Ezekiyele 20 - Libuka Lya Kuyela

Shifungo sha Nyambi na kubula kwombatala kwa bantu

¹ Ha mutena wawulikumi wa ngonda ya mutanu, mu mwaka wa mutanu na yibili, bakakutwaminina bamina ba likunge lya baka Ishalela bezile mukwipula shifungo sha Nyambi ya Ngula. Nibo bekalile hanci kumbili yami.

² Niho Nyambi ya Ngula ambile kukwami ngayi,

³ “Obe mwana muntu, amba ku bakulwane aba na kubatongweza ebye na kwamba Ami Nyambi ya Ngula ngayi, ‘Kati enu munezi na kwipula shifungo shami ndi? Nehe nili ami Nyambi wakuyoya, mwa shikuma nifwako kuketabila ngayi enu mukanyipule shuma shamina.’ Eshe nisho na kwamba Ami Nyambi ya Ngula.”

⁴ Obe mwana muntu, kati waliwahishilakale mu kubayata ndi? Kati bayate. Banukishe byuma byawunyengwe ebye batendele batatizabo.

⁵ Batongweze ebye nikwamba Ami Nyambi ya Ngula ngayi oho nahatile Ishalela nalihahile luhaho ku baka litala lya Yakobo na kuliholola kukwabo mu Engepita na kubatongweza ngayi, Ami nili Nyambi ya Ngula Nyambi yenu.

⁶ Ha mutena uyo nalihahile kubafumisha mu Engepita na kubatwala mu litunga elye nabahatilile, litunga likukunkula mahwe na wushi.

⁷ Nabatongwezele ngayi, yumbenu tunankishi twenu twa wunyengwe otu munalikowezele na kubula kulibipisha enu bamwine na tunankishi twa mu Engepita, ndaba Ami nili Nyambi ya Ngula, Nyambi yenu.

⁸ Ngoboni nibo balwishile na kukana kuyuvwilila. Nibo kaliha bayumbile tunankishi twabo twa wunyengwe, hinge kuleha tunankishi twa baka Engepita. Ami naliwahishilile ku bakalihila na ku monesha kupilama kwami muyo mu Engepita.

⁹ Ngoboni kaliha natendele noho, ndaba shiyo shikaleta lisheni ku lizina lyami na kuhanduliwa ku meho a bantu. Nambile ku Baishalela nanaba bekalilengaho ngayi Ami nikafumisha Baishalela mu litunga lya Engepita.

¹⁰ Niho nabafumishile mu Engepita na kubatwala mu libelelengwa.

¹¹ Nabatongwezele mazu wami na kuholola ndayano zami kukwabo. Muntu nimwendi ou ukwombatala ndayano ukayoya.

¹² Nabatongwezele ngayi balame matena aku Katala kwinga shimonekesho sha kuliyuvwashana mukatiketu na kubanukisha ngayi Ami Nyambi ya Ngula nikabayelesha.

¹³ Ngoboni ba Ishalela bankanine mu libelelengwa. Nibo bakilukile lukuwa lwami na kukana ndayano zami, shinga bayoyele shikati shashitali hakwombatala. Nibo bazilulwile matena ami aku Katala. Ami naliwahishilile ku bakalihila na ku monesha kupilama kwami hahabo mu libelelengwa na kubanongesha.

¹⁴ Ngoboni kaliha natendele noho, ndaba shikaletesha lisheni ku lizina lyami na kuhanduliwa ku matunga ndaba banamono hinitwaminina ba Ishalela kubafumisha mu Engepita.

¹⁵ Nohobene Ami nahahile luhaho mu libelelengwa ngayi nifwako kuka batwala mu litunga elye nabapanikile, litunga likukunkula mahwe na wushi.

¹⁶ Nalihahile ndaba nibo bakanine ndayano zami na kukiluka lukuwa lwami na kuzilulula matena wami aku Katala. Nibo bashingile tuhu kulemesha tunankishi.

¹⁷ Ngoboni nabayuvwilile nceshe, kaliha na banongeshele hinge kubazihila muyo mu libelelengwa.

¹⁸ Kami natongwezele bana babo mu libelengwa ngayi, “Hinga mukonka zintendelo za bankakazenu. Hinga mukonka biheka byabo, hinge kulibipisha na tunankishi twabo.

¹⁹ Ami nili Nyambi ya Ngula Nyambi yenu. Ombatalenu mazu wami na ndayano zami.

²⁰ Lamenu matena ami aku Katala, niwo akenga shilimukisho sha kuliyuvwa mukatiketu, kami mukalimuka ngayi ami nili Nyambi ya Ngula Nyambi yenu.

²¹ “Ngoboni shiyo shihemwinino kami sha mfutulukilile, bakilukile mazu wami na kubula kulama ndayano zami. Nibo bazilwile matena ami aku Katala. Shinga bayoyele shikati shashitali hakwombatala. Ami naliwahishilile ku bakalihila na ku monesha kupilama kwami hahabo mu libelelengwa na ku baziha nimwabo.

²² Ngoboni kaliha natendele noho, ndaba shikaletesha lisheni ku lizina lyami na kuhanduliwa ku meho a bantu ndaba matunga anamono hinitwaminina ba Ishalela kubafumisha mu Engepita.

²³ Nohobene ami nahahile luhaho lwamina mu libelelengwa ami nikatwesha ku bapanzanishila mu kaye nimwako.

²⁴ Ami natendele eshe ndaba nibo bakanine ndayano zami na kukiluka mazu wami, banazilululu matena ami aku Katala na kulemesha tunankishi otu balemeshelenga bankakazabo.

²⁵ Niho nabapanikile ndayano zazibi na mazu aya a kubula kuleta wumi.

²⁶ Ami nabalehele hibalibipisha nibo bamwine na zintupu zabo na kubaleha hibatupula bana babo ba bamyeli babalume. Eshe shikenga noho mwanga nikabashushule na kubamonesha ngayi Ami nili Nyambi ya Ngula.

²⁷ “Nohobene obe mwana muntu, tongweza ba Ishalela ebye nikwamba Ami Nyambi ya Ngula kukwabo ngayi eze nizo zinzila zimo kami ziyo bahandwile nazo batatizenu mu kubula kukulupila kwabo.

²⁸ Ami na baletele mu litunga elye naba kulupishile kubapanika. Oho bamonene twina twatutali na mitondo ya kubombola, nibo bapanikile zintupu zabo kukwabyo nimwabyo. Nibo bampilamishile na zinkombela bahokeshelenga na zintupu za kunwa eze batupwile.

²⁹ Ami nabepwile ngayi, ‘Kati eye myanya yayitali oku mu kuyanga yinengi bishini?’ Nohobene niyo yikutoyiwa shikati nimwasho ngayi, ‘Myanya Yayitali.’

³⁰ “Haya tongweza Baishalela ebye na kwamba Ami Nyambi ya Ngula ngayi, ‘Shumangani mu kutendela wubi ou batendelenga batatizenu na kukonka tunankishi twabo? Ha kutenda byuma bya wunyengwe.’

³¹ Munakupanika bishemo byenu na kukombelelanga bana benu kukwata ha mundilo muna kulibipisha enu bamwine ku tunankishi, pe haya enu Baishalela himukwiza kukwami na kwipula shifungo shami. Mwa shikuma nehe nili Ami Nyambi ya Ngula wakuyoya, nifwako kukamitabila ngayi mukanyipule shuma shamina.

³² Bifungo byenu bifwako kukatendiwa, ndaba bihanganiko byenu mukushinga ngayi mwinge ngonehe mikoka yashenge, ngonehe bantu bekala mu matunga amina bakulemesha bitondo na mamanya.”

Nyambi mukakushushula na kuyatila

³³ “Mwa shikuma nehe nili Ami Nyambi ya Ngula wakuyoya, nikamilela na liboko lya ku shuma na ngovu zami nimwazo na kupilama kwami.

³⁴ Nikamimonesha ngovu zami na kupilama kwami oho nikamikungulwila hamo kumifumisha ku matunga nimwawo oku mwapanzaninine.

³⁵ Ami nikamileta mu libelelengwa lya mikoka, nikamiyate nimwenu.

³⁶ Haya nikamiyata ngonehe nayatilenga batatizenu mu libelelengwa lya mu Engepita.” Eshe nisho akwamba Nyambi ya Ngula.

³⁷ “Ami nikamikandamika shikuma na kumingisha bakakwombatala kulimama kwami.

³⁸ Mukati kenu nikafumishamo baya bankani na bakawubi. Nikabafumisha mu matunga omu banaziki wuluno, ngoboni nifwako kuka baleha ngayi baboke ku litunga lya Ishalela. Kami mukalimuka ngayi Ami nili Nyambi ya Ngula.”

³⁹ Nyambi ya Ngula unakwamba ngayi, “Haya nimwenu enu Baishalela, yenunga mukalemeshe tunankishi twenu! Ngoboni ami nikumitongweza ngayi kunyima ya neshe enu mu ku fwanina kunyombatala na kubula kuhandula lizina lyami lya kuyela ndaba ya kutupula bishemo ku tunankishi twenu.”

⁴⁰ Nyambi ya Ngula unakwamba ngayi, “Ha lipili lyami lya kuyela lya Ziyoni, lipili lyalitali mu Ishalela, nimwenu Baishalela mukandemeshelaho muyo mu litunga. Ami nikamiwahilila na zinkombela mu kundetela na zintupu zenu zaziwahe na bishemo byenu bya kuyela.

⁴¹ Kunyima ya kumifumisha mu matunga omu mwalipanzanishilile na kumi kungulwila hamo, nikatambula zinkombela ziya mwahokeshenga. Matunga akalimuka ngayi ami nili wa kuyela.

⁴² Oho nikamibwesha ku litunga lya Ishalela, liya na kulupishile kupanika bankakazenu, niho mukalimuka ngayi Ami nili Nyambi ya Ngula.

⁴³ Niho mukanuka byuma nimwabyo bya kuyeneshesha ebye mwatendele na neshe mwalibipishile enu bamwine. Mukayuvwa wunyengwe enu bamwine, ndaba ya byuma byabibi nimwabyo ebye mwatendelenga.

⁴⁴ Enu baka Ishalela mukalimuka ngayi Ami nili Nyambi ya Ngula natendanga nanenu ndaba ya lizina lyami, kaliha na ntendelo yenu yayibi.” Eshe nisho anamba Nyambi ya Ngula.

Mundilo waku mabukubuku

⁴⁵ Nyambi ya Ngula wambile kukwami ngayi,

⁴⁶ “Obe mwana muntu, tilamina kulwa mabukubuku. Ambila mabukubuku na kulubulwila lishaka lya ku Nengembu.

⁴⁷ Tongweza lishaka lya ku mabukubuku liyuvwilile ebye akwamba Nyambi ya Ngula. Penza na ku bangiza mundilo mukati kobe, kami ukahokesha bitondo nimwabyo bya kubombola na bitondo nimwabyo bya kuyuma mumwobe. Kowa shuma shikazima milangi. Niwo ukakonkana nimwako kufuma ku mabukubuku kukuma na ku ncelele pe ukahokesha lupala nimwalo.

⁴⁸ Muntu nimwendi ukamona ngayi Ami Nyambi ya Ngula, ami nahokeshewo mundilo kami kowa muntu ukatwesha kuwuzima.”

⁴⁹ Niho nambile ngayi, “Obe Nyambi ya Ngula, muntu nimwendi unakulinyenga hahami ngayi, ‘Nakwamba munyambilo ya zinguli?’”