Ezekiyele 21 - Libuka Lya Kuyela

Mukwale wa Nyambi ya Ngula

¹ Nyambi ya Ngula wambile kukwami ngayi,

² “Obe mwana muntu, tilamina ku Yelushalema, ubakalihile ku myanya oku ba kulemeshela. Lubulwila bakalitunga lya Ishalela.

³ Tongweza Baishalela ebye na kwamba Ami Nyambi ya Ngula ngayi, ‘Ami na kumi lwisha. Nikafumisha mukwale wami mu shipushu na kumiziha nimwenu, wakulunga na wakuluwa hamo.

⁴ Haya nikayaka mukwale wami ha bantu nimwabo na kulwisha nimwabo ba ku ncelele na ba ku mabukubuku.

⁵ Muntu nimwendi ukalimuka ngayi Ami Nyambi ya Ngula nafumishi mukwale wami mu shipushu kami nifwako kukalehasho.’

⁶ “Obe mwana muntu, shunga shikuma oku muntu nimwendi akutwesha kukuyuvwa, shunga oho mutima wobe unakushinga kutabuka na bowa.

⁷ Oho ba kukuyipula ngayi shumangani ukushunga? Obe batongweze ngayi ndaba ya lushango luna kwiza. Batongweze ngayi mitima yabo yikekala na bowa, maboko wabo akabombola, kukanca kwabo kukamana na manungo wabo akapopa. Shikati shakumakale.” Eshe nisho anakwamba Nyambi ya Ngula.

⁸ Kami Nyambi ya Ngula wambile kukwami ngayi,

⁹ “Obe mwana muntu, lubulula na kutongweza bantu ebye na kwamba Ami Nyambi ya Ngula, Ou mukwale, ou mukwale unakumbiwi na kulombiwa.

¹⁰ Niwo unakumbiwili kuziha, unalombiwi na kubyazima ngonehe lumuni. Kowa muntu ukutwesha kuwu fukanisha, ndaba mwakanine kubeliwa.

¹¹ Mukwale uli na kulombiwa, kuwahishila kuketwishawo. Niwo unakumbiwi na kulombiwa, ngayi upanikiwe ku maboko a bakakuziha.”

¹² Obe mwana muntu, bilika na kukangoka, ou mukwale ukayakiwa ha bantu bami, na bakakutwaminina nimwabo ba baka Ishalela. Nibo bakazihiwa hamo na bantu bamina nimwabo. Kama ha shilama shobe mukutina!

¹³ Banakwezekiwa, ndi bashili kukana ku batengulula, ebye nimwabyo bikamoneka hahabo. Eshe nisho nikwamba Ami Nyambi ya Ngula.

¹⁴ “Nohobene, obe mwana muntu, lubulula na kukambilila mu maboko wobe, pe mukwale ukashwanga kabili hinge kahatu. Niwo unengi mukwale wakuziha, mukwale wakutinisha unabazinguluku.

¹⁵ Niwo ukwingisha bantu bami bowa na kutalyangila. Ami nikatinisha lukena lwabo na mukwale, uya ukubyazima ngonehe lumuni, kami unaliwahishili kuziha.

¹⁶ Ketula ku shilyo na ku shimoho obe mukwale wawutwe! Ketula nimwako oku ukutengulukila.

¹⁷ Ami kami nikakambilila mu maboko wami na kupilama kwami kukamana.” Eshe nisho anakwamba Nyambi ya Ngula.

Mukwale wa mwene waku Mbambiloni

¹⁸ Nyambi ya Ngula wambile kukwami kami ngayi,

¹⁹ Obe mwana muntu, funda zinzila zibili omu akezilila mwene waku Mbambiloni na mukwale wendi. Nimwabo bakatutikila mu litunga limo. Yimika shilimukisho sha zimpangwa kumu hamba nzila.

²⁰ Yimo yiku monesha mwene nzila ya kuya ku baka Amoni, ku lukena lwa Lamba. Na nzila yamina ku Yunda, yikuya mukati ka bipata bya Yelushalema.

²¹ Mwene waku Mbambiloni wemananga kwakwipi na shilimukisho sha mpangwa ya ku mahambanzila ngayi ashingishishe nzila eye akuya, pe ukanyenkanisha mivwi na kupehelela tunankishi, pe ha kuhongola mutima wa kayamana wakupehelelesha.

²² Liboko lyendi lya shilyo linakwata muvwi wakufundikisha Yelushalema. Uya muvwi ukamumonesha kuyaka shuma shimo sha kuliyavwisha ku shiwula kembi mumwanya wako. Naku bilikiza lukuwa lwa nzita na kutwa mu twimbi twenu na mitondo na bipana na kutenda mishimino ya limvu kuzingwilisha bipata na tutambo.

²³ Bantu bamu Yelushalema bafwako kuka kulupila eshe, ndaba ya nebye baliyuvwashanine na baka Mbambiloni. Ngoboni eshe shikenga shanukisho sha wubi wabo na shilimukilo sha ku bakwatisha.

²⁴ Nohobene Nyambi ya Ngula unakwamba ngayi, “Wubi wenu unamoneke, unanyanukishi milandu yenu eshe yili. Kami unaholoko na ku monesha zintendelo zenu nimwazo. Nohobene munanyanciwi kami nikamipanika ku bakankole benu.

²⁵ Mutena wenu unakwiza kami, enu batulela bababi, bakubula kuyela ba Ishalela, mutena wa kashushwilo kenu kamamaninino.”

²⁶ Eshe nisho anakwamba Nyambi ya Ngula ngayi, “Vwula munana wobe na kaponda kobe kakuzenga ku mutwe. Byuma bikafutuka. Pana ngovu ku wakushepwa na ku shepesha bakakulilundumika.

²⁷ Kuloba, kuloba! Ee, Ami nikalobesha lukena. Ngoboni eshe shifwako kukamoneka hantu akeza ou nahata mu kushushula.”

Mukwale na baka Amoni

²⁸ “Obe mwana muntu, lubulula na kubilika ebye nikwamba Ami Nyambi ya Ngula ha baka Amoni aba bali na kuhandula Ishalela. Batongweze ngayi, ‘Mukwale unaliwahishili kunongesha. Niwo unalombiwili kuziha, ukubyazima ngonehe lumuni.’

²⁹ Tongweza baka Amoni ngayi bimono biya bamonanga byenga bya mahalo na ku shimikila bashimikilanga kwa kwongeza. Nibo banatende shibi bantu bababi. Mutena wa kashushwilo kabo kamamaninino unakwiza. Mukwale ukawila ha mikoshi yabo.”

³⁰ “Bweshenu mikwale yenu mu bipushu. Ami nikamiyata mu mwanya omu mwalengiwilile, mu litunga omu mwa hemuwilile.

³¹ Nikamonesha kupilama kwami hahenu oho nikamifutukila ngonehe mundilo wakuyekula. Nikamifutwila ku bantu ba shilala, aba balimukisha bya makando.

³² Enu mukanongeshiwa na mundilo. Mukeza wenu ukayitikila mu litunga lyenu, kami kowa muntu ukamyanuka.” Eshe nisho akwamba Nyambi ya Ngula.