Ezekiyele 22 - Libuka Lya Kuyela

Milandu yamu Yelushalema

¹ Nyambi ya Ngula wambile kukwami ngayi,

² Obe mwana muntu, obe unaliwahishili kuyata lukena luya lunenzala na batupondwa ndi? Batongweze byuma nimwabyo biya bya wunyengwe banatende.

³ Batongweze ebye na kwamba Ami Nyambi ya Ngula ngayi, obe unazihi bantu bobe babengi, kami unalibipishi obe mwine mu kulemesha tunankishi, shikati shobe shinakwiza.

⁴ Muli na mulandu ndaba ya zimponde ziya kami munabipishi na tunankishi otu mwatendelenga, haya mutena wenu unakwiza, shikati shenu shinamana. Eshe nisho shuma naletelele mikoka ngayi yikuhengamine na matunga nimwawo ngayi akuhepe.

⁵ Matunga ali hahepi na matunga ali kwakutali akakuhengamina ndaba ya biheka byobe bya kubula kwombatala.

⁶ Bakakutwaminina ba Ishalela nimwabo bakuliyavwisha nyala zabo na kutenda bya wupondwa.

⁷ Bahemi bobe kutambula maleema mumwobe bafwako. Wongezanga bayeni na kuwana zinzila za kukeyela bamfwile na banginga.

⁸ Kami wufwako kupanika maleema byuma bya kuyela na kuhandula matena ami aku Katala.

⁹ Bamo ku bantu bobe bakwongeza, ngayi bazihe baminabo. Bamo kukwabo ba kulya zinkombela zinapanikiwi ku tunankishi. Bamo bakwonzela ku wahilila mu makwilu wabo.

¹⁰ Bamina ba kulalanga na bakaza batatizabo. Bamina banakandamiki kulangana na bakazi bali ku nkunka.

¹¹ Nibo banatende bya wunyengwe bya wunjenge na kulala na balamu babo, bamina ba kulala na bako babo bakaza bana babo, hinge bampanzabo ba ku wutate.

¹² Bamina ku bantu bobe bazihilanga mali. Bamina ba kuyakila zinkambiko ha mikuli ba kutenda ku baminabo baka Ishalela na kuheta ndaba ya kupombola. Nibo banamvulama. Eshe nisho akwamba Nyambi ya Ngula.

¹³ Ami nikaleta wukali wami ha bakakuyiba naku batupondwa.

¹⁴ Kati obe ukuhanganika ngayi kukanca kwobe kukehala, hinge kwikala na nyala za kukatula liboko oho nikatenda nanenu ndi? Eshe nisho na kwamba Ami Nyambi ya Ngula, kami nikakonga mazu wami.

¹⁵ Ami nikapanzanishila bantu bobe ku matunga nimwawo na ku mikoka yashenge, nikamanisha zintendelo zenu zazibi.

¹⁶ Haya matunga amina aka mi handula, kami mukalimuka ngayi Ami nili Nyambi ya Ngula.

Ncaka ya Nyambi ya ku shamishila

¹⁷ Nyambi ya Ngula wambile kukwami ngayi,

¹⁸ “Obe mwana muntu, baka Ishalela bafwako kuyavwa kukwami. Nibo banengi ngo kulifungila kwa likango, muwe na byondo na malesha anashalaho ha shiliva unashamishiwi mu ncaka.

¹⁹ Nohobene Ami Nyambi ya Ngula na kubatongweza ngayi banengi byowa. Ami nikabaleta hamo nimwabo mu Yelushalema,

²⁰ ngonehe bantu ba kukungula shiliva, byondo, lilesha, muwe na likango mu ncaka mu ku shamishiwa. Kupilama kwami na ku bamba kukamiyungulula ngonehe mundilo wayungululanga muwe.

²¹ Ee, ami nikaba kungulwila mu Yelushalema, nikayibika mundilo mu nceto yabo na ku bayungulula na wukali wami.

²² Nibo bakayungululiwa mu Yelushalema ngonehe shiliva wayungululiwanga mu ncaka, haya niho bakalimuke ngayi Ami Nyambi ya Ngula napilama.”

Wubi wa bakakutwaminina ba Ishalela

²³ Nyambi ya Ngula wambile kukwami ngayi,

²⁴ “Obe mwana muntu, tongweza baka Ishalela ngayi litunga lyabo lya kubula kuyela, kami kukabula mvula nikabashushula mu kupilama kwami.

²⁵ Bakakutwaminina banengi ngonehe babimbwi babulumanga ha batuyamana banazihi. Nibo ba kuziha bantu na kushimba mali na wuheti nimwawo ba kuwana, kami wupondwa wabo unaleteshe bamfwile babengi.

²⁶ Bakankombela ba kukiluka ndayano zami na kubula kupana maleema byuma byami bya kuyela. Nibo bafwako kutapulula mukati ka nebye bya kuyela nanebye bya kubula kuyela, pe nibo ba kulimbulula matena ami aku Katala. Ninawana ngayi baka Ishalela bafwako kumpana maleema.

²⁷ Babilolo ba wulolo banengi ngonehe bambinzi ba kutabola batuyamana banazihi. Nibo ba kuziha bantu ngayi mwanga bahete.

²⁸ Bamiluwe banaholeke wubi ou, ndaba ya bimono byabo bya mahalo na zimpemba za kwawulisha za kwongeza. Bakwamba ngayi, ‘Eshe nisho anamba Nyambi ya Ngula,’ kati Nyambi ya Ngula shilolo ambe noho kukwabo.

²⁹ Bantu bakwongeza na kupukula. Bakuyandisha bakakushepwa na kupombola bayeni.

³⁰ Ami nashingile muntu wamina ukutwesha kutendulula kembi, ukutwesha kwimana mu mwanya kumbili yami na kulama litunga oho nili hahepi mu kulobesha. Ngoboni kaliha namuwanine.

³¹ Nohobene nikabapilamina na kubanongesha na mundilo, nikabashushula hanebye banatende.” Eshe nisho anamba Nyambi ya Ngula.