kukatilamina kukwabo, hinge kuhanganika bya mu Engepita kami.”

²⁸ Eshe nisho anakwamba Nyambi ya Ngula ngayi, “Nikakupanika mu maboko a bantu wazimba na naba wanyikwa.

²⁹ Bakakutenda kwezekesha na nzimbo yabo, nibo bakakuyanga byuma nimwabyo ebye watendelele mulimo na kukushiya tuhu nahiya muhelengwa. Kami muhelengwa wobe ukashala ha kuyela. Linyawe lyobe na lwiholwiho lwobe,

³⁰ binakuleteshele ku shushuliwa ha kutenda wunjenge na matunga na kulibipisha obe mwine ku tunankishi twabo.

³¹ Obe wakonkele mu mwanza wa yayiyobe, haya nika kushushula mu nzila yimo nehe niye.”

³² Nyambi ya Ngula unakwamba ngayi, “Obe ukanwa munkomoki ya yayiyobe wa mbuyama ya makando, niyo yinengi yayinene na kukunama. Muntu nimwendi ukakuhepa na kukuhengamina, nkomoki niyo ya kwinzala.

³³ Niyo yikakuletesha unginga na kukolwa, nkomoki iya yinengi ya kutinisha na kulobesha, nkomoki ya Shamaliya yayiyobe wa mbuyama.

³⁴ Obe ukanwa na kuyiyumisha nkwaa, na bibalabala byayo byakupaboka bikatabola mabele wobe.” Eshe nisho na kwamba Ami Nyambi ya Ngula.

³⁵ Nyambi ya Ngula unakwamba ngayi, “Ndaba wamvulamine na kumfutamina, ukayanda ha lwiholwiho lwobe na kulishoza kwobe.”

Kuyata kwa Nyambi ha bambuyama aba babili

³⁶ Nyambi ya Ngula wambile kukwami ngayi, “Obe mwana muntu, unaliwahishili kuyata Ohola na Oholiba ndi? Ee, banyance ku byuma banatende byawunyengwe.

³⁷ Nibo banatende wunjenge na wupondwa, banatende wunjenge na tunankishi na mponde ya bana aba bambelekelele. Nibo batupwile bana bami kutunankishi twabo.

³⁸ Ebye kaliha nibyo batendele tuhu, ngoboni babipishile litala lyami na kuvulama Matena ami aku Katala.

³⁹ Kunyima ya kuziha bana bami kwinga zinkombela ku tunankishi twabo, bezile ku litala lyami na kulibipisha. Eshe nisho batendele mu litala lyami.

⁴⁰ “Nibo batumine bantumwana mukwihana bantu ngayi beze kufuma ku zimbalila za kwakutali, nibo bezile. Enu niho mwayowelele naku waba ku meho na kuvwala makaya.

⁴¹ Nibo bekalile ha wulili wawuwahe naku bayakila tebulu yayiwahe kumbili yabo, aha mwayakile Incence ya kuhokesha ya livumba lyaliwahe na mazi a olive aya engile ami.

⁴² Mungunina wa baka ku wahilila wayuvwanikile, wa litanga lya balume lyaletiwile kufuma mu libelelengwa. Nibo bavwalikile bakazi makaya ku maboko na minana yayiwahe shikuma ku mitwe yabo.

⁴³ Ami nambile ngayi nibo balilalilenga ngonehe mukazi walwiholwiho unashwawuku na linyawe.

⁴⁴ Nibo bayilenga kukwendi ngonehe balume bayanga ku mukazi walwiholwiho. Nohobene nisho kami balalilenga na Ohola na Oholiba, obo banengi bambuyama ba linyawe.

⁴⁵ Bantu bakulunga bakabanyanca ha mulandu wa wunjenge na kuyita mukeza wa bantu, ndaba ya kutenda bya wunjenge na maboko wabo analilombo na mukeza.”

⁴⁶ Eshe nisho akwamba Nyambi ya Ngula ngayi, “Nikaleta likunge lya mushunga mu kubayandisha na kubapukula.

⁴⁷ Likunge likabapuha mamanya na kubalwisha na mikwale, likaziha bana babo babalume na ba bambuyama na kuhokesha matala wabo.

⁴⁸ Ami nikakanisha wunjenge mu litunga nimwalyo na kukeyesha bambuyama nimwabo ngayi babule kutenda wunjenge ngonehe batendelenga.

⁴⁹ Pe nenu babili ba muntu na mukonzo wendi nikamishushula ndaba ya linyawe lyenu na wubi wenu wakulemeshanga tunankishi. Niho mukalimuka ngayi Ami nili Nyambi ya Ngula.”